ગાંધીનગર / આજે CMની અધ્યક્ષતામાં મહત્વની કેબિનેટ બેઠક, આંદોલનોના નિરાકરણ સહિત વિવિધ મુદ્દાઓ પર કરાશે સમીક્ષા

• CMની અધ્યક્ષતામાં આજે યોજાશે કેબિનેટ બેઠક
• બેઠકમાં અલગ-અલગ મુદ્દાઓને લઇને ચર્ચા કરાશે
• વિવિધ આંદોલનો અને તેના નિરાકરણ બાબતે પણ ચર્ચા થશે

આજે ગાંધીનગર ખાતે CM ભૂપેન્દ્ર પટેલની અધ્યક્ષતામાં મહત્વની કેબિનેટ બેઠક યોજાશે. આ કેબિનેટ બેઠકમાં વડાપ્રધાન નરેન્દ્ર મોદીના કાર્યક્રમની સમીક્ષા કરાશે. તદુપરાંત નેશનલ ગેમ્સની તૈયારીને લઈને પણ બેઠકમાં સમીક્ષા કરાશે. એ સિવાય રાજ્યમાં ચાલી રહેલા વિવિધ આંદોલનો અને તેના નિરાકરણ બાબતે પણ બેઠકમાં ચર્ચા થશે. ચૂંટણી પૂર્વે રાજ્યમાં મહત્વના પ્રોજેક્ટની સ્થિતિ-કામગીરી બાબતે પણ બેઠકમાં ચર્ચા થશે. વધુમાં ખેડૂતોને અતિવૃષ્ટિની સહાય બાબતે પણ ચર્ચા થઈ શકે છે.

Gujarat: આજે ગાંધીનગરમાં CM ભૂપેન્દ્ર પટેલના અધ્યક્ષસ્થાને યોજાશે કેબિનેટ બેઠક, PM મોદીના કાર્યક્રમથી લઇને નેશનલ ગેમ્સની તૈયારી સહિતના મુદ્દાઓ પર કરાશે સમીક્ષા, બેઠકમાં ખેડૂતોને અતિવૃષ્ટિની સહાય બાબતે પણ થઈ શકે છે ચર્ચા#Gujarat #Gandhinagar #bhupendrapatel

— VTV Gujarati News and Beyond (@VtvGujarati) September 28, 2022

બેઠકમાં વિવિધ આંદોલનોના નિરાકરણ બાબતે ચર્ચા થશે

ઉલ્લેખનીય છે કે, હાલ રાજ્યમાં વિવિધ કર્મચારીઓ પોતપોતાની માંગને લઇને આંદોલનો કરી રહ્યાં છે. ત્યારે તેઓના પ્રશ્નોનું યોગ્ય નિરાકરણ આવે એ માટે આજે બેઠકમાં મહત્વની ચર્ચા થઇ શકે છે. તદુપરાંત PM મોદી પણ ગુજરાતની મુલાકાતે આવી રહ્યાં છે. ત્યારે તેમના પ્રવાસને લઇને પૂર્વ તૈયારીઓ કરવા અંગેની પણ બેઠકમાં ચર્ચા કરાશે.

PM મોદી આગામી 29-30 સપ્ટેમ્બરના રોજ ગુજરાતની મુલાકાતે

વડાપ્રધાન નરેન્દ્ર મોદી આગામી 29-30 સપ્ટેમ્બરના રોજ ગુજરાતની મુલાકાતે આવી રહ્યાં છે. પીએમ મોદી સુરત, ભાવનગર અને અમદાવાદ ખાતે વિવિધ કાર્યક્રમોમાં હાજરી આપશે. ત્યારે વડાપ્રધાન મોદીના કાર્યક્રમને લઈને અમદાવાદ પોલીસ કમિશનર સંજય શ્રીવાસ્તવે જાહેરનામું પણ બહાર પાડ્યું છે.

વડાપ્રધાન નરેન્દ્ર મોદી 29 સપ્ટેમ્બરે અમદાવાદના GMDC ગ્રાઉન્ડમાં ઉપસ્થિત રહી મા અંબાની આરતી ઉતારવાના છે ત્યારે તેઓની મુલાકાત પહેલા સાંજે 5 વાગ્યાથી કાર્યક્રમ પૂર્ણ ન થાય ત્યાં સુધી અંધજન મંડળ ચાર રસ્તાથી હેલ્મેટ ચાર રસ્તા સુધીને રસ્તો વાહનોની અવરજવર માટે બંધ રહેશે.

નેશનલ ગેમ્સનું ઓપનિંગ પ્રધાનમંત્રી દ્વારા 29મી સપ્ટેમ્બરે કરાશે, ત્યારે પીએમના કાર્યક્રમને લઈને પોલીસ કમિશનરે જાહેરનામું બહાર પાડ્યું છે. કાર્યક્રમ પૂર્ણ ન થાય ત્યાં સુધી જનપથ ટી થી મોટેરા સ્ટેડિયમના મુખ્ય ગેટ થઈને મોટેરા ટી સુધીનો રસ્તો વાહનવ્યવહાર માટે બંધ રહેશે.

PM મોદી 2 દિવસના ગુજરાતના પ્રવાસે

આપને જણાવી દઈએ કે, વડાપ્રધાન નરેન્દ્ર મોદી ગુજરાતના 2 દિવસના પ્રવાસે આવી રહ્યા છે. વડાપ્રધાન નરેન્દ્ર મોદીના કાર્યક્રમોને લઈને વહીવટી તંત્ર દ્વારા તડામાર તૈયારીઓ કરવામાં આવી રહી છે. 29 સપ્ટેમ્બરના રોજ PM મોદી ભાવનગરમાં રોડ શો કરશે અને સભાને સંબોધશે. 29મીએ અમદાવાદમાં નેશનલ ગેમ્સની શરૂઆત કરાવશે. 29મી એ રાત્રે GMDC ગ્રાઉન્ડ ખાતે ગરબામાં હાજરી આપશે.