ઘમાસાણ / કોંગ્રેસ-ભાજપના સભ્યો વચ્ચે તૂતૂ-મેંમેં : બનાસકાંઠા જિલ્લા પંચાયતની સાધારણ સભામાં હોબાળો

• બનાસકાંઠા જિલ્લા પંચાયતની સાધારણ સભા બની અસાધારણ
• કોંગ્રેસ-ભાજપના સભ્યો વચ્ચે તૂતૂમેંમેં
• સાધારણ સભામા હાજર ન રહેલા જિલ્લા વિકાસ અધિકારીનો કરાયો વિરોધ

બનાસકાંઠા જિલ્લા પંચાયતની આજે સાધારણ સભા યોજાઈ હતી. આ સાધારણ સભામાં અસાધારણ બની હતી.  ભાજપ-કોંગ્રેસના સદસ્યો વચ્ચે વિવિધ મુદ્દાઓને લઈને ઉગ્ર ચર્ચાઓ થતાં સભામાં ગરમાવો સર્જાયો હતો.  ઉપરાંત જિલ્લા વિકાસ અધિકારીનો શાસક પક્ષે વિરોધ નોંધાવતા દેકારો બોલી ગયો હતો. 

તાલુકા પંચાયતના પ્રમુખને સસ્પેન્ડ કરાતા વિરોધ
કોંગ્રેસ શાસિત બનાસકાંઠા જિલ્લા પંચાયતની  આજે સાધારણ સભા મળી હતી. જેમાં વિવિધ મુદ્દાઓની ઉગ્ર ચર્ચા કરાઇ હતી. આજની આ સાધારણ સભામાં જિલ્લા વિકાસ અધિકારી હાજર રહ્યા ન હતા. જે દરમિયાન અગાઉ તાલુકા પંચાયતના પ્રમુખને જિલ્લા વિકાસ અધિકારા દ્વારા સસ્પેન્ડ કરી દેવામાં આવ્યા હતા. જે મામલે શાસક પક્ષ દ્વારા વિરોધ કરવામાં આવ્યો હતો. એટલું જ નહિ રાજકીય દ્વેષ રાખી જિલ્લા વિકાસ અધિકારીએ તાલુકા પંચાયત પ્રમુખને સસ્પેન્ડ કર્યા હોવાના આક્ષેપ પણ કર્યા હતા. 

ભાજપએ કર્યો સાધારણ સભામાંથી વોકઆઉટ
શાસક પક્ષ કોંગ્રેસ દ્વારા જિલ્લા વિકાસ અધિકારીને ઠપકો આપવાનો ઠરાવ બહુમતીથી રજૂ કરાયો હતો.ત્યારે જિલ્લા વિકાસ અધિકારી વિરુદ્ધની ઠરાવ અને દરખાસ્તને લઈને વિપક્ષ ભાજપએ આ સાધારણ સભામાંથી વોકાઉટ કર્યો હતો. આમ જિલ્લા પંચાયતની સામાન્ય સભામાં વિપક્ષની સાથે સત્તાપક્ષના સભ્યોએ વિવિધ મુદ્દે આકરા તેવર બતાવતા સભા ગરમાગરમીભર્યા માહોલમાં સંપન્ન થઈ હતી.