મુંબઈમાં છેલ્લા 24 કલાકમાં કોરોનાના 3671 કેસ નોંધાયા છે, જોકે એકપણ દર્દીનું મોત થયું નથી. મુંબઈમાં હજુ 4 એક્ટિવ કન્ટેનમેન્ટ ઝોન છે. જ્યારે 88 બિલ્ડિંગ સીલ્ડ છે. આ પહેલા બુધવારે 2510 કેસ સામે આવ્યા હતા.
ભારતમાં કોરોનાના નવા કેસમાં ઉછાળો જોવા મળી રહ્યા છે, જેમાં સૌથી વધુ કેસ મહારાષ્ટ્રમાં સામે આવી રહ્યા છે. મુંબઈમાં કોરોનાના 3671 કેસ સામે આવ્યા. આ દરમિયાન 371 લોકો સાજા થયા. મુંબઈમાં 11360 એક્ટિવ કેસ થઇ ગયા છે. કુલ કેસોમાં ધારાવીમાં 20 કેસ મળ્યા. આ 18 મે સૌથી વધુ કેસ છે.
કેરળમાં 2423 કેસ નોંધાયા
ત્યારે, કેરળમાં છેલ્લા 24 કલાકમાં કોરોનાના 2423 કેસ સામે આવ્યા છે. જોકે, 2879 લોકો સાજા થયા. જ્યારે 15 લોકોના મૃત્યુ થયા. રાજ્યમાં અત્યાર સુધીમાં 47,441 લોકો કોરોનાથી પોતાનો જીવ ગુમાવી ચૂક્યા છે. ત્યારે 19,835 એક્ટિવ કેસ છે.
બંગાળમાં કોરોનાના 2128 કેસ નોંધાયા
પશ્ચિમ બંગાળમાં ગુરૂવારે કોરોનાના 2128 કેસ નોંધાયા. આ દરમિયાન 1067 લોકો સાજા થયા. ત્યારે 12 લોકોના કોરોનાથી મોત થયા. રાજ્યમાં હજુ 8776 એક્ટિવ કેસ છે. બંગાળમાં અત્યાર સુધી કોરોનાથી 19757ના મોત થઇ ચૂક્યા છે.
રાજ્યમાં કોરોનાની ત્રીજી લહેરની દહેશત વચ્ચે સતત કોરોનાના કેસ વધી રહ્યા છે. છેલ્લા 24 કલાકમાં રાજ્યમાં 571 કેસ સામે આવતા ચિંતાનું મોજું ફરી વળ્યું છે, એક્ટિવ કેસની સંખ્યા 2371 સુધી પહોંચી ગઈ છે. 102 દર્દી સાજા થયા છે. રાહતના સમાચાર એ છે કે આજે કોઈ પણ કેસ ઑમિક્રૉનનો નોંધાયો નથી. અમદાવાદ શહેરમાં 269 અને ગ્રામ્યમાં 9 કેસ, સુરત શહેરમાં 74 અને ગ્રામ્યમાં 4 કેસ, વડોદરા શહેરમાં 41 અને ગ્રામ્યમાં 9 કેસ નોંધાયા છે. ત્યારે આ ત્રણેય જિલ્લામાં સૌથી વધુ કેસ નોંધાઇ રહ્યા છે.
દેશમાં ઓમિક્રોનના 961 કેસ
ભારતમાં અત્યાર સુધીમાં ઓમિક્રોનના 961 કેસ સામે આવી ચૂક્યા છે. જેમાં 320 દર્દી સાજા થઇ ચૂક્યા છે. ઓમિક્રોનથી સૌથી વધુ કેસ દિલ્હીમાં સામે આવ્યા છે. કોરોનાના આ નવા સ્વરૂપથી દિલ્હી સૌથી અસરગ્રસ્ત છે. આંકડા જણાવે છે કે, ભારતના ઓછામાં ઓછા 8 રાજ્યોના કેટલાક શહેરોમાં કોરોના વાયરસ સંક્રમિતોનો આંકડો બેગણો થઇ રહ્યો છે. જેમાં હરિયાણા, દિલ્હી, ગુજરાત, ઝારખંડ, તામિલનાડુ, પશ્ચિમ બંગાળ, કર્ણાટક અને મહારાષ્ટ્રનું નામ સામેલ છે.
સ્વાસ્થ્ય મંત્રાલયે કહ્યું કે, દેશમાં કોરોનાના 82,402 એક્ટિવ કેસ, 33 દિવસ બાદ એક દિવસમાં 10 હજારથી વધુ કોરોનાના કેસ નોંધાયા છે. કેન્દ્રીય સ્વાસ્થ્ય મંત્રાલયે ગુરૂવારે જણાવ્યું કે, દિલ્હીમાં ઓમિક્રોનના સૌથી વધુ 263 કેસ સામે આવ્યા અને ત્યારબાદ મહારાષ્ટ્રમાં 252, ગુજરાતમાં 97, રાજસ્થાનમાં 69, કેરળમાં 65 અને તેલંગાણામાં 62 કેસ નોંધાયા છે.