હાંશકારો / પેટ્રોલ-ડીઝલના ભાવ વધારામાં મળી શકે છે મોટી રાહત, ભારતમાં આ કારણે સસ્તું થશે ક્રૂડ ઓઇલ

• વૈશ્વિક બજારમાં ક્રૂડ ઓઇલની કિંમતોમાં રેકોર્ડ સ્તરથી 18 ટકાનો ઘટાડો
• UAEએ ક્રૂડ ઓઈલનું ઉત્પાદન વધારતા ભારતને થશે વધુ ફાયદો
• દેશમાં પેટ્રોલ-ડીઝલના ભાવમાં મોટો વધારો થવાની શક્યતા

રશિયા-યુક્રેન વચ્ચે ચાલી રહેલા યુદ્ધના કારણે ક્રૂડ ઓઇલની સપ્લાય પર તેની માઠી અસર પડી છે. આ જ કારણથી 7 માર્ચ, 2022 નાં રોજ ક્રૂડ ઓઇલ 14 વર્ષના ઉચ્ચ સ્તરે 139.13 પ્રતિ બેરલ પર પહોંચી ગયું હતું.

પુરવઠાના સંકટ વચ્ચે, UAE ના રાજદૂતે જણાવ્યું કે, તેઓ ક્રૂડ ઓઈલના ભાવમાં વધારાને રોકવા માટે ઉત્પાદન વધારવાના પક્ષમાં છે. આ નિવેદન બાદ બ્રેંટ ક્રૂડ 2.53 ડૉલર અથવા 2.28 ટકા ઘટીને 113.67 પ્રતિ બેરલ થઈ ગયું. WTI 1.64 ડૉલર અથવા 1.51% ઘટીને 110.34 ડૉલર પર આવી ગયું.

ભારતને મળશે રાહત

UAE ના ક્રૂડ ઓઈલનું ઉત્પાદન વધારવાના નિર્ણયથી ભારતને વધુ ફાયદો થશે. ભારત પોતાની વપરાશના 85 ટકા ક્રૂડ ઓઈલની આયાત કરે છે. હાલમાં જ ક્રૂડ ઓઈલની કિંમત 139 ડોલર પ્રતિએ પહોંચી ગઈ હતી જેના કારણે દેશમાં પેટ્રોલ-ડીઝલના ભાવમાં મોટો વધારો થવાની શક્યતા છે. એક અંદાજ મુજબ ક્રૂડ ઓઈલના ભાવ વધવા છતાં પેટ્રોલ-ડીઝલની છૂટક કિંમતમાં વધારો ન કરવાના નિર્ણયના કારણે સરકારી ઓઈલ કંપનીઓને નુકસાન થઈ રહ્યું છે.

ઉત્પાદનમાં 8 લાખ બેરલનો વધારો થવાનું અનુમાન

નિષ્ણાંતોનું કહેવું છે કે, UAE તુરંત 8 લાખ બેરલ તેલનું ઉત્પાદન વધારી શકે છે. તેનાથી રશિયા પર લાદવામાં આવેલા પ્રતિબંધોના કારણે પુરવઠાની તંગીના સાતમા ભાગની ભરપાઈ થઇ શકશે. આગામી સમયમાં ઈરાન તરફથી પુરવઠો પણ વધવાનું અનુમાન છે, જેનાથી ક્રૂડ ઓઈલના ભાવ મોરચે વધુ રાહત મળવાનું અનુમાન છે.

માંગ પર નકારાત્મક અસર

ઉત્પાદક દેશોને પણ એવી આશંકા છે કે તેલની કિંમતોમાં ઉછાળાથી માંગ પર તેની નકારાત્મક અસર પડશે. જાણકારોનું કહેવું છે કે, અર્થવ્યવસ્થાઓમાં મોંઘા ક્રૂડથી જો મંદી રહેશે તો ક્રૂડ ઓઈલના ભાવ વધુ ઘટશે. આથી ઓપેક દેશો ઉત્પાદન વધારી શકે છે.