- રાજ્યમાં રોડ રસ્તાની હાલત મામલે CM નો નિર્ણય
- રસ્તાના તાત્કાલિક સમારકામ માટે CM એ કર્યા સુચન
- રિપેરિંગ, રિસર્ફેસિંગ અને માર્ગ નિર્માણના કામો શરૂ કરવા સુચન
ગુજરાત ચોમાસા બાદ રોડ રસ્તા બાબતે તંત્રની કામગીરી ગોકળ ગતિએ ચાલી રહી છે. શહેર હોય કે ગામડા રસ્તા પર ખાડાનું સામ્રાજ્ય જોવા મળી રહ્યું છે. ત્યારે આજે મળેલી માર્ગ મરામત અંગેની ઉચ્ચસ્તરીય બેઠકમાં CM ભૂપેન્દ્ર પટેલે ગુજરાતમાં ખરાબ રોડ રસ્તાને લઈ મોટા આદેશ આપી દીધા છે.
નવરાત્રી સુધીમાં રસ્તાઓની કામગીરી પૂર્ણ કરો: CM ભૂપેન્દ્ર પટેલ
રાજ્યમાં રોડ રસ્તાની હાલત મામલે CM ભૂપેન્દ્ર પટેલે રસ્તાના તાત્કાલિક સમારકામ માટે અધિકારીઑને આદેશ કર્યા છે. રિપેરિંગ, રિસર્ફેસિંગ અને માર્ગ નિર્માણના કામો યુદ્ધના ધોરણે શરૂ કરવા સુચન કરવામાં આવ્યું છે. સપ્ટેમ્બરની શરૂઆતથી કામગીરી શરૂ કરવા આદેશ પારિત કરવામાં આવ્યો છે. આ કામ માટે સીએમ ભૂપેન્દ્ર પટેલે અધિકારીઑને ડેડલાઇન પણ જાહેર કરી છે. નવરાત્રી સુધી તમામ રસ્તાઓની કામગીરી પૂરી કરો તેવો નિર્દેશ કરવામાં આવ્યો છે.
અમદાવાદના સરદાર પટેલ રિંગરોડની હાલત ખરાબ
સ્માર્ટ સિટી અમદાવાદના રોડની હાલત બિસ્માર થઇ છે. અમદાવાદના સરદાર પટેલ રિંગ રોડ પરના શાંતિપુરા ખાતે એક તરફ બ્રિજ બની રહ્યો છે, જ્યરે બીજી તરફ રોડ પર કપચી અને માટી દેખાવા લાગી છે. જેને કારણે રોડ પર ઘૂળની ડમરીઓ ઉડી રહી છે. જેથી વાહનચાલકોને હાલાકીનો સામનો કરવો પડે છે. ખરાબ રોડને લઇને વાહન ચાલકોમાં પણ ભારે રોષ જોવા મળી રહ્યો છે.
ગુજરાતમાં ખાડા બાદ ધૂળની સમસ્યા, લોકોના સ્વાસ્થ સાથે ચેડા
ગુજરાતના મહાનગરોમાં તંત્રની વધુ એક બેદરકારી જોવા મળી છે. વરસાદ બાદ રસ્તા પર ખાડાની સમસ્યા દુર કરવા માટે તંત્રએ કામ ચલાવ ઉપાયો કર્યા હતા. જેના પરિણામે હાલ ઠેર ઠેર રસ્તા પર ધૂળ ઉડવાની સમસ્યા જોવા મળી રહી છે. ગુજરાતના અમદાવાદ, વડોદરા, રાજકોટ, સુરત શહેરમાં ધૂળ ઉડવાની સમસ્યા જોવા મળી છે. આ ધૂળ ઉડવાથી વાહન ચાલકોને ભારે મુશ્કેલીનો સામનો કરવો પડી રહ્યો છે સાથે સાથે ધૂળને કારણે લોકો સ્વાસ્થને પણ નુકસાન થવાનો ભય છે. ત્યારે જનતાનો મોટો પ્રશ્નએ છે કે તંત્રની ભૂલ છૂપાવામાટે જનતાની સ્વસ્થ્ય સાથે કેમ ચેડા કરવામાં આવે છે?
દાહોદના લીમડીમાં ધૂળની સમસ્યા
દાહોદ જિલ્લાના લીમડી નગરમાં ગોધરા રોડ પર ખાડા અને ધૂળનું સામ્રાજ્ય જોવા મળી રહ્યું છે. આ અંગે સ્થાનિકોએ આક્ષેપ કર્યો કરતા કહ્યું કે, ખાડા અને ધૂળની ડમરી ઉડવાની સમસ્યા અંગે અનેક વખત રજૂઆત કરવામાં આવી છે. આમ છતાં તંત્ર દ્વારા કોઈ પ્રકારની કામગીરી કરવામાં આવતી નથી. જેથી સ્થાનિકોને હાલાકીનો સામનો કરવો પડી રહ્યો છે.
જેતપુરમાં વરસાદ પડતા રસ્તા ધોવાયા
જેતપુર શહેરમાં તાજેતરમાં જ વરસેલા વરસાદમાં શહેરના મુખ્ય માર્ગોનું ધોવાણ થયુ છે. ઠેર ઠેર પડેલ ગાબડાથી સત્તાધિશો અને કોન્ટ્રાક્ટરોની મિલીભગત સામે આવી છે.. સામાન્ય વરસાદમાં જ રસ્તા પર મસમોટા ખાડા પડી જતાં લોકો ત્રાહીમામ પોકારી ઉઠ્યા છે.. પણ તંત્ર સ્માર્ટ છે.. તંત્રને ખબર છે કે માટી ક્યાં નાખવી છે.. લોકોની આંખમાં કે ખાડામાં. ખાડામાં નાખેલી માટીતો 1-2 દિવસમાં ઉડી જાય છે.. પણ લોકોનાં આંખમાં ભ્રષ્ટાચારી માટી ક્યારેય નથી ઉડતી. ત્યારે સ્થાનિકો દ્વારા તંત્રને અપીલ કરવામાં આવી છે કે કામ કરો, ભષ્ટ્રાચાર નહી.
