Gujarat Elections 2022 / 'કોંગ્રેસ-NCPનું ગઠબંધન થશે તો હારશે' : કોંગ્રેસના દિગ્ગજ નેતાના નિવેદનથી ભડકો

• વિધાનસભા ચૂંટણી પહેલા પોરબંદર કોંગ્રેસમાં ભડકો  
• કોંગ્રેસ અને NCPના ગઠબંધન સામે વિરોધ 
• કોંગ્રેસ-NCPનું ગઠબંધન થશે તો કોંગ્રેસ હારશેઃ નાથા ઓડેદરા 

વિધાનસભાની ચૂંટણી પૂર્વે પોરબંદર કોંગ્રેસમાં વિવાદ સર્જાયો છે. ગઈકાલે પોરબંદર બેઠક પર સેન્સ પ્રક્રિયા હાથ ધરાઈ હતી. તે દરમિયાન કુતિયાણા બેઠક પર કોંગ્રેસ અને NCPના ગઠબંધનની વાત સામે આવતા કોંગ્રેસના પૂર્વ જિલ્લા પ્રમુખ નારાજ થયા છે. આજ રોજ પૂર્વ જિલ્લા પ્રમુખ નાથા ઓડેદરાએ પત્રકાર પરિષદ યોજી એવું જણાવ્યું હતું કે, કોંગેસ અને એન.સી.પી. નું ગઠબંધન કોઈ કાળે નહીં થવા દઈએ. જો ગઠબંધન થશે તો કોંગ્રેસ પોરબંદર કુતિયાણા સહિત 7 બેઠક ગુમાવશે. 

પોરબંદરમાં વિરોધનો સૂર ઉઠ્યો 

નાથા ઓડેદરા કુતિયાણા બેઠક ઉપરથી ચૂંટણી લડવા માટે ઇચ્છુક છે અને છેલ્લા 3 માસથી તેઓ કુતિયાણા વિધાનસભા વિસ્તારના ગામડાઓનો પ્રવાસ કરી રહ્યા છે. જો કોંગ્રેસ અને એન.સી.પી. નું ગઠબંધન થશે તો તેઓ ગાંધી ભૂમિ પોરબંદરથી અમદાવાદ ગાંધી ભવન સુધી પદયાત્રા કરશે અને જો કુતિયાણા વિધાનસભા બેઠક ઉપરથી ટિકિટ નહીં મળે તો આગામી દિવસોમાં તેઓ પોતાનું સ્ટેન્ડ નક્કી કરશે. હાલ તો એન.સી.પી અને કોંગ્રેસના ગઠબંધનથી પોરબંદરમાં વિરોધનો સૂર ઉઠ્યો છે.

નાથા ઓડેદરા લડવા માંગે છે ચૂંટણી 
 
આપને જણાવી દઈએ કે, પોરબંદર જિલ્લા કોંગ્રેસના પૂર્વ પ્રમુખ નાથા ઓડેદરાએ પોતાના પ્રમુખના કાર્યકાળ દરમિયાન અનેક લોકોની મદદ કરી હતી. તેમજ કોરોના કાળમાં પણ તેમની કામગીરી પ્રસંસનીય રહી છે અને કુતિયાણા બેઠક ઉપરથી તેઓ ચૂંટણી લડવા માટે તૈયારી કરી રહ્યા છે. જો એન.સી.પી. અને કોંગ્રેસ નું ગઠબંધન થાય તો તેમને ટિકિટ મળવી મુશ્કેલ બનશે તેવી સ્થાનિક રાજકારણમાં ચર્ચા જોવા મળી રહી છે.