સિદ્ધિ / ડાંગ: વઘઇની વિદ્યાર્થીનીના આ સંશોધનને રાષ્ટ્રપતિએ પણ કર્યું સન્માનિત, હવે જશે જાપાન

ડાંગ જિલ્લાના વધઈ તાલુકાના નાનકડા એવા દગડીઆંબા ગામમાં રહેતી આશા પવારનું ઘર. ઘર સામાન્ય છે, પરંતુ બાળપણમાં પિતાની છત્રછાયા ગુમાવી ચૂકેલી આશા પવારે આજે એવી તો સિદ્ધી હાંસલ કરી છે કે, આ આદિવાસી કન્યાની નોંધ આંતરાષ્ટ્રીય સ્તરે લેવાઈ છે.

તમને થશે કે એવું તે એ કન્યાએ શું કર્યું છે કે વિશ્વએ જેની નોંધ લેવી પડે.  તો વાત એમ છે કે, આશા પવાર નામની આ આદિવાસી વિદ્યાર્થિનીએ ભૂગર્ભ  ડ્રેનેજ સાફ કરવાનું યંત્ર બનાવીને સૌનું ધ્યાન ખેંચ્યું છે. વધઈ તાલુકાના દગડીઆંબા ગામની શાળામાં અભ્યાસ કરતી આ વિદ્યાર્થિનીએ શાળાના વિજ્ઞાનમેળામાં ડ્રેનેજ કલીનર મશીનની કૃતિ રજૂ કરી હતી. 

વિદ્યાર્થીનીની આ કૃતિ હવે વિવિધ તબકકામાંથી પસાર થઈને રાષ્ટ્રીય કક્ષાએ પસંદગી પામી છે. રાષ્ટ્રકક્ષાએ યોજાયેલા વિજ્ઞાનમેળામાં 850 કૃતિ રજૂ થઈ હતી જેમાંથી 66 કૃતિઓ પંસદ કરવામાં આવી હતી જેમાની એક કૃતિ આશા પવાર દ્વારા સંશોધિત કરવામાં આવી હતી. એક આદિવાસી કન્યાના આ સંશોધન બદલ તેનું દિલ્લી રાષ્ટ્રપતિના હસ્તે સન્માન પણ થયું હતું. હવે તેની કૃતિ રજૂ કરવા માટે આશા પવારને જાપાન જવાની તક પણ સાંપડી છે.

એક સર્વે મુજબ આપણા દેશમાં દર વર્ષે 30000 સફાઈ કામદારો ગટરમાં ઉતારવાના કારણે મૃત્યુ પામતા હોય છે. ત્યારે આશા પવાર દ્વારા સશોધિત કરાયેલા આ ડ્રેનેજ કલીનર યંત્રનો વ્યવહારમાં જ્યારે ઉપયોગ શરૂ થશે ત્યારે સફાઈ કર્મીઓના મોતની દુર્ઘટનાઓ ટાળવામાં મદદ મળશે. આ યંત્ર દ્વારા ગટરનું પાણી કે કચરો તેની સાથે જોડાયેલી બાસ્કેટ દ્વારા સીધો બહાર આવી શકે છે. જે માટે કોઈ સફાઈ કર્મચારીને મેનહોલમાં ઉતરવાની જરૂર પડતી નથી. આશા પવારના આ પ્રોજેક્ટને તૈયાર કરવા માટે દાગડી આંબા શાળાના શિક્ષકોએ પણ પ્રોત્સાહન આપ્યું હતું.

જ્યારે આવી સંશોધક પુત્રીને છેક રાષ્ટ્રપતિના હસ્તે સન્માન મળતું હોય તો આદિવાસી આગેવાનો સમાજની દીકરીને સન્માનિત કર્યા વગર કેમ રહી શકે, એટલે જ તો સમાજની અનાથ દીકરીઓને દત્તક લઈને તેમને પ્રોત્સાહન આપવા માટે નવસારી સ્થિત વીરવાડી ચેરિટેબલ ટ્રસ્ટે આશા પવારને સન્માનિત કરવા સન્માન સમારંભ યોજ્યો હતો. સમાજના આગેવાનો દ્વારા આશા પવારનું સન્માન કરવામાં આવ્યું હતું. દોડમાં સિદ્ધિ મેળવનારી ડાંગ એક્સપ્રેસ તરીકે ઓળખાતી સરિતા ગાયકવાડ બાદ આશા પવાર નામની આ યુવતીએ દેશનું નામ રોશન કર્યું છે.