નવસારીમાં મેઘરાજા મહેરબાન થતા નદીઓ ગાંડીતૂર બની છે તો બીજી તરફ અબોલ જીવો પણ વરસાદી આફતમાં ફસાયા છે ઘણી જગ્યાએ તો તંત્ર પણ પહોંચ્યુ નથી
Share
નવસારીમાં વરસાદી આફત
ગણદેવીમાં પુરના પાણીમાં લોકો ફસાયા
પાંજરાપોળમાં 1200 અબોલ જીવો ફસાયા
દક્ષિણ ગુજરાતમાં ભારે વરસાદની આગાહીને પગલે મેઘરાજાએ તો જબરો કહેર મચાવ્યો છે. તેમાં પણ નવસારીની તો વાત જ શું કરવી. મેઘરાજાએ નવસારીને ઘમરોળતા ઘણી જ દયનીય સ્થિતિનું નિર્માણ થયુ છે. ધોધમાર વરસાદને પગલે નદીમાં નવા નીર આવ્યા છે. નદીઓ ગાંડીતૂર બની છે. અરે, સ્થાનિક નદીઓમાં તો પૂર આવતા આસપાસના વિસ્તારો પાણીમાં ગરકાવ થયા છે. લોકો આખી રાતની રાત પાણીમાં વિતાવવા મજબૂર બન્યા છે. ત્યારે નવસારીના કેટલાક ગામોની સ્થિતિ વિશે વાત કરીએ તો,
ખડસુપા પાંજરાપોળમાં ફસાયા પશુઓ
વાત છે નવસારીના નેશનલ હાઇવે 48 પર આવેલા ખડસુપા ગામની. અહીં પશુઓનુ આશ્રય સ્થાન છે. જે વરસાદી પાણીમાં ગરકાવ થતા 50 જેટલા અબોલ જીવો મોતને ભેટ્યા હોય તેવી પ્રાથમિક માહિતી મળી રહી છે. બે દિવસથી પાણી ભરાતા આશરે 1200 જેટલા પશુઓ ફસાઇ ગયા હતા. જોકે એસડી આરએફની ટીમ દ્વારા રેસ્ક્યુની કામગીરી શરૂ કરવામાં આવી છે.
વેંગણિયા ખાડી પાસે કરાયુ રેસ્ક્યું
તો આ તરફ નવસારીના ગણદેવીમાં હજી પણ ઘણા વિસ્તારો પાણીમાં ગરકાવ છે. ગણદેવીના વેંગણિયા ખાડી પાસે રેસક્યુની કામગીરી કરવામાં આવી. એનડીઆરએફની ટીમ દ્વારા ફસાયેલા લોકોને સલામત સ્થળે ખસેડવામાં આવ્યાછે. લોકોના ઘરોમાં પણ પાણી ભરાઇ જવા પામ્યા છે. ધોધમાર વરસાદને કારણે ખાડીનું જળસ્તર પણ વધી ગયુ છે. જો કે એનડીઆરએફની ટીમ ખડેપગે જોવા મળતા લોકોએ રાહતની લાગણી અનુભવી હતી.
ઘરોમાં ઘુસી ગયા પાણી, અસહાય-લાચાર બન્યા લોકો
નવસારીમાં વરસાદી તારાજી સર્જાઇ છે પરંતુ ઘણા એવા ગામો છે જ્યાં તંત્ર ડોકિયુ કરવા પણ આવ્યુ નથી. આવુ જ એક ગામ છે ગણદેવી. ગણદેવીમાં પૂરનું પાણી ગામમાં ફરી વળતા લોકોના ઘરો પાણી પાણી થયા છે. સ્થાનિકનદીઓમાં પુર આવતા ગ્રામજનોએ ભારે હાલાકી વેઠવાનો વારો આવ્યો છે. ત્યાંનો એક વીડિયો સામે આવ્યો છે જેમાં લોકો એક જગ્યાએ ભેગા થઇને બેઠા છે કારણ કે તે જગ્યા પર જ પાણી નથી. એક જ છત નીચે લોકો આખો દિવસ બેસીને પસાર કરી રહ્યા છે. જીવ બચાવવા માટે ફાંફા મારવાનો વારો આવ્યો છે.
હેલિકોપ્ટર દ્વારા કરાયુ રેસક્યું
તો નવસારીમાં મેઘો આફત બનીને આવતા એનડીઆરએફ અને કોસ્ટગાર્ડની અદભૂત કામગીરી જોવા મળી. એક તરફ એનડીઆરએફ-એસડીઆરએફ દ્વારા લોકોને સલામત સ્થળે ખસેડવામાં આવી રહ્યા છે તો બીજી તરફ કોસ્ટગાર્ડની ટીમ દ્વારા પણ કામગીરી કરવામાં આવી રહી છે. ગણદેવીમાં પુરમાં ફસાયેલા લોકોનું હેલિકોપ્ટર દ્વારા રેસક્યુ કરવામાં આવ્યું.
એક મહિલા અને બાળકીનું રેસક્યુ કરવામાં આવ્યું. આ દ્રશ્યો જોઇને જાણે કોઇ ફિલ્મનું શૂટિંગ ચાલી રહ્યુ હોય તેમ લાગી રહ્યુ હતું. પરંતુ કોસ્ટગાર્ડની ટીમને ખરેખર પ્રશંસનીય કામગીરી કરી હતી.
