સાવધાન! / 'એક જ મિનિટમાં લોન' આપતી એપ્લિકેશનથી લોન લેતા પહેલા ચેતી જજો, તમારા ડેટાનો કરશે આવો ઉપયોગ

• બેન્કોમાંથી લોન લેવાની પ્રક્રિયા ખૂબ જ લાંબી હોવાથી લોકોએ લીધો મોબાઇલ એપનો સહારો
• એક જ મિનિટમાં લોન આપવાનો દાવો કરીને કરાઇ છે છેતરપિંડી
• આવી એપ્સને અંગત જાણકારી આપી દેવાની ભૂલ બહુ ભારે પડી શકે છે

આધુનિકતા અને ટેક્નોલોજીની જેટલી હરણફાળ આપણે ભરી રહ્યા છીએ, આપણી મુસીબતો પણ એટલી જ ઝડપભેર વધી રહી છે. આજના યુગમાં મોબાઈલ ફોનનો ઉપયોગ કરનારી દરેક વ્યક્તિ લગભગ સોશિયલ મીડિયા પર હાજરી ધરાવે જ છે. સોશિયલ મીડિયાની આ આભાસી દુનિયામાં અને ડિજિટલ પ્લેટફોર્મ પર એવા એવા ‘શાતીર શિકારીઓ’ જાળ બિછાવીને તૈયાર બેઠા હોય છે, જે તમારી મજબૂરીનો લાભ લઈને એક પળમાં જ તમારી જિંદગીને નર્ક સમાન બનાવી દે છે. એપ્લિકેશનના માધ્યમથી સસ્તા વ્યાજ દરે લોન આપીને વ્યક્તિને ફસાવી દેનારી આવી જ ખતરનાક ટોળકીનો ત્રાસ છેલ્લા છોડા સમયથી ભયંકર હદે વધી ગયો છે.

એક જ મિનિટમાં લોન આપવાનો દાવો કરીને કરાઇ છે છેતરપિંડી

કોરોનાકાળ દરમિયાન જ્યારે સમગ્ર દેશમાં લોકડાઉન લાગુ થયું ત્યારે લાખો લોકો બેરોજગાર થઈ ગયા. આવા સંજોગોમાં લોકો સામે રોજી-રોટીનો પ્રાણપ્રશ્ન આવીને ઊભો રહ્યો હતો. બેન્કોમાંથી લોન લેવાની પ્રક્રિયા ખૂબ જ લાંબી અને કંટાળાજનક હોવાથી અને ત્યાંથી લોન લેવાની ઘણી શરતો કડક હોવાના કારણે નિરાશ થયેલા લોકો આસાનીથી આ ‘ચીટર’ એપ્સની જાળમાં ફસાતા ગયા. એક જ મિનિટની અંદર લોન આપવાનો દાવો કરીને આ લોકો ગ્રાહકોનો વિશ્વાસ એ હદે જીતી લે છે કે કોઈને અંદાજપણ આવતો નથી કે તેમની સાથે કેટલી મોટી છેતરપિંડી થઈ રહી છે.

બેન્કોમાંથી લોન લેવાની પ્રક્રિયા ખૂબ જ લાંબી હોવાથી લોકોએ લીધો મોબાઇલ એપનો સહારો

અનેક મજબૂર લોકોએ આવી એપ્સના માધ્યમથી ૧૫ દિવસની મુદ્દતથી લઈને લાંબી અવધિની લોન તો લઈ લીધી, પણ હવે આ જ લોન તેમની સૌથી મોટી માનસિક પરેશાનીનું કારણ બની ગઈ છે. આ એપ્સ દ્વારા આપવામાં આવેલી લોન પર વ્યાજનો દર ૩૦ ટકા સુધી વસૂલવામાં આવી રહ્યો છે, જે બેન્કો દ્વારા આપવામાં આવતી લોન પર મોટાભાગે ૧૦થી ૨૦ ટકા હોય છે.

ફોનમાં હાજર તમામ ફોટોગ્રાફ્સ અને કોન્ટેક્ટ લિસ્ટ, લોકેશન લઇને ટ્રેસ કરવામાં આવે છે

આ એપ્સ દ્વારા જે લોકોને લોન આપવામાં આવે છે તે તમામના ફોનની એક્સેસ પરમિશન મેળવીને આ સાયબર ઠગો પીડિતોની અંગત જાણકારી અને સંવેદનશીલ માહિતી પણ મેળવી લેતા હોય છે. આ એપ્સ શરૂ કરો ત્યારે તમારી પાસેથી ફોન નંબર ઉપરાંત તમારા ફોનમાં હાજર તમામ ફોટોગ્રાફ્સ અને કોન્ટેક્ટ લિસ્ટ (તમારી ફોનબુકમાં સેવ કરેલા તમામ ફોન નંબર) અને તમારું લોકેશન ટ્રેસ કરવાની પરમિશન પણ માગી લેવામાં આવે છે, જે મોટાભાગના લોકો વાંચ્યા કે સમજ્યા વગર જ આપી પણ દેતા હોય છે. 

આવી એપ્સને અંગત જાણકારી આપી દેવાની ભૂલ બહુ ભારે પડી શકે છે

હવે અસલી ખેલ અહીંથી જ શરૂ થાય છે. આ એપને આટલી અંગત જાણકારી આપી દેવાની ભૂલ બહુ ભારે પડે છે. આ એપ્સના રિકવરી ડિપાર્ટમેન્ટના લોકો વ્યાજ અને લોનની વસૂલાત માટે લોન લેનારી વ્યક્તિને સાવ અભદ્ર ભાષામાં ફોન કરે છે અને કડક ઉઘરાણી શરૂ કરે છે. આટલું જ નહીં લોન લેનારી વ્યક્તિના તમામ દોસ્તો, સગાં-સંબંધીઓને પણ તેની સતત જાણકારી આપીને પરેશાન કરવામાં આવે છે. કોન્ટેક્ટ લિસ્ટમાં જેમના પણ નામ હોય એ તમામને મેસેજ કે કોલ દ્વારા વારંવાર ધમકીઓ આપવામાં આવે છે.

એપને ઠગ ટોળકી મોટાભાગે ગુરૂગ્રામ, દિલ્હી અને હૈદરાબાદથી ઓપરેટ કરે છે

આ ઠગ ટોળકી મોટાભાગે ગુરુગ્રામ, દિલ્હી અને હૈદરાબાદથી ઓપરેટ કરતી હોવાની માહિતી સામે આવી છે. વ્યક્તિનો એકદમ અંગત ડેટા આ ગઠિયાઓ ‘ડાર્કવેબ’ ઉપર અલપોડ કરી દેવાની ધમકી આપીને પણ રૂપિયા વસૂલે છે. આ એપ્સના સર્વર આપણા દેશના કાયદા અને વ્યવસ્થાથી બહુ દૂર દેશમાં છે અને તેમના પર નિયંત્રણ મૂકવા આસાન નથી.

હવે તો અમદાવાદ, રાજકોટ, સુરત અને વડોદરા જેવા શહેરોમાં પણ આવી એપ્સના પીડિતો સામે આવી રહ્યા છે અને નવી ફરિયાદો દાખલ થઈ રહી છે. આમાંથી મોટાભાગની એપ્સને રિઝર્વ બેન્ક ઓફ ઈન્ડિયા (આરબીઆઈ)એ મંજૂરી જ આપી નથી. આ કારણે જ ગૂગલે આવી અનેક વિવાદિત એપ્સને તેના પ્લે સ્ટોર પરથી હટાવી દીધી છે.  

લોન લેવી ખરાબ વાત નથી પણ માન્યતા પ્રાપ્ત બેંક પાસેથી લોન લેવી

એક વાત હંમેશાં યાદ રાખો કે, નાણાંની જરૂર દરેક વ્યક્તિને પડતી જ હોય છે અને આવા સંજોગોમાં લોન લેવી એ કોઈ ખરાબ વાત નથી, પણ હંમેશા માન્યતા પ્રાપ્ત બેન્ક પાસેથી લોન લઈને તમે આ પ્રકારની છેતરપિંડી અને માનસિક પ્રતાડનથી બચી શકશો. ઘણી વખત અત્યંત સરળ અને લાભદાયી લાગતી પ્રક્રિયા હકીકતમાં આપણા માટે ભ્રામક જાળ સાબિત થતી હોય છે. આથી જ દરેકે સાવધાન રહેવું જરૂરી છે.•