એક્શન / Zomato-Swiggy મૂકાઇ શકે છે મોટી મુશ્કેલીમાં, CCIએ આપ્યા તપાસના આદેશ; જાણો કેમ

• Zomato-Swiggy કંપનીઓ માટે માઠા સમાચાર
• કોમ્પિટિશન કમિશન ઓફ ઈન્ડિયા (CCI) એ આપ્યા તપાસના આદેશ
• કામગીરી અને બિઝનેસ મોડલને લઇને આપ્યાં તપાસના આદેશ

કોમ્પિટિશન કમિશન ઓફ ઈન્ડિયા (CCI) એ અગ્રણી ફૂડ ડિલિવરી કંપનીઓ કહેવાતી એવી Swiggy અને Zomato વિરૂદ્ધ તપાસનો આદેશ આપ્યો છે. CCI એ આ કંપનીઓની કામગીરી અને બિઝનેસ મોડલને લઇને તપાસના આદેશ આપ્યાં છે. કમિશને કોમ્પિટિશન એક્ટની કલમ 3(1) અને 3(4) ના કથિત ઉલ્લંઘનની તપાસનો આદેશ આપ્યો છે.

CCI એ પોતાના આદેશમાં કહી છે આ બાબત

CCI એ 4 એપ્રિલ, 2022 ના રોજના પોતાના આદેશમાં કહ્યું છે કે, પ્રાથમિક ધોરણે Zomato અને Swiggy ના ચોક્કસ આચરણને ધ્યાનમાં રાખતા ડાયરેક્ટર જનરલ (DG) દ્વારા તપાસની જરૂરિયાત લાગે છે. તપાસ દ્વારા એ બાબત વિશે જાણી શકાશે કે, શું આ કંપનીઓનું વર્તન કોમ્પિટિશન એક્ટની કલમ 3(1) અને 3(4) નું ઉલ્લંઘન કરે છે કે નહીં.

જાણો શું છે સમગ્ર મામલો?

નેશનલ રેસ્ટોરન્ટ એસોસિએશન ઓફ ઈન્ડિયા (NRAI) ની ફરિયાદ પર આ કંપનીઓ વિરુદ્ધ તપાસના આદેશ આપવામાં આવ્યાં છે. NRAI એ આરોપ મૂક્યો છે કે, ભારતના ફૂડ ડિલિવરી ઉદ્યોગમાં 90 ટકાથી વધારે માર્કેટ શેરવાળા એગ્રીગેટર્સ વિશાળ ડિસ્કાઉન્ટ, વિશિષ્ટ જોડાણ અને અમુક રેસ્ટોરન્ટ ભાગીદારોને પસંદગી આપીને ભારતના પ્રતિસ્પર્ધા કાયદાનું ઉલ્લંઘન કરી રહ્યાં છે. સંગઠનનો આરોપ છે કે તેનાથી રેસ્ટોરાંનો બિઝનેસ પણ પ્રભાવિત થઇ રહ્યો છે અને નવા રેસ્ટોરન્ટ પ્લેયર્સને ઉદ્યોગમાં પ્રવેશન કરવામાં મુશ્કેલી આવી રહી છે.

ત્યાર બાદ CCIને લાગ્યું કે, NRAI દ્વારા કહેવામાં આવેલી કેટલીક બાબતોની તપાસ થવી જોઇએ. એ સિવાય, રેસ્ટોરન્ટ સંસ્થાએ વિલંબિત ચુકવણી ચક્ર, એગ્રીમેન્ટ (કરાર) માં લગાવવામાં આવેલ એકપક્ષીય કલમો, અતિશય વધારે કમિશન ચાર્જ કરવો જેવાં અનેક આરોપો લગાવ્યાં છે.