નવી દિલ્હી / જાહેરાતમાં સિક્કિમને દિલ્હીનું પડોશી દેશ દર્શાવતા કેજરીવાલ ભડક્યાં, તાબડતોડ આપ્યો આ આદેશ

• દિલ્હી સરકારની જાહેરાતમાં સિક્કિમને પાડોશી દેશ બતાવાયો!
• સિક્કિમ સરકારે રોષ વ્યક્ત કર્યો
• દિલ્હી સરકારે જાહેરાત પાછી લીધી

દિલ્હી સરકારે એક જાહેરાતમાં સિક્કિમને નેપાલ અને ભૂટાનની સાથે અલગ દેશ તરીકે ભારતથી અલગ ગણાવ્યું છે. હવે દિલ્હી સરકારની આ જાહેરાતને લઇને સવાલ ઉઠ્યા છે. આને લઇને સિક્કિમના મુખ્યમંત્રી પ્રેમસિંહ તમાંગે ટ્વિટ કરીને કહ્યું કે, સિક્કિમ ભારતનો એક ભાગ છે. દિલ્હી સરકારને આ મુદ્દાને સુધારવાની અપીલ કરું છું.

સિક્કિમના મુખ્યમંત્રી પ્રેમસિંહે કહ્યું કે, દિલ્હી સરકાર દ્વારા અલગ અલગ પ્રિન્ટ મીડિયામાં જાહેર કરવામાં આવેલી આ જાહેરાતમાં સિક્કિમની સાથે ભૂટાન અને નેપાલ જેવા દેશોનો ઉલ્લેખ છે. સિક્કિમ 1975થી ભારતનો ભાગ રહ્યું છે અને એક અઠવાડીયા પહેલા રાજ્ય દિવસ મનાવવામાં આવ્યો છે.

Sikkim is a part of India and should not be sethis is condemnable and I would request the Delhi Government to rectify this issue.@CMODelhi @AamAadmiParty pic.twitter.com/VmLiGPqOew

— Prem Singh Tamang (Golay) (@GolayPs) May 23, 2020

દિલ્હી સરકાર દ્વારા કાર્યવાહી કરવામાં આવી

સમગ્ર ઘટનાક્રમ બાદ દિલ્હીના મુખ્યમંત્રી અરવિંદ કેજરીવાલે એક ટ્વીટ પણ કર્યું. જેમાં તેમણે લખ્યું કે સિક્કિમ ભારતનું અભિન્ન અંગ છે. આવી ભૂલને ક્યારેય ચલાવી લેવામાં નહીં આવે. જાહેરાત પાછી લઈ લેવાઈ છે અને જવાબદાર આધિકારી વિરૂદ્ધ પગલાં પણ લેવાયા છે. સિવિલ ડિફેન્સ કોર્પ તરફથી આ જાહેરાત અપાઈ હતી. જેમાં સિક્કિમને ભૂટાન અને નેપાલની શ્રેણીમાં સામેલ કરી દેવાયું હતું.

Sikkim is an integral part of India. Such errors also cannot be tolerated. Advertisement has been withdrawn and action taken against the officer concerned. https://t.co/BgTcjJF4MF

— Arvind Kejriwal (@ArvindKejriwal) May 23, 2020

કેજરીવાલ પર કોંગ્રેસના પ્રહાર

દિલ્હી કોંગ્રેસ અધ્યક્ષ અનિલ ચૌધરીએ પણ મુખ્યમંત્રી કેજરીવાલ પર પ્રહાર કર્યા છે. ટ્વિટ કરીને ચૌધરીએ કહ્યું છે કે, દિલ્હીના મુખ્યમંત્રી અરવિંદ કેજરીવાલ પ્રચાર-પ્રસારમાં એટલા વ્યસ્ત છે કે તેમને એ પણ નથી ખબર કે સિક્કિમ ભારતનો ભાગ છે કે ભારત બહારનો. તેમની જાણ માટે જણાવી દઉં કે સિક્કિમ ભારતનો જ ભાગ છે.

શું છે મામલો?

દિલ્હીની અરવિંદ કેજરીવાલ સરકાર તરફથી સિવિલ ડિફેન્સના સભ્યોની ભરતી માટે સમાચાર પત્રોમાં જાહેરાત છાપવામાં આવી. આ જાહેરાતમાં અરજી માટે લાયકાતના કોલમમાં લખવામાં આવ્યું કે, 'ભારતનો નાગરિક હોય કે નેપાળ, ભૂટાન કે પછી સિક્કિમની પ્રજા હોય.' નેપાળ અને ભૂટાનની સાથે સિક્કિમને પણ ભારતથી અલગ દેખાડવામાં આવ્યું છે. આ જાહેરાત પર દિલ્હીના મુખ્યમંત્રી અરવિંદ કેજરીવાલનો ફોટો પણ છાપવામાં આવ્યો છે.