- મોરબી દુર્ઘટના મામલે ખોટું ટ્વીટ કરવાનો મામલો
- TMC નેતા સાકેત ગોખલેના કોર્ટે રિમાન્ડ કર્યા મંજૂર
- મેટ્રો કોર્ટે 2 દિવસના રિમાન્ડ કર્યા મંજૂર
તૃણમૂલ કોંગ્રેસના રાષ્ટ્રીય પ્રવક્તા અને RTI એક્ટિવિસ્ટ સાકેત ગોખલેની ગુજરાત પોલીસે રાજસ્થાનના જયપુર એરપોર્ટથી ધરપકડ કરી હતી. સાકેત ગોખલેની ધરપકડ બાદ તેમને આજે કોર્ટમાં રજૂ કરવામાં આવ્યા હતા. ત્યારે મોરબી દુર્ઘટના મામલે ખોટું ટ્વીટ કરવા મામલે TMC નેતા સાકેત ગોખલેના મેટ્રો કોર્ટે 2 દિવસના રિમાન્ડ મંજૂર કર્યા છે. કોર્ટે 8 ડિસેમ્બર 12 વાગ્યા સુધીના રિમાન્ડ મંજૂર કર્યા છે.
સાંસદ ડેરેક ઓ બ્રાયને ધરપકડની આપી હતી જાણકારી
TMCના રાજ્યસભાના સાંસદ ડેરેક ઓ બ્રાયને સાકેત ગોખલેની ધરપકડની જાણકારી આપી હતી. સાકેત ગોખલે પર મોરબી ઝુલતા પુલ દુર્ઘટના દરમિયાન વડાપ્રધાન નરેન્દ્ર મોદી વિશે ફેક ન્યૂઝ ફેલાવવાનો આરોપ છે. TMCના રાજ્યસભાના સાંસદ ડેરેક ઓ બ્રાયને કહ્યું હતું કે, સાકેત સોમવારે રાત્રે 9 વાગ્યે નવી દિલ્હીથી ફ્લાઈટ લઈને જયપુર પહોંચ્યો હતો અને ત્યાં ઉતરતાની સાથે જ સાકેતની રાહ જોઈ રહેલી ગુજરાત પોલીસે તેની ધરપકડ કરી હતી. એ પછી મંગળવારે સવારે 2 વાગ્યે એમને તેની માતાને ફોન કરીને પોતાના ધરપકડની જાણ કરી કરતાં લાગ્યું હતું કે તેને અમદાવાદ લઈ જવામાં આવી રહ્યો છે.
ફોન સહિતનો તમામ સામાન જપ્ત કરવામાં આવ્યોઃ બ્રાયન
આ સિવાય તેની ધરપકડ દરમિયાન પોલીસે તેને બે મિનિટનો ફોન કોલ કરવાની મંજૂરી આપી હતી અને એ પછી ફોન સહિતનો તમામ સામાન જપ્ત કરવામાં આવ્યો હતો. આ વિશે વધુ વાત કરતાં બ્રાયને કહ્યું હતું કે, 'મોરબી બ્રિજ દુર્ઘટના અંગે અમદાવાદ સાયબર સેલમાં તેની સામે ખોટો કેસ નોંધવામાં આવ્યો છે અને આ બધું અખિલ ભારતીય તૃણમૂલ કોંગ્રેસ અને વિપક્ષને ચૂપ નહીં કરાવી શકે.' આ સાથે જ તેમણે ભાજપ પર બદલાની રાજનીતિનો આરોપ લગાવ્યો હતો.
સાકેત ગોખલેએ કર્યો હતો આવો દાવો
સાકેત ગોખલેએ 1 ડિસેમ્બરે એક ગુજરાતી અખબારનું કટઆઉટ ટ્વિટર પર પોસ્ટ કર્યું હતું, જેમાં આરટીઆઈના હવાલાથી દાવો કરવામાં આવ્યો કે પીએમ મોદીની મોરબી યાત્રા માટે થોડાક કલાકો માટે 30 કરોડ રૂપિયા ખર્ચ કરવામાં આવ્યા હતા. આને લઇને સાકેત ગોખલે પર કેસ નોંધાયો હતો અને તેના પર ખોટી જાણકારી ફેલાવવાનો આરોપ છે.
