CBSE / 1થી 15 જુલાઈ વચ્ચેની CBSEની ધો 10 અને 12ની પરીક્ષાઓ રદ્દ, ધો.12ની પરીક્ષા આપવી કે નહીં વિદ્યાર્થી નક્કી કરશે

• CBSE ધો 10 અને 12ની પરીક્ષાઓ રદ્દ
• મહારાષ્ટ્ર, દિલ્હી અને તમિલનાડુએ પરીક્ષાના આયોજન માટે અસમર્થતા દર્શાવી
• પરિસ્થિતિ સુધરશે તો ધો.12ની પરીક્ષા લેવાશે. વિદ્યાર્થી નક્કી કરશે આપવી કે નહીં.
• છેલ્લી ત્રણ પરીક્ષાના આધારે કરાશે મૂલ્યાંકન 

 બૉર્ડની પરીક્ષા હવે લેવાઇ જાય તે માટેની અરજીની સુનાવણી સુપ્રિમ કોર્ટમાં ચાલી રહી છે. મહારાષ્ટ્ર, દિલ્હી, ઓડિશાએ પરીક્ષા ન થાય તેવી માગ કરી છે જ્યારે સૉલિસીટર જનરલ તુષાર મહેતાએ કહ્યું કે જુલાઇ મહિનામાં પરીક્ષા લેવાવાની હતી તે પરીક્ષાને કેન્સલ કરી દેવામાં આવી છે. આવામાં એ પણ નક્કી કરાયું છે કે પરિસ્થિત સુધર્યા બાદ ધો.12ની પરીક્ષા લેવાશે અને તેમાં વિદ્યાર્થી પોતે ઈચ્છે તો સ્વૈચ્છિક રીતે પરીક્ષા આપશે. જો પરીક્ષા નહીં આપે તો છેલ્લી ત્રણ પરીક્ષાઓને આધારે મૂલ્યાંકન કરાશે. 

1થી 15 જુલાઈની વચ્ચે થનારી CBSEની ધોરણ 10 અને 12ની પરીક્ષા રદ્દ, સોલિસિટર જનરલ (SG) તુષાર મહેતાએ SCમાં આપી જાણકારી. દિલ્હી, તમિલનાડુ અને મહારાષ્ટ્રએ પરીક્ષાના આયોજન અસક્ષમતા દર્શાવી. આગામી સમયમાં પરિસ્થિતિને ધ્યાને રાખીને નિર્ણય લેવાશે.#CBSC #Exams2020 #SupremeCourt

— VTV Gujarati News and Beyond (@VtvGujarati) June 25, 2020

તમને જણાવી દઈએ કે, બાકીની સીબીએસઈ બોર્ડની પરીક્ષા અંગે કેટલાક ઉમેદવારોએ સુપ્રીમ કોર્ટમાં અરજી કરી હતી.

ICSE બોર્ડની પણ પરીક્ષા રદ્દ

આ સાથે બીજી બાજુ ICSE બોર્ડે પણ ધો.10 અને 12ની પરીક્ષાઓ રદ્દ કરી હતી. જો કે આ બોર્ડ પાછળથી વિદ્યાર્થીઓને પરીક્ષાનો વિકલ્પ નહીં આપવાનો નિર્ણય લીધો છે એટલે કે હવે પરીક્ષા નહીં યોજાય.  બંને બૉર્ડની પરિક્ષા રદ્દ થઇ હોય તેવુ કદાચ ઇતિહાસમાં પહેલી વાર બન્યું છે. 

હવે આ રહેશે વિકલ્પ

1. જે વિષયો માટે પરીક્ષાઓ લેવાની હતી તેમાં વિદ્યાર્થીઓને આંતરિક મૂલ્યાંકનના આધારે સરેરાશ ગુણ આપીને બઢતી મળી શકે છે.
2. આ સિવાય, સંબંધિત વિષયોમાં ગુણ સુધારણા માટે વિદ્યાર્થીઓ પાછળથી પરીક્ષા આપવાનો વિકલ્પ પણ મેળવી શકે છે.

જુલાઈમાં પરિણામની અપેક્ષા વધી

આવી સ્થિતિમાં સીબીએસઇ બોર્ડે દસ અને બારમાની બાકી રહેલી પરીક્ષાઓ રદ કરવાનો નિર્ણય લીધો છે ત્યારે વિદ્યાર્થીઓમાં જલ્દીથી પરિણામ આવવાની અપેક્ષા પણ વધી રહી છે. ખરેખર, સીબીએસઇ બોર્ડે લોકડાઉન પહેલા પેપરોનું મૂલ્યાંકન શરૂ કરી દીધું હતું. હવે બાકીની પરીક્ષાઓ રદ થઈ ગઈ છે, એવું માનવામાં આવી રહ્યું છે કે બોર્ડ જુલાઇના અંત સુધીમાં પરિણામ જાહેર કરશે. જણાવી દઈએ કે ગયા વર્ષે 12 મી પરીક્ષાનું પરિણામ 2 મેના રોજ જાહેર કરાયું હતું, જ્યારે દસમાની પરીક્ષાનું પરિણામ 6 મેના રોજ આવ્યું હતું.

29 વિષયોની લેવાની હતી પરીક્ષા 

કોરોનાવાયરસને કારણે દેશમાં લૉકડાઉન જાહેર કર્યું તે પહેલાં જ CBSEની પરીક્ષાઓ શરૂ થઈ ગઈ હતી. જોકે, લોકડાઉન બાદ કેટલીક પરીક્ષાઓ મુલતવી રાખવાનો નિર્ણય લેવામાં આવ્યો હતો. બાદમાં નિર્ણય લેવામાં આવ્યો કે ધોરણ 10 અને 12 ના 29 કોર વિષયોની પરીક્ષાઓ 1 જુલાઈથી 15 જુલાઇ દરમિયાન લેવામાં આવશે. માનવ સંસાધન વિકાસ પ્રધાન રમેશ પોખરીયલ નિશાંકે પણ આ માટે એક ડેટા શીટ બહાર પાડી હતી. આ અંતર્ગત દસમાની પરીક્ષા ફક્ત ઉત્તર-પૂર્વ દિલ્હીના વિસ્તારોમાં જ લેવાની હતી, જ્યાં હિંસાના કારણે પરીક્ષાઓ લેવામાં આવી ન હતી. તે જ સમયે, દેશભરમાં 12માની પરીક્ષાઓ લેવાનું નક્કી થયું. જો કે, કોરોના વાયરસના વધતા જતા કેસોને ધ્યાનમાં રાખીને આ પરીક્ષાઓને રદ કરવાનો નિર્ણય લેવામાં આવ્યો છે.