અમદાવાદ / કારચાલકને નંબર પ્લેટ વગર રોક્યો તો ટ્રાફિક પોલીસને આપી ધમકી, કહ્યું- 'તું અમારો નોકર છે, સસ્પેન્ડ કરાવી દઇશ'

• નંબર પ્લેટ વગરની એક સફેદ કલરની કાર આવતા ટ્રાફિક પોલીસે રોકવાનો કર્યો પ્રયાસ
• પોલીસ કર્મચારીએ કારચાલક પર શંકા જતા કારનો પીછો કર્યો
• સિગ્નલ પર પૂછપરછ કરતા ઉગ્રબોલાચાલી બાદ થઇ મારામારી

અમદાવાદમાં ટ્રાફિકના કોન્સ્ટેબલ તેમજ કારચાલક વચ્ચે બોલાચાલી અને મારામારીની ઘટના સામે આવી છે. ઈ-ડિવિઝન ટ્રાફિક પોલીસ સ્ટેશનમાં ફરજ બજાવતા લોકરક્ષક ભરતભાઈ હઠ્ઠાભાઈએ એલિસબ્રિજ પોલીસ સ્ટેશનમાં કારચાલક અને અન્ય બે યુવક વિરુદ્ધમાં મારામારી તેમજ સરાકારી કામમાં અવરોધરૂપ બનવા બદલ ફરિયાદ કરી છે. ફરિયાદમાં કરાયેલા આક્ષેપ પ્રમાણે ગઇકાલ બુધવારે ભરતભાઈ તેમના પોલીસ સહકર્મચારીઓ સાથે રૂપાલી ચાર રસ્તા પર ટ્રાફિક ‌નિયમન કરતા હતા. ત્યારે સીદી સૈયદની જાળી પાસેથી નંબર પ્લેટ વગરની એક સફેદ કલરની કાર આવતી હતી. ભરતભાઈએ તે કારને રોકવા માટે કહ્યું, પરંતુ કારચાલક તકનો લાભ લઈને નાસી ગયો હતો, જેથી ભરતભાઈ અને અન્ય એક પોલીસ કર્મચારીને કારચાલક પર શંકા જતાં તેઓએ કારનો પીછો કર્યો હતો. એલિસબ્રિજ પાસે સિગ્નલ બંધ હોવાથી ભરતભાઈએ એલિસબ્રિજ પાસે કારચાલકને ઊભો રાખીને તેનાં નામઠામ અંગે પૂછતાં તેણે તેનું નામ અવકાશ સુનીલભાઈ મલાણી જણાવ્યું હતું.

તું અમારો નોકર છે, સસ્પેન્ડ કરાવી દઇશઃ કાર ચાલક

ભરતભાઈએ કારચાલકને કાર ઊભી રાખવાનું કહ્યું તો કેમ કાર ઊભી ન રાખી તેમ કહેતાં કારચાલક ઉશ્કેરાઈ ગયો હતો. ટ્રાફિક પોલીસને કહ્યું કે તું અમારો નોકર છે. તે દરમિયાનમાં કારમાં બેઠલ અન્ય બે યુવક કારમાંથી બહાર આવીને કહેવા લાગ્યા કે હું સસ્પેન્ડ કરાવી દઇશ તેમ કહીને બીભત્સ બોલવા લાગ્યા હતા. ભરતભાઈ અને સાગરભાઈએ ગાળો બોલવાની ના પાડતાં કારચાલક અને તેના મિત્રોએ પોલીસ કર્મચારીઓ સાથે ઝઘડો કરીને સાગરભાઈનો કોલર પકડીને મારામારી કરતાં વરદીનાં બટન તોડી નાખીને ભરતભાઈ અને સાગરભાઈને ફટકારતાં આસપાસના લોકો ભેગા થઇ ગયા હતા.

તે દરમિયાન પોલીસ કર્મચારીઓ આવી જતાં ત્રણેય યુવકોને એલિસબ્રિજ પોલીસ સ્ટેશન લઇ આવ્યા હતા. એલિસબ્રિજ પોલીસે સરકારી ફરજમાં અડચણરૂપ બન્યાનો ગુનો નોંધી ત્રણેય યુવકની ધરપકડ કરીને વધુ તપાસ હાથ ધરી છે.