જેમ-જેમ વિધાનસભાની ચૂંટણી નજીક આવી રહી છે તેમ-તેમ ગુજરાતમાં રાજકીય હલચલ પણ વધી ગઇ છે. કોઇ પણ પક્ષ પોતાની મેળે કસર છોડવા નથી માંગતો.
કોંગ્રેસના OBC અને લઘુમતિ આગેવાનોની આજે બેઠક
બંન્ને સમુદાયની સ્થિતિ અંગે આ બેઠકમાં ચર્ચા કરાશે
OBC મતદારોને કોંગ્રેસ સાથે જોડવા બેઠકમાં થશે ચર્ચા
ગુજરાતમાં વિધાનસભાની ચૂંટણી હજુ તો આવી નથી એ પહેલાં તમામ રાજકીય પક્ષોના દિગ્ગજ નેતાઓના પણ ગુજરાતમાં ધામા વધી ગયા છે. એવામાં ગુજરાત કોંગ્રેસમાં બેઠકોનો દોર યથાવત જોવા મળી રહ્યો છે. જેના અનુસંધાને આજે OBC અને માઈનોરિટી આગેવાનોની બેઠક મળશે.
બેઠકમાં OBC મતદારોને કોંગ્રેસ સાથે જોડવા અંગે ચર્ચા થશે
પ્રભારી રઘુ શર્મા અને પ્રમુખ જગદીશ ઠાકોરની અધ્યક્ષતામાં આજે આ બેઠક મળશે. રાજ્યની પરિસ્થિતિ અને બંન્ને સમુદાયની સ્થિતિ અંગે આ બેઠકમાં ચર્ચા થશે. તેમજ કોંગ્રેસથી વિમુખ થયેલા OBC મતદારોને કોંગ્રેસ સાથે જોડવા અંગેની પણ બેઠકમાં ચર્ચા થશે. લઘુમતી સમાજના મતોનું ધ્રુવીકરણ ન થાય તે માટે બેઠકમાં ચર્ચા કરાશે. બપોરના 12 વાગ્યાથી આગેવાનો સાથે બેઠકોની શરૂઆત થશે.
4 વાગ્યે અમદાવાદ શહેર કોંગ્રેસના આગેવાનોની એક બેઠક યોજાશે
જ્યારે સાંજના 4 વાગ્યે અમદાવાદ શહેર કોંગ્રેસના આગેવાનોની એક બેઠક યોજાશે. 2જી ઓગસ્ટે અમદાવાદમાં થનારા ધરણા અંગે બેઠકમાં ચર્ચા કરાશે. એ સિવાય 2જી ઓગસ્ટના રોજ બોટાદ લઠ્ઠાકાંડના વિરોધમાં કોંગ્રેસ વિરોધ પ્રદર્શન પણ કરશે.
બીજી તરફ ભાજપ દ્વારા આંતરિક મૂલ્યાંકન પણ શરૂ કરી દેવાયું
બીજી બાજુ ગુજરાત વિધાનસભાની ચૂંટણીને લઇને તમામ રાજકીય પાર્ટીઓ કામે લાગી ગઇ છે. ત્યારે એક તરફ પ્રજાને રિઝવવા માટે વિકાસના કાર્યોનું લોકાર્પણ અને ભેટ આપવામાં આવી રહી છે તો બીજી તરફ પક્ષ દ્વારા આંતરિક મૂલ્યાંકન પણ શરૂ કરી દેવામાં આવ્યું છે. વિધાનસભા 2022ની ચૂંટણી પહેલા ભાજપે કવાયત હાથ ધરી છે. આ વખતે ભાજપ ટિકિટ આપવામાં કેવી થિયરી અપનાવશે, કોને રિપીટ નહીં કરે અને કયા આધારે ટિકિટની ફાળવણી કરવી તે તમામને લઇને ભાજપ દ્વારા આંતરિક મૂલ્યાંકન શરૂ કરવામાં આવ્યું છે.
નવા-યુવા ચહેરાઓને સ્થાન મળી શકે છે
બીજી બાજુ ભાજપના કેટલાંક ધારાસભ્યો સામે 'નો રિપીટ'નું જોખમ તોળાઇ રહ્યું છે. કારણ કે આ વખતે ભાજપ નવા અને યુવા ચહેરાઓને વધુ સ્થાન આપે તેવી શક્યતા છે.ઉમેદવારોની નો રિપીટ થિયરીમાં પર્ફોમન્સને અગ્રિમતા આપવામાં આવશે. ધારાસભ્યોની 60 વર્ષથી વધારે ઉંમરને પણ ધ્યાનમાં લેવાય તેવી શક્યતા છે. કેટલાક સિટીંગ MLA છે જેઓ સ્થાનિક સમસ્યા હોય કે કોરોનાની સમસ્યા આ તમામના બેઝ પર પર્ફોમન્સ લિસ્ટ તૈયાર કરવામાં આવ્યું છે. ભાજપ દ્વારા રિપોર્ટ કાર્ડ તૈયાર કરાવવામાં આવી રહ્યું છે. નિષ્ક્રિય ધારાસભ્યોને રિપીટ ન કરવા માટે ભાજપે તૈયારી બતાવી છે.