કાર્યવાહી / HCના આદેશ બાદ રખડતાં ઢોર પકડવા તંત્ર એક્શનમાં: અમદાવાદમાં સવારથી જ પેટ્રોલિંગ, વડોદરામાં પથ્થરમારો

HCના આદેશ બાદ અમદાવાદનું તંત્ર એક્શનમાં
શહેરમાં CNCD વિભાગ ઢોર પકડવા થયું કાર્યરત
વડોદરા શહેરમાં રખડતા પશુઓ અચાનક જ ગુમ

ગુજરાત હાઇકોર્ટે ગઇકાલે બુધવારે કરેલા આદેશ બાદ અમદાવાદનું તંત્ર એક્શનમાં આવ્યું છે. શહેરમાં CNCD વિભાગ ઢોર પકડવા કાર્યરત થયું છે. શહેરમાં અલગ-અલગ ટીમો દ્વારા ઢોર પકડવાની કામગીરી હાથ ધરાઇ રહી છે.

હાઇકોર્ટે તંત્રને કડક આદેશ આપી દીધા છે

ઉલ્લેખનીય છે કે, સમગ્ર રાજ્યમાં રખડતા પશુઓનો ભારે ત્રાસ છે. ત્યારે પશુના કારણે અનેક અકસ્માતો પણ સર્જાય છે ને છતાંય તંત્ર કોઈ જ એક્શન ન હોતુ લેતું. ત્યારે રખડતા ઢોરને લઇને ગુજરાત હાઇકોર્ટે તંત્રને કડક આદેશ આપી દીધા છે. અમદાવાદ મ્યુનિસિપલ કમિશનરને સીધો આદેશ પારિત કરતાં કહ્યું છે કે, રખડતા ઢોર મુદ્દે બે અધિકારીઓની તાત્કાલિક ધોરણે નિમણૂંક કરો. સરકાર દ્વારા લેવાયેલા નિર્ણયના અમલ મામલે પણ ધ્યાન રાખવામાં આવે તેમજ સાથે-સાથે પકડાયેલા ઢોરનું વ્યવસ્થાપન વ્યવસ્થિત થઈ શકે એ માટેનું પણ આયોજન કરવામાં આવે.

અમદાવાદમાં CNCD દ્વારા રોડ પર રખડતાં ઢોરને પકડવાની કામગીરી શરૂ

મહત્વનું છે કે, રાજ્યમાં રખડતાં ઢોરને લઇને ગુજરાત હાઇકોર્ટે તાત્કાલિક ધોરણે કામગીરી કરવાનો આદેશ કર્યો છે. આથી, શહેરમાં CNCD દ્વારા શહેરના રોડ પર રખડતાં ઢોરને પકડવાની કામગીરી હાથ ધરવામાં આવી છે. શહેરના વસ્ત્રાપુર, ઘાટલોડિયા, સેટેલાઇટ, નહેરુનગર અને પાંજરાપોળમાં ટીમનું પેટ્રોલિંગ ચાલી રહ્યું છે. ઉલ્લેખનીય છે કે, સતત 3 દિવસ સુધી ઢોર પકડવા માટેનો હાઈકોર્ટે આદેશ કર્યો છે.

જોકે બીજી બાજુ અમદાવાદના રાણીપમાં હાઇકોર્ટના આદેશ બાદ પણ વિસ્તારમાં રખડતા પશુ જોવા મળ્યા. કોર્ટની ફિટકાર બાદ કોર્પોરેશન રખડતા ઢોરને કાબુમાં લેવા કામે લાગી ગયું છે.
સાથે રોડ ઉપર ઘાસ વેચનાર લારી સામે પણ કાર્યવાહી હાથ ધરવામાં આવી છે.

વડોદરામાં ક્યાંક રખડતા પશુઓ અચાનક ગુમ તો ક્યાંક મહિલાઓ દ્વારા હુમલો કરાયો

બીજી બાજુ વડોદરામાં રખડતા પશુઓ અચાનક જ ગુમ થઇ ગયા હોય તેવાં દ્રશ્યો સર્જાયા છે. રખડતા પશુઓને શોધવા માટે નીકળેલી ઢોરપાર્ટીને શહેરમાં રખડતા પશુ જ નથી મળી રહ્યાં. તો ક્યાંક શહેરના બાપોદ, કપુરાઇ બ્રિજ નજીક તો ઢોર પકડનારી ટીમ પર મહિલાઓએ હુમલો કર્યો છે. પોલીસની હાજરીમાં જ મહિલાઓએ દાંતરડા અને પથ્થર વડે હુમલો કર્યો. હુમલો કરી મહિલાઓએ 2 ઢોરને છોડાવ્યા હતા. આ ઘટનામાં પશુપાલકોએ મહિલાઓને આગળ કરી હુમલો કર્યો હોવાનું જાણવા મળી રહ્યું છે. જોકે કોર્પોરેશને આ મામલે બાપોદ પોલીસ સ્ટેશનમાં ફરિયાદ  નોંધાવી છે. મહત્વનું છે કે, વડોદરામાં પણ રખડતા ઢોરના કારણે છાશવારે અકસ્માત અને મૃત્યુના કિસ્સા બને છે.

ગુજરાત હાઇકોર્ટે રખડતા ઢોરને લઇને શું આદેશ કર્યો છે?

હાઇકોર્ટે AMC પર આકરું વલણ દર્શાવી રખડતાં ઢોર મામલે ગુજરાત સ્ટેટ લીગલ સર્વિસ ઓથોરિટીને પણ રિપોર્ટ તૈયાર કરવા સૂચના આપી છે અને રાત દિવસ 24 કલાક AMCની ઢોર પાર્ટી સતત ત્રણ દિવસ ઢોર પકડવાનુ કરે તેવો આદેશ પણ આપ્યો છે. સાથે જ ટાંક્યું છે કે ઢોરના કારણે કેટલા અકસ્માત થયા કેમ FIR નથી? સર્વે કરીશું તો દર દસ પગલાએ ઢોર જોવા મળશે, રખડતા ઢોર મુદ્દે FIR નોંધવાની શરૂ કરવાનો પણ હાઈકોર્ટે નિર્દેશ કર્યો હતો.

કેબિનેટ બેઠકમાં રખડતાં ઢોરને લઈ લેવાયો છે મોટો નિર્ણય

પ્રવકતા મંત્રી જીતુ વાધાણીએ જણાવ્યું હતું કે, 'રાજ્યના નાગરિકોને રખડતા ઢોરોના ત્રાસથી મુક્તિ અપાવવા માટે રાજ્ય સરકારે મક્કમ નિર્ધાર કર્યો છે. મુખ્યમંત્રી ભૂપેન્દ્ર પટેલના નિર્દેશન હેઠળ રાજ્યના પશુપાલકો, નાગરિકો કે પશુઓ કોઇને તકલીફ ન પડે તે પ્રકારની વ્યવસ્થા ઉભી કરાશે. પશુપાલકો પાસે વ્યવસ્થા ન હોય તો પોતાના પશુ ઢોરવાડામાં મુકી શકશે, જેની સંપૂર્ણ સારસંભાળ રાજ્ય સરકાર રાખશે. એટલુ જ નહિ, ઢોરવાડા સુધી રખડતા ઢોરને પહોંચાડવા માટેના ટ્રાન્સપોર્ટેશનનો ખર્ચ પણ રાજ્ય સરકાર ભોગવશે.'

10 કરોડની અલગથી જોગવાઈ કરાઇ

રાજયની ૦૮ મહાનગરપાલિકાઓ અને ૧૫૬ નગરપાલિકાઓમાં ઢોર વાડા બનાવવામાં આવશે. તે માટે રૂ.૧૦ કરોડની અલગથી જોગવાઈ કરવામાં આવશે અને જરૂર પડે તેમાં વધારો કરવામાં પણ આવશે. પકડેલા ઢોર માટે પાણી, શેડ સહિતની તમામ જરૂરી વ્યવસ્થાઓ ઉપલબ્ધ કરાવવામાં આવશે. ચોમાસા દરમ્યાન પશુપાલકો પાસે પશુઓ રાખવા માટે પુરતી જગ્યા કે અન્ય વ્યવસ્થા ન હોવાને કારણે પશુઓને રોડ ઉપર છોડી દેવામાં આવે છે,જેના પરિણામે પશુઓની સંખ્યા રોડ ઉપર વધુ પ્રમાણમાં જોવા મળે છે. જે બાબત ધ્યાને લઇને જે પશુપાલકો પાસે આવી વ્યવસ્થા ન હોય તે પશુપાલકો સંબંધિત મહાનગરપાલિકા કે નગરપાલિકાના ઢોરવાડામાં પશુઓ મુકી શકે એ માટેની વ્યવસ્થાઓ કરવામાં આવી છે.

પશુઓને ઢોરવાડામાં મુકવા માટે જે ટ્રાન્સપોર્ટેશન ખર્ચ થશે તે મનપા ભોગવશે

આ માટે સંબંધિત મહાનગરપાલિકા/નગરપાલિકાઓને પશુપાલકો ઢોરને ઢોરવાડામાં મુકવા આવે ત્યારે તેને વિના મૂલ્યે રાખવાની સૂચનાઓ આપી દેવાઈ છે.અને પશુઓને પુરતી સગવડો પણ આપવાની રહેશે. પશુપાલકોને પશુઓ સંબંધિત મહાનગરપાલિકા / નગરપાલિકાના ઢોરવાડામાં મુકવા માટે જે ટ્રાન્સપોર્ટેશન અંગે થનાર ખર્ચ હાલ સંબંધિત મહાનગરપાલિકા / નગરપાલિકાએ ભોગવવશે. રાજયની નગરપાલિકા-મહાનગરપાલિકા વિસ્તારોમાં રખડતા ઢોરને શહેરી વિસ્તારમાં પકડવા ખાસ ઝૂંબેશ હાથ ધરવામાં આવી રહી છે.

હાઈકોર્ટે સરકારને પણ કરી હતી આકરી ટકોર

ગુજરાત હાઇકોર્ટે રખડતા પશુને લઈ રાજ્ય સરકાર વિરૂદ્ધ આકરું વલણ અપનાવ્યું હતું. હાઇકોર્ટે રાજ્ય સરકારને તાત્કાલિક પગલાં લેવાનો આદેશ આપ્યો હતો. હાઇકોર્ટે કહ્યું હતું કે, 'સાંજ સુધીમાં પગલા લો નહીં તો કોર્ટે આકરો હુકમ કરવો પડશે. રખડતા પશુના કારણે કોઈનો જીવ ન જવો જઈએ'. જે બાદ કેબિનેટ બેઠકમાં પશુપાલકોની મનમાની સામે સરકારે નાગરિકોના હિતમાં કેટલાક નિર્ણય લીધા હતા.