કોરોના અપડેટ / ભારતમાં કોરોના કેસમાં સતત ઉછાળા બાદ આજે થોડા રાહતના સમાચાર, દૈનિક કેસમાં જુઓ કેટલો ઘટાડો નોંધાયો

• દેશમાં છેલ્લાં 24 કલાકમાં કોરોનાના નવા 2568 કેસ
• છેલ્લાં 24 કલાકમાં કોરોનાથી 20 લોકોનાં મોત નિપજ્યાં
• દેશમાં સૌથી વધુ કોરોનાના દર્દીઓ માત્ર (1076) દિલ્હીમાં

આરોગ્ય મંત્રાલયના જણાવ્યાં અનુસાર, દેશમાં છેલ્લાં 24 કલાકમાં કોરોનાના નવા 2,568 કેસ જોવા મળ્યા છે, જ્યારે કોરોનાના કારણે વધુ 20 લોકોએ જીવ ગુમાવ્યો છે. તાજેતરના આંકડા વિશે જો વાત કરીએ તો, દેશમાં સૌથી વધુ કોરોનાના દર્દીઓ દિલ્હીમાં (1076), હરિયાણામાં (439), કેરલમાં (250), ઉત્તર પ્રદેશમાં (193) અને કર્ણાટક (111) માંથી મળી આવ્યા છે.

80.58 ટકામાંથી 41.9% કેસ માત્ર દિલ્હીમાં

નવા કોરોનાના કેસમાંથી 80.58 ટકા તો આ પાંચ રાજ્યોમાંથી આવ્યા છે. માત્ર દિલ્હીમાં જ 41.9% કેસ નોંધાયા છે. દેશમાં છેલ્લાં 24 કલાકમાં કોરોનાના કારણે 20 લોકોના મોત થયા છે ત્યારે દેશમાં અત્યાર સુધીમાં કોરોનાના કારણે 5,23,889 લોકો જીવ ગુમાવી ચૂક્યાં છે.

દેશમાં હાલ એક્ટિવ કેસની કુલ સંખ્યા 19 હજારને પાર

આ સાથે, દેશમાં કોવિડ સંક્રમિતોની કુલ સંખ્યા હવે વધીને 4 કરોડ, 30 લાખ, 84 હજાર 913 થઈ ગઈ છે. કેન્દ્રીય સ્વાસ્થ્ય મંત્રાલયના આંકડા અનુસાર, દેશમાં હાલ એક્ટિવ કેસની કુલ સંખ્યા 19 હજારને પાર થઇ ગઈ છે. હાલ દેશમાં 19,137 એક્ટિવ કેસ નોંધાયા છે. એક્ટિવ કેસ કુલ સંક્રમણના 0.05 ટકા થઈ ગયા છે. હાલમાં દેશમાં રિકવરી રેટ 98.74 ટકા નોંધાયો છે. છેલ્લાં 24 કલાકમાં દેશભરમાં કુલ 2,911 દર્દીઓ સ્વસ્થ થયા છે. દેશમાં અત્યાર સુધીમાં કુલ 4 કરોડ, 25 લાખ, 41 હજાર, 887 લોકો આ મહામારીને માત આપી ચૂક્યાં છે.

દેશમાં અત્યાર સુધીમાં કુલ 189.41 કરોડ વેક્સિનના ડોઝ આપવામાં આવ્યા

મંત્રાલયના જણાવ્યાં અનુસાર, રાષ્ટ્રીય વેક્સિનેશન અભિયાન હેઠળ, દેશમાં અત્યાર સુધીમાં કુલ 189.41 કરોડ વેક્સિનના ડોઝ આપવામાં આવ્યા છે. દેશમાં છેલ્લાં 24 કલાકમાં વેક્સિનના કુલ 16,23,795 ડોઝ આપવામાં આવ્યા.