બેઠક / ગુજરાતમાં કોરોનાનો કહેર : ગઈ કાલે પ્રતિબંધો જાહેર કર્યા તો આજે CM રૂપાણીએ તાબડતોબ કર્યુ આ કામ

• CM રૂપાણીની 8 મનપા કમિશનર સાથે બેઠક
• વીડિઓ કોન્ફરન્સથી મનપા કમિશનર સાથે બેઠક
• 8 મનપા વિસ્તારમાં કોરોના સ્થિતિને લઈને રીવ્યુ બેઠક

CM રૂપાણીની 8 મનપા કમિશનર સાથે બેઠક

ગુજરાતમાં કોરોના વાયરસના કેસમાં સતત ઉછાળો આવી રહ્યો છે અને 24 કલાકમાં છ હજારથી વધારે કેસ આવતા આખા રાજ્યની ચિંતામાં વધારો થયો છે ત્યારે રાજ્યના મુખ્યમંત્રીએ રાજ્યની આઠ મનપાના કમિશનરો સાથે રિવ્યુ બેઠક યોજી હતી. 

મનપા વિસ્તરની હોસ્પિટલ સુવિધાને લઈને ચર્ચા

આ બેઠકમાં સીએમ રૂપાણીએ કોરોના વાયરસની સમગ્ર પરિસ્થિતિ તથા સરકારી-ખાનગી હોસ્પિટલમાં રેમડેસીવિર ઇન્જેક્શનને લઈને ચર્ચા કરી હતી. આ બેઠકમાં કોરોના વાયરસની ટેસ્ટિંગ મુદ્દે પણ ચર્ચા કરવામાં આવી હતી. 

ગુજરાતમાં 6 હજારથી વધારે કેસ

રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં ગત 24 કલાકમાં કોરોનાના 6021 કેસ નોંધાયા છે અને 2854 દર્દીઓ સાજા થયાં છે. આ સાથે જ અત્યાર સુધીમાં 3,17981 દર્દીઓ કોરોનામુક્ત થયાં છે. ગઈ કાલે રાજ્યમાં 55 લોકોના સારવાર દરમિયાન મોત થયાં છે.આમ ગુજરાતમાં અત્યાર સુધીમાં 4855 લોકોના મોત કોરોનાને કારણે થયાં છે. ગઇકાલ કરતા આજે કોરોનાના કેસમાં ચિંતાજનક ઉછાળો નોંધાયો છે તો સાથોસાથ મૃત્યુનો આંકડો પણ દિવસેને દિવસે વધી રહ્યો છે. રાજ્યમાં હાલ 216 લોકો વેન્ટિલેટર પર છે. એક્ટિવ કેસનો આંકડો 30,680 પર પહોંચ્યો છે.

સુરત અને અમદાવાદમાં કોરોના બેકાબૂ 

ગુજરાતમાં રસીકરણની કામગીરી ચાલુ હોવા છતાં બીજી તરફ પરિસ્થિતિ બેફામ છે. કોરોનાના કેસમાં સતત વધારો થતા ચિંતા વધી છે. અમદાવાદ શહેરમાં રાજ્યના સૌથી વધુ 1907 કેસ જ્યારે સુરત શહેરમાં 1174 નવા કેસ, જ્યારે સુરત ગ્રામ્યમાં 295 કેસ નોંધાયા છે. વડોદરા શહેરમાં 261 કેસ, જ્યારે ગ્રામ્યમાં 120 કેસ નોંધાયા. રાજકોટ શહેરમાં 503 કેસ અને ગ્રામ્યમાં 73 કેસ નોંધાયા છે.

અમદાવાદમાં વધતા કોરોનાના સંક્રમણને લઈ દર્દીઓનો જમાવડો થયો છે. તો બીજી તરફ સિવિલ હોસ્પિટલની બહાર એમ્બ્યુલન્સની લાંબી કતારો લાગી ગઈ છે. એક એક એમ્બ્યુલન્સ 2થી 3 કલાક સુધી લાંબી લાઈનમાં છે. દર્દીઓએ સારવાર માટે 3 કલાક જેટલી રાહ જોવી પડી હતી. પરિવારજનો અને દર્દીઓ હોસ્પિટલની બહાર જ અટવાયા હોવાના દૃશ્યો સામે આવી રહ્યા છે. ઉનાળાના તાપ વચ્ચે લોકો પાણીની પણ માગણી કરી રહ્યા છે.