ભયંકર / સૌરાષ્ટ્રમાં ભયાનક સ્થિતિ : આ જિલ્લામાં 12 કલાકમાં બેડની રાહ જોતાં-જોતાં 7ના મોત

• ગુજરાતમાં કોરોના વાયરસના કારણે પરિસ્થિતિ ભયંકર 
• રાજકોટ, જામનગર, સુરેન્દ્રનગરમાં હોસ્પિટલમાં બેડ ન મળતા એમ્બ્યુલન્સમાં અપાઈ રહી છે સારવાર 
• જામનગરની જી. જી. હોસ્પિટલમાં ઍમ્બ્યુલન્સમાં જ 7ના મોત 

રાજકોટમાં અમદાવાદ જેવી સ્થિતિ !

કોરોનાના કેસ વધતા રાજકોટમાં પણ અમદાવાદ જેવી સ્થિતિ સર્જાઈ છે. સિવિલ હોસ્પિટલની બાજુમાં આવેલા ચૌધરી હાઈસ્કૂલમાં એમ્બ્યુલન્સની લાઈન લગાવવામાં આવી છે અને મજબૂરી એવી છે કે ગ્રાઉન્ડમાં જ અનેક એમ્બ્યુલન્સ દર્દીને દાખલ કરવા માટે લાઈનમાં લાગ્યા છે. રાજકોટ સિવિલમાં એક તરફ બેડની પણ અછત સર્જાઈ છે ત્યારે હવે હોસ્પિટલની બાજુના ગ્રાઉન્ડમાં એમ્બ્યુલન્સમાં જ દર્દીઓને સારવાર અપાઈ રહી છે. સુવિધાના અભાવે દર્દીઓના સગા જ બોટલ લઈને હાથમાં ઉભા રહેવા મજબૂર થયા છે અને પરિવારજનોએ કોરોનાથી સંક્રમિત દર્દીઓ સાથે સેવામાં હાજર રહેવું પડે છે. 

જી.જી. હોસ્પિટલમાં એમ્બ્યુલન્સમાં દર્દીઓના મૃત્યુ

જામનગરમાં કોરોનાના કેસમાં સતત વધારો થતા હોસ્પિટલમાં બેડ ફૂલ થયા છે. ત્યારે હવે જી.જી. હોસ્પિટલ બહાર જ દર્દીઓને સારવાર આપવામાં આવી રહી છે. ગુજરાત મોડલના દાવા વચ્ચે રાજ્યના જામનગરમાં હાલત એવી છે કે હોસ્પિટલ બહાર પૂરતી સારવાર ન થતા દર્દીઓ જીવ ગુમાવી રહ્યા છે. 108ના સ્ટાફના અધિકારીઓ હોસ્પિટલની બહાર દર્દીઓની સારવાર કરી રહ્યા છે અને બેડ ખાલી ન હોવાથી દર્દીઓનું એમ્બ્યુલેન્સમાં જ મૃત્યુ થઈ રહ્યું છે. જી.જી.હોસ્પિટલ બહાર છેલ્લા 12 કલાકમાં 7 દર્દીઓના સારવાર ન મળવાના કારણે મૃત્યુ થયા છે. 

ઓક્સિજન સિલિન્ડર પર્યાપ્ત ના હોવાથી તંત્ર લાચાર

ગુજરાતના જુદા જુદા શહેરોમાં આ જ પરિસ્થિતિ છે. સુરેન્દ્રનગરમાં પણ પરિસ્થિતિ વધારે ખરાબ થઈ રહી છે. સુરેન્દ્રનગરની ગાંધી હોસ્પિટલમાં કોરો વાયરસના દર્દીઓ સાથે એમ્બ્યુલન્સની લાંબી લાઈનો લાગી છે. કેટલાક દર્દીઓને આઇસોલેશન વોર્ડમાં નીચે સુવડાવી સારવાર આપવામાં આવી રહી છે અને ઓક્સિજન સિલિન્ડર પર્યાપ્ત ના હોવાથી તંત્ર લાચાર બન્યું છે. 

ધારપુર હોસ્પિટલમાં 100 દર્દીઓ વેન્ટિલેટર પર

ઉત્તર ગુજરાતના પાટણમાં પણ કોરોના વાયરસના કારણે પરિસ્થિતિ ભયાવહ છે. જિલ્લાની ધારપુર હોસ્પિટલ બહાર એમ્બ્યુલન્સની લાઇન લાગી ગઈ છે જેમાં બેડની  અછતના કારણે દર્દીઓ એમ્બ્યુલન્સમાં જ લઇ રહ્યા છે સારવાર. ધારપુર હોસ્પિટલના તમામ 250 ફૂલ બેડ થઈ ગયા છે જેમાં 100 દર્દીઓ તો વેન્ટિલેટર પર છે.