કોરોના વાયરસ મહામારી મહિનાઓથી તાંડવ મચાવી રહી છે અને આજે પણ લાખો કેસ સામે આવી રહ્યા છે ત્યારે આ વાયરસનો પહેલો કેસ આવ્યો તેને એક વર્ષ પૂર્ણ થઇ રહ્યું છે.
કોરોના વાયરસનો પહેલો કેસ હુબેઈમાં આવ્યો હતો
જોકે ચીન હંમેશાથી ડિસેમ્બરમાં જ પહેલો કેસ આવ્યો તેવું કહે છે
કોરોના વાયરસના કારણે લાખોએ ગુમાવ્યા જીવ, હજારો કરોડનું થયું નુકસાન
કોરોનાને એક વર્ષ પૂર્ણ
કોરોના વાયરસના કારણે એક વર્ષથી સમગ્ર વિશ્વમાં ત્રાહિમામ મચી ગયો છે. ત્યારે આજના દિવસે જ ગતવર્ષે કોરોના વાયરસનો પહેલો કેસ આજના દિવસે જ પહેલો કેસ સામે આવ્યો હતો અને જે બાદ આ બીમારી મહામારીમાં પરિણમી અને દુનિયામાં તબાહી મચાવી. 17 નવેમ્બરના દિવસે ચીનના હુબેઈમાં કોરોના વાયરસનો પહેલો કેસ સામે આવ્યો હતો. જોકે ચીને કોરોના વાયરસને લઈને આધિકારિક જાહેરાત ડિસેમ્બર મહિનામાં કરી હતી.
કઈ રીતે શરુ થઇ હતી બીમારી
ચીની સરકારના એક અપ્રાકાશિત રિપોર્ટ અનુસાર 17 નવેમ્બરના રોજ ગયા વર્ષે કોરોના વાયરસ મહામારીનો પહેલો કેસ સામે આવ્યો હતો. જે વ્યક્તિ સૌથી પહેલા આ બીમારીની ઝપેટમાં આવ્યો તેની ઉંમર 55 વર્ષની હતી અને તે બાદ નવેમ્બર મહિનામાં ચાર પુરુષ અને પાંચ મહિલાઓ કોરોનાથી સંક્રમિત થયા.
જોકે ચીને આ વાત સ્વીકારી નથી, સાઉથ ચાઈના મોર્નિંગ પોસ્ટમાં પણ અહેવાલ સામે આવ્યો હતો કે ચીનમાં નવેમ્બર મહિનામાં જ પહેલો કેસ સામે આવ્યો હતો પરંતુ ચીને અત્યાર સુધી કોરોના વાયરસનો પહેલો કેસ 8મી ડિસેમ્બરે દર્શાવ્યો છે.
વર્લ્ડોમીટરના આંકડાઓ અનુસાર આ મહામારી એટલી તબાહી મચાવી છે કે અત્યાર સુધી 55,446,791 કુલ કેસ સામે આવ્યા છે જયારે 1,334,297 દર્દીઓએ આ મહામારીના કારણે જીવ ગુમાવ્યો છે.
નોંધનીય છે કોરોના વાયરસ મહામારી પર વિવિધ સંસ્થાઓ દ્વારા ઢગલાબંધ અહેવાલો આપવામાં આવ્યા હતા. અમેરિકાની કેટલીક સંસ્થાએ એમ પણ દાવો કર્યો હતો કે કોરોના વાયરસને લેબમાં બનાવવામાં આવ્યો છે. વુહાન લેબને લઈને પણ વિવિધ થીયરીઓ સામે આવી હતી. જોકે આ બધા જ દાવાઓ પર કોઈ પુષ્ટિ થઇ શકી નહીં.
કોરોના વાયરસ મહામારી એટલી બધી ફેલાઈએ અત્યાર સુધી વિશ્વનાં લાખો લોકોએ જીવ ગુમાવ્યો અને લાખોએ મહામારી સામે લડવું પડ્યું. કોરોના વાયરસનો એવો ખૌફ ફેલાયો કે આખેઆખા દેશને બંધ કરી દેવા પડ્યા, અર્થતંત્રને ફટકો પડ્યો. એવામાં હવે આખું વિશ્વ આ બીમારીની વેક્સિન આવે તે આશાથી રાહ જોઇને બેઠું છે કે રસીથી કંઈક રાહત મળી શકે.