રાજ્યમાં અત્યાર સુધી નકલી બિયારણની ધમધમતી ફેક્ટરીઓથી ખેડૂતો પરેશાન હતા. પરંતુ હવે નકલી જંતુનાશક દવાઓની ફેક્ટરીઓ પણ ધમધમતી હોવાનું કૌભાંડ ખુલ્યું છે. રાજકોટ પોલીસે નકલી જંતુનાશક દવાની જ ફેક્ટરી ઝડપી પાડી છે. પોલીસે બાતમીના આધારે કરેલી રેડ દરમ્યાન 13.53 લાખની નકલી જંતુનાશક દવા ઝડપાઇ છે.
થોડા સમય પહેલા જ ઉત્તર ગુજરાતમાં ચાલતા જીનીંગ મિલોમાંથી નકલી બિયારણો ઝડપાયા હતા. તેવામાં હવે રાજકોટ પોલીસે નકલી જંતુનાશક દવાની જ ફેક્ટરી ઝડપી પાડી છે. જે ફેક્ટરીએ અત્યાર સુધીમાં હજારો ખેડૂતોને નકલી દવા પધરાવાઈ તે ખેડૂતોને નુકસાની સિવાય કાંઈ મળ્યું નહીં હોય.
રાજકોટ નજીક આવેલા નવાગામથી કૌભાંડ ખુલ્યું
રાજકોટ નજીક આવેલા નવાગામ ખાતે નકલી જંતુનાશક દવાની ફેક્ટરી ચાલતી હતી. અહીં રૂડાનગરમાં બ્રિજેશ ખાણઘર નામનો વ્યકિ્ત લાયસન્સ વગર ખેતી માટેની જંતુનાશક દવાઓ બનાવતો હતો. જોકે રાજકોટ પોલીસને પોતાના બતમીદારો દ્વારા ચોક્કસ માહિતી મળી હતી. જેથી બાતમીના આધારે રેડ પાડીને આરોપીને ઝડપી પાડયો હતો.
ફેક્ટરીમાંથી નકલી જંતુનાશક દવાનો જથ્થો ઝડપાયો
રાજકોટ પોલીસે નવાગામ ખાતે નકલી જંતુનાશક દવાની ફેક્ટરી ઝડપી પાડી છે. જ્યાં તપાસ કરતાં ફેક્ટરીમાંથી 13.53 લાખની નકલી જંતુનાશક દવાનો જથ્થો પણ ઝપ્ત કર્યો. જોકે આ દરોડો મુદ્દે પોલીસ તરફથી તો હજુ નિવેદન સામે નથી આવ્યું.