પ્રતિબંધ / દેશની સુરક્ષા માટે ખતરો બની PUBG, CRPF જવાનોને ગેમ ડિલીટ કરવાનો આદેશ

ઓનલાઈન સર્વાઈવલ ગેમ PUBG (પબજી)એ બાળકો અને યુવાનોની જ નહીં પણ નક્સલી મોરચા પર તહેનાત સેન્ટ્રલ રિઝર્વ પોલીસ ફોર્સ (સીઆરપીએફ)ના જવાનોની ઊંઘ પણ હરામ કરી દીધી છે. સીઆરપીએફના જવાનો પબજીના એ હદે વ્યસની થઈ ગયા છે કે તેમણે પોતાના સાથીદારો સાથે વાતચીત પણ બંધ કરી દીધી છે. સંવાદ તૂટી જવાથી નક્સલ વિરોધી અભિયાનમાં ઘણી મુશ્કેલીઓ આવી રહી છે. સતત પબજી રમવાના કારણે જવાનો સરખી રીતે ઊંઘી પણ શકતા નથી અને તેની સીધી અસર તેમના સ્વાસ્થ્ય પર પડી રહી છે.
 

આ કારણે સીઆરપીએફે જવાનોને તેમના મોબાઈલ ફોનમાંથી પબજી ડિલિટ કરવાના આદેશ જારી કર્યા છે. સીઆરપીએફની બિહાર રેન્જે તમામ ડીઆઈજીને પત્ર લખીને જવાનોના મોબાઈલ ફોનમાંથી પબજી હટાવવાનું ફરમાન જારી કર્યું છે. ટૂંક સમયમાં છત્તીસગઢ રેન્જમાં પણ સીઆરપીએફના જવાનો પર પબજી રમવા પર પ્રતિબંધ મૂકવામાં આવશે. સીઆરપીએફના ટોચના અધિકારીઓના જણાવ્યા અનુસાર, ઓનલાઈન ગેમ પબજીના કારણે જવાનોની ઊંઘ પર માઠી અસર જોવા મળી છે. તેઓ હવે તેમના સાથીઓ સાથે વાતચીત પણ કરતા નથી.
 

નક્સલ વિરોધી અભિયાનમાં કો.ઓર્ડિનેશન અને સંવાદ ખૂબ મજબૂત હોય તે જરૂરી છે. આ સ્થિતિ જવાનો માટે ખૂબ ચિંતાજનક છે. આ કારણે પાંચ દિવસ પહેલા બિહાર રેન્જમાં તહેનાત સીઆરપીએફના તમામ ડીઆઈજીને આદેશ આપવામાં આવ્યા હતા કે, તમામ જવાનોના મોબાઈલ ફોનમાંથી પબજી ડિલિટ કરી દેવામાં આવે. સીઆરપીએફના એડીજી કુલદીપસિંહે જણાવ્યું કે, કેન્દ્રિય સ્તરે હજુ સુધી આવા કોઈ આદેશ આપવામાં આવ્યા નથી, પરંતુ બિહાર રેન્જમાં આ પ્રયોગ કરવામાં આવ્યો છે.

 

છત્તીસગઢના નક્સલ પ્રભાવિત વિસ્તારોમાં તહેનાત જવાનોમાં પણ પબજીની અસર જોવા મળી છે. આ વિસ્તારોમાં સીઆરપીએફના જવાનો સર્ચિંગ દરમિયાન ત્રણથી પાંચ દિવસ સુધી ગાઢ જંગલોમાં તહેનાત રહે છે. આ દરમિયાન તેઓ સોશિયલ મીડિયા પર સક્રિય રહી શકતા નથી. જ્યારે તે કેમ્પમાં પરત ફરે છે ત્યારે તેઓ પબજી રમીને સમય પસાર કરતા હોવાની વાત સામે આવી છે. આ કારણે હવે છત્તીસગઢ રેન્જમાં પણ પબજી પર પ્રતિબંધ મૂકવાની તૈયારીઓ ચાલી રહી છે.

છત્તીસગઢના નક્સલ પ્રભાવિત બસ્તર વિસ્તારમાં હાલ સીઆરપીએફના 40 હજારથી વધુ જવાનો તહેનાત છે. સુકમા, બીજાપુર, દંતેવાડા જિલ્લાના અંતરિયાળ વિસ્તારોમાં સીઆરપીએફ છત્તીસગઢ પોલીસ અને એસટીએફ સાથે મળીને સંયુક્ત સર્ચ ઓપરેશન ચલાવી રહ્યું છે. સીઆરપીએફના જવાનો પબજી ગેમના શિકાર બનતા હોવાની ચોંકાવનારી વાત સામે આવ્યા બાદ અધિકારીઓએ તાત્કાલિક ધોરણે પબજી રમવા પર પ્રતિબંધ લાદવાનો નિર્ણય કર્યો હતો.