અંતરિક્ષ મિશન / ISROનું 2021નું પ્રથમ મિશન PSLV-C51/Amazonia-1નું કાઉન્ટડાઉન શરૂ, જાણો ક્યારે થશે લોન્ચિંગ

• ઈસરોની યશકલગીમાં ઉમેરાશે વધુ એક પીંછુ
• વર્ષ 2021ના પહેલા અંતરિક્ષ મિશનની તૈયારીઓ
• અમેઝોનિયા-1 મિશન થશે લોન્ચ

આંધ્રપ્રદેશમાં શ્રીહરિકોટાના સતીષ ધવન અંતરિક્ષ કેન્દ્રથી PSLV-C51 અમેઝોનિયા-1 મિશન આવતીકાલે લોન્ચ કરાશે. જેના માટે શનિવારે કાઉન્ટડાઉન શરૂ થઇ ગયું છે.

ઇસરોએ એક નિવેદનમાં જણાવ્યું કે, PSLV-C51, PSLVનું 53મું મિશન છે. આ રૉકેટ દ્વારા PSLVથી બ્રાઝિલના અમેઝોનિયા-1ને લોન્ચ કરાશે. અમેઝોનિયા-1 સાથે અન્ય 18 સેટેલાઈટ પણ સતિશ ધવન સ્પેશ સેન્ટરથી લોન્ચ કરાશે.

ઇસરોના જણાવ્યા અનુસાર, આ રૉકેટને ચેન્નઇથી અંદાજિત 100 કિલોમીટર દૂર શ્રીહરિકોટાથી લોન્ચ કરવામાં આવશે. હવામાનને લઈ કોઈ સમસ્યા ન સર્જાય તો આવતીકાલે સવારે 10 વાગ્યેને 24 મિનિટે લોન્ચિંગ થશે. ઉંધી ગણતરી સવારે 8 વાગ્યાને 54 મિનિટ પર શરૂ થઇ ચૂકી છે. PSLV(પોલર સેટેલાઇટ લૉન્ચ વ્હીકલ) C51/અમેઝોનિયા-1 ઇસરોની NSILનું પ્રથમ ડેડિકેટેડ કોમર્શિયલ મિશન છે.

Countdown for the launch of #PSLVC51/Amazonia-1 mission commenced today at 0854Hrs (IST) from Satish Dhawan Space Centre (SDSC) SHAR, Sriharikota.

Launch is scheduled tomorrow at 1024 Hrs IST. pic.twitter.com/XRx3isDsGm

— ISRO (@isro) February 27, 2021

અમેઝોનિયા-1 અંગેના નિવેદનમાં જણાવ્યું કે, આ ઉપગ્રહ અમેઝન ક્ષેત્રમાં જંગલો કાપણીની દેખરેખ અને બ્રાઝીલના વિસ્તારમાં વિવિધ કૃષિ વિશ્લેષણ માટે ઉપયોગકર્તાઓને રિમોટ સેન્સિંગ આંકડાઓ ઉપલબ્ધ કરાવશે અને હાલના માળખાને મજબૂત બનાવશે.

મહત્વનું છે કે, આ 18 સેટેલાઈટમાં એક નેનોસેટેલાઈટ પર પ્રધાનમંત્રી નરેન્દ્ર મોદીનું નામ અને તસ્વીર પણ અંતરિક્ષમાં મોકલાશે. બ્રાઝિલમાં આવેલા એમેઝોનના જંગલોની સ્થિતિ પર નજર રાખવા પર એમઝોનિયા-1 કામ કરશે.