ગુજરાતમાં અમદાવાદમાં આનંદનગરની જે યુવતી સૌથી પહેલી કોરોનામાં સપડાઈ હતી તે યુવતીને આજે રજા આપી દેવામાં આવી છે. ગુજરાતમાં કોરોના સંકટ વધુને વધુ ઘેરૂ બની રહ્યુ છે. 17મી માર્ચથી કોરોનાએ ગુજરાતમાં દસ્તક દીધા હતા ત્યારથી લઈને અત્યાર સુધી તેનું વિકરાળ સ્વરૂપ બહાર આવ્યુ છે. ત્યારે અમદાવાદની પહેલી યુવતી આખરે કોરોના સાથેનો સંઘર્ષ જીતી ગઈ છે.
અમદાવાદમાં નોંધાયેલા પ્રથમ પોઝિટિવ કેસનો મામલો
21 વર્ષીય યુવતી નિયોમી શાહને હોસ્પિટલમાંથી મળી રજા
કોરોનાની સામે 33 દિવસથી જંગ લડી રહી હતી યુવતી
અમદાવાદમાં પ્રથમ કોરોના પોઝિટિવ આવેલી યુવતીને રજા આપવામાં આવી છે. કોરોનાની પહેલી પોઝિટિવ આવેલી 21 વર્ષીય નિયોમી શાહને આખરે 33 દિવસ પછી SVP હોસ્પિટલમાંથી ડિસ્ચાર્જ કરવામાં આવી છે. કોરોનાની સામે 33 દિવસથી નિયોમી શાહ જંગ લડી રહી હતી. સેટેલાઈટમાં રહેતી અને ન્યૂયોર્કથી આવેલી શહેરની પહેલી પોઝિટિવ 21 વર્ષીય યુવતી 31 દિવસેય પણ એસવીપીમાં સારવાર લઈ રહી હતી.
શુક્રવારના રિપોર્ટમાં આવી કોરોના નેગેટિવ
નિયોમી પછી દાખલ થયેલા દર્દીઓ પણ રિકવર થઇ ગયા હતા. પરંતુ તેને કોરોનાના લક્ષણો દૂર થઇ ગયા પછી પણ તેના ટેસ્ટનું પરિણામ પોઝિટિવ આવતું હોવાથી રજા આપવામાં આવી ન હતી. અંતે શુક્રવારે કરેલા રિપોર્ટનું પરિણામ નેગેટિવ આવતા તેને રજા આપવામાં આવી છે. નિયોમી શાહે જણાવ્યું કે કોરોનાથી ગભરાવવાની જરૂર નથી. કોરોનાની ગાઇડલાઇનનું પાલન કરી પોતાનું ધ્યાન રાખે તે ખુબ જરૂરી છે. સાથે જ લોકોને ઘરમાં રહેવા અપીલ કરી છે.
કુલ 10 ટેસ્ટ કરાયા
અત્યારસુધી 10 ટેસ્ટમાં 3 વાર રિપોર્ટ નેગેટિવ, એક વાર પ્રોપર પરિણામ ન આવ્યું, બાકી 6 વખત પોઝિટિવ આવ્યો હતો. ગુરુવારે કરેલો રિપોર્ટ નેગેટિવ આવતા એકાદ-બે દિવસમાં તેને રજા મળી શકે.
અત્યાર સુધી કરાયેલા 10 ટેસ્ટ વિગતો
18 માર્ચના રોજ પહેલો ટેસ્ટ કોરોના પોઝિટિવ આવ્યો હતો. ત્યાર બાદ 23 માર્ચના રોજ ફરીથી રિપોર્ટ કરાયો જે પણ પોઝિટિવ આવ્યો હતો. 27 માર્ચના રોજ ફરીથી રિપોર્ટ કરતા તે નેગેટિવ આવ્યો હતો. પણ 29 માર્ચના ફરીથી કોરોના રિપોર્ટ પોઝિટિવ આવ્યો હતો. 3 એપ્રિલના રોજ ફરીથી રિપોર્ટ થયો જે પોઝિટિવ આવ્યો. 7 એપ્રિલના પણ રિપોર્ટ પોઝિટિવ આવ્યો. 12 એપ્રિલના પ્રોપર રિપોર્ટ ન આવ્યો. 13 એપ્રિલ ફરીથી કોરોના રિપોર્ટ પોઝિટિવ આવ્યો અને 16 એપ્રિલ ફરીથી નેગેટિવ આવ્યો છે. 16 એપ્રિલનો રિપોર્ટ નેગેટિવ આવતા તેને રજા આપવામાં આવી છે.