ઓડિશામાં તબાહી મચાવ્યા બાદ ફેણી વાવાઝોડું હવે પશ્ચિમ બંગાળ તરફ આગળ વદી રહ્યું છે. ખડગપુરને પાર કરી પશ્ચિમ બંગાળ પહોંચેલા તોફાનમાં ઝડપથી પવન સાથે વરસાદ ચાલુ થઇ ગયો છે. અહીં 90 કિમી ઝડપે પવન ફુંકાઇ રહ્યો છે. ચક્રવાત ફેણીએ શુક્રવારે ઓડિશામાં ભારે તબાહી મચાવી હતી. ઓડિશામાં ત્રાટકેલા ફેણી ચક્રવાતના પગલે 10 લોકોનાં મોત પણ થયા છે અને 160થી પણ વધુ લોકો ઈજાગ્રસ્ત થયા છે. ફેણીએ પુરીમાં 245 કિલોમીટર પ્રતિ કલાકની ઝડપે તાંડવ મચાવ્યો હતો.
ફેણીના કારણે ઓડિશાના અનેક વિસ્તારોમાં ભારે વરસાદ થતા અનેક જગ્યાએ વૃક્ષો અને વીજળીના થાભલા પણ ધ્વસ્ત થયા છે. દરિયાઈ કિનારે વસવાટ કરનારાઓને સુરક્ષિત સ્થળે ખસેડી દેવામાં આવ્યા છે. ચક્રવાત ફેણીના કોલકત્તામાં પણ ભારે વરસાદ જોવા મળ્યો છે. હાલ ફેણી ચક્રવાત પશ્ચિમ બંગાળના ખારાગપુરથી આગળ વધ્યુ છે. ફેણી ચક્રવાતના પગલે 220થી પણ વધુ ટ્રેન રદ કરી દેવામાં આવી છે. જ્યારે અનેક વિસ્તારમાં ભારે વરસાદ પણ જોવા મળ્યો.
ઓડિશામાં ભારે વરસાદ બાદ અનેક શહેરો અને ગામો પણ પાણીમાં ગરકાવ થયા છે. તંત્ર દ્વારા ચક્રવાત ફેણીને લઈને હાઈઅલર્ટ પણ જાહેર કરવામાં આવ્યુ છે. ચક્રવાત ફેણીના પગલે 15 લાખ લોકોને સુરક્ષિત સ્થળે ખસેડી દેવામાં આવ્યા છે. જ્યારે વાવાઝોડા સામે બચાવ અને રાહત કાર્ય માટે NDRFની 40 ટીમ, આર્મી, નેવી પણ ખડેપગે છે.
પુડુચેરી, તમિલનાડુ, આંધ્રપ્રદેશમાં પણ અલર્ટ જાહેર કરવામાં આવ્યુ છે. તો ચક્રવાત ફેણીના પગલે ભુવનેશ્વર અને કોલકત્તા એરપોર્ટ પર પણ ભારે તબાહી જોવા મળી રહી છે. ભુવનેશ્વર એરપોર્ટને ચક્રવાતના પગલે ભારે નુકસાન થયુ છે. તો રાજ્યની વિવિધ સ્કૂલો હાલ આશ્રય સ્થળ બન્યુ છે અને લોકો સ્કૂલોમા આસરો લઈ રહ્યા છે.