ભારે કરી / લાલિયાવાડી: અમિત શાહ, પીયુષ ગોયલ, ઓમ બિરલાના નામ પર લગાવી દીધી વેક્સિન, સંડે-મંડે સિંહને પણ આપ્યા ડોઝ

• ઉત્તર પ્રદેશમાંથી વિચિત્ર કિસ્સો સામે આવ્યો છે
• અહીં તંત્રની ઘોર બેદરકારી સામે આવી છે
• કેન્દ્રીય મંત્રીઓના નામ પર વેક્સિન આપી દીધી, સર્ટિફિકેટ પણ જાહેર કરી દીધા

ઉત્તર પ્રદેશના ઈટાવામાં મૃત્યુ પામેલા અને કેન્દ્રીય મંત્રીઓના નામ પર કોરોના વેક્સિન લગાવાનો કિસ્સો સામે આવ્યો છે. એટલુ જ નહીં તેમના નામના સર્ટિફિકેટ પણ આપી દેવામાં આવ્યા છે. કોરોનાથી બચાવ માટે વેક્સિન અભિયન અંતર્ગત લાલિયાવાડી ચાલી રહી છે. તાજેતરનો કિસ્સો ઈટાવાના તાખા બ્લોકના સીએચસી હોસ્પિટલ સરસઈ નાવરનો છે. અહીં કેન્દ્રીય મંત્રીઓના નામ પર નકલી વેક્સિનેશન કરવામાં આવ્યા છે. એટલુ જ નહીં અન્ય પણ કેટલાય નકલી નામો પર રસીના સર્ટિફિકેટ વહેંચી દેવામાં આવ્યા છે. ચોંકાવનારી બાબત એ છે કે, દિવસના નામ પર વેક્સિનેશન કરી દેવામાં આવ્યું છે. 

હકીકતમાં જોઈએ તો, કોવિડ 19 વેક્સિનેશનના નામ પર અહીં લાલિયાવાડી ચાલી રહી છે. જિલ્લાના તાખા બ્લોકના સરસરઈનાવર સ્થિત સામુહિક આરોગ્ય કેન્દ્ર પર કેન્દ્રીય ગૃહમંત્રી અમિત શાહ, લોકસભા અધ્યક્ષ ઓમ બિરલા, ઊર્જા મંત્રી પિયુષ ગોયલ સહિત દેશના કેટલાય રાજનેતાઓના નામ પર વેક્સિન લગાવી દીધી છે. તેનો ડેટા પણ કોવિડ પોર્ટલ પર અપડેટ કરી દેવામાં આવ્યો છે. રીતસરના વેક્સિન સર્ટિફિકેટ પણ કાઢવામાં આવ્યા છે. જો કે તેમા નામના સ્પેલિંગ અને ઉંમર ખોટી લખેલી છે. આ લાલિયાવાડી ટાર્ગેટ પુરો કરવા તરફ ઈશારો કરે છે. 

સંડે-મંડે સિંહ પણ લગાવી ચુક્યા છે વેક્સિન

એટલું જ નહીં ફ્રાયડે, સંડે સિંહ, મંડે સિંહ જેવા નામને પણ વેક્સિન આપી દીધી છે. જ્યારે આ પ્રકારના ધાંધિયા સામે આવ્યા તો, સીએચસી પ્રભારીએ આઈડી હૈક થયું હોવાનો દાવો કરતા આ પ્રકારના નામો પોર્ટલ પરથી હટાવવા માટે પત્ર લખ્યો હતો. આ અગાઉ જિલ્લામાં વેક્સિનના બીજા ડોઝ લગાવ્યા વિના જ મોબાઈલ ફોન પર મેસેજ આવતા હોવાનું પણ સામે આવી ચુક્યું છે. 

નીતિન ગડકરીને આગળની ડેટ પણ આપી દીધી

સીએચસી સરસઈનાવરમાં પ્રભારી ડો. ઉદય પ્રતાપ સિંહના આઈડી પર દિગ્ગજ હસ્તીઓને વેક્સિન લગાવી દેવામાં આવી છે. સર્ટિફિકેટમાં મંઁત્રીઓના વોટર આઈડી પર વેક્સિનેશન બતાવામાં આવ્યું છે. રોડ પરિવહન મંત્રી નીતિન ગડકરી સહિત અમુક મંત્રીઓને પ્રથમ ડોઝ લગાવ્યા બાદ બીજા ડોઝ માટે છ માર્ચની તારીખ પણ આપી દેવામાં આવી છે. નાણામંત્રી નિર્મલા સીતારમણ, મહિલા અને બાળ વિકાસ મંત્રી સ્મૃતિ ઈરાનીને પણ ડોઝ લગાવી દેવામાં આવ્યો છે. 

આઈડી અને પાસવર્ડ હેક થયું હોવાનો દાવો

જો કે, આ લોકોના નામ પુરેપુરા લખવામાં આવ્યા નથી. તો વળી સીએચસી પ્રભારીનું કહેવુ છે કે, 12 ડિસેમ્બરના રોજ તેમનું આઈડી અને પાસવર્ડ કોઈએ હેક કરી લીધો હતો. જેનાથી બ્લોક મોનિટરીંગ થાય છે. આ આઈડી પર વેક્સિનેશન કામ થતા નથી.