મહામારી / દુનિયાને કોરોના વાયરસથી રાહત આપવા માટે ચીને જે નિર્ણય લીધો તે જાણીને થશે આશ્ચર્ય

• કોરોના વાયરસે સમગ્ર વિશ્વમાં મચાવ્યો હાહાકાર
• સમગ્ર વિશ્વને રાહત આપવા માટે કરી 2 મોટી જાહેરાત
• વેક્સિન તૈયાર થશે એટલે સમગ્ર વિશ્વને આપવાની કરી વાત

વિશ્વ સ્વાસ્થ્ય સંગઠનના વાર્ષિક સંમેલનને સંબોધન કરતા શી જિનપિંગે એવું પણ કહ્યું કે, કોરોના વાયરસ વિરૂદ્ધ જંગમાં ચીન 2 બિલિયન ડોલર એટલે કે 15139 કરોડની આર્થિક સહાય કરશે. ખાસ કરીને વિકાસશીલ દેશોમાં કોરોના વિરૂદ્ધની જંગમાં આ પૈસા આગામી 2 વર્ષ દરમિયાન આપવામાં આવશે. 

વેક્સિન તૈયાર થતાં જ સમગ્ર વિશ્વને આપાશે, ચીનનો દાવો 

ચીને દાવો કર્યો છે કે, તે કોરોના સંકટને લઇને હંમેશા પારદર્શી રહ્યું છે. શી જિનપિંગે જણાવ્યું હતું કે, જેવી વેક્સિન તૈયાર થશે કે તરત જ સમગ્ર દુનિયામાં ઉપલબ્ધ કરાવવામાં આવશે. 

અમેરિકા, ઓસ્ટ્રેલિયા સહિત દુનિયાના કેટલાય રાષ્ટ્રો ચીન પર કોરોના સાથે જોડાયેલી માહિતી છૂપાવવાનો આરોપ લગાવી રહ્યા છે. આ સાથે જ ચીનની એક લેબમાંથી કોરોના લીક થયો હોવાનું પણ સામે આવ્યું હતું અને એટલે જ અમેરિકા અને ચીન વચ્ચે તણાવ વધી રહ્યો છે. 

વીડિયો મારફતે શી જિંગપિંગનો સંદેશ

વીડિયો મારફતે WHO સંમેલનમાં સામેલ થયેલ શી જિનપિંગે એવુ પણ કહ્યું હતું કે, એ વાતનું સમર્થન કરું છું કે, કોરોના સંકટ પૂર્ણ થયાં બાદ કોરોના વિરૂદ્ધ ગ્લોબલ રિસ્પોન્સનું મુલ્યાંકન કરવામાં આવશે. 

યુરોપિયન યુનિયનના 27 સભ્યો સહિત દુનિયાના કેટલાય દેશોએ કોરોનાને લઇને WHOને શરૂઆતથી જ સ્વતંત્ર તપાસ કરવાની માગ કરી છે. 

કોરોનાની માહિતીને લઇને પણ આવ્યા હતા સમાચાર 

આ પહેલા અમેરિકન ખાનગી એજન્સીઓના હવાલાથી સમાચાર સામે આવ્યા કે, ચીનના રાષ્ટ્રપતિએ WHOના પ્રમુખ પાસે માગણી કરી હતી કે, તેઓ કોરોના સાથે જોડાયેલી ચેતવણી આપવામાં મોડું કરે, જો કે, ડબલ્યૂએચઓએ આ વાતનું ખંડન કર્યું હતું.