CAA વિરોધ / CAA પર ચર્ચા માટે મોદી સરકારનું બૉલિવુડને તેડું; જાણો કોણ પહોચ્યું અને કોણે જવાનું ટાળ્યું?

• ભૂષણ કુમાર, રિતેશ સિધવાણી, રમેશ તૌરાણી, રાહુલ રાવેલ, પ્રસૂન જોશી, શાન, કૈલાશ ખેર, રણવીર શોરી, ઉર્વશી રાઉતેલા અને અનુ મલિક આ કાર્યક્રમમાં પહોંચ્યા
• સ્વરા ભાસ્કર, અનુરાગ કશ્યપ, સુશાંત સિંહ અને નિખિલ અડવાણીને આમંત્રણ નહોતું અપાયું

દેશના ઘણા રાજ્યોમાં નાગરિકતા સુધારો કાયદો CAA પાછો ખેંચવાની માંગ સાથે સતત વિરોધ પ્રદર્શનો થઈ રહ્યા છે. ડિસેમ્બરમાં સંસદમાં આ બિલ રજૂ થયા બાદ ધીમે ધીમે આસામમાં શરૂ થયેલી વિરોધની આગ ધીમે ધીમે આખા દેશમાં ફેલાઈ ગઈ છે. 

ગૃહ પ્રધાન અમિત શાહે આ કાયદો પાછો ખેંચવાનો ઇનકાર કરી દીધો છે. મોદી સરકાર રેલીઓ, જાહેર સભાઓ અને સોશિયલ મીડિયા દ્વારા લોકોને આના સંબંધિત બાબતોથી વાકેફ કરી રહી છે. કેન્દ્રીય પ્રધાન એક પ્રેસ કોન્ફરન્સ દ્વારા જણાવી રહ્યા છે કે વિરોધી પક્ષો તેમના ફાયદા માટે આ કાયદાના બહાને પોતાના રાજકીય રોટલા શેકી રહ્યા છે. 

આ દરમિયાન મોદી સરકારના મંત્રી પિયૂષ ગોયલ અને ભાજપ રાષ્ટ્રીય ઉપાધ્યક્ષ જય પાંડાએ મુંબઈમાં રવિવારે હ્યાત ફાઈવ સ્ટાર હોટલમાં બૉલીવુડ સિતારાઓને CAA મુદ્દે ચર્ચા કરવા માટે બોલાવ્યા હતા.

કાર્યક્રમમાં બીજેપીએ ઘણા સિતારાઓને આમંત્રણ આપ્યું હતું પરંતુ ત્યાં ફક્ત થોડા સ્ટાર્સ પહોંચ્યા હતા. રવિવાર સવારથી જ એવી અટકળો ચાલી રહી હતી કે જાવેદ અખ્તર , વિકી કૌશલ , આયુષમાન ખુરાના, રવિના ટંડન, કંગના રાનાઉત, બોની કપૂર અને મધુર ભંડારકર સહિતના ફિલ્મ જગતના મોટા ચહેરાઓ આ કાર્યક્રમમાં ભાગ લેશે પરંતુ તે બન્યું નહીં.

ભૂષણ કુમાર, રિતેશ સિધવાણી, રમેશ તૌરાણી, રાહુલ રાવેલ, પ્રસૂન જોશી, શાન, કૈલાશ ખેર, રણવીર શોરી, ઉર્વશી રાઉતેલા અને અનુ મલિક આ કાર્યક્રમમાં પહોંચ્યા હતા. મેઇનસ્ટ્રીમ બોલિવૂડ સ્ટાર્સ આ ઇવેન્ટથી દૂર રહ્યા હતા. તેમની ગેરહાજરી પાછળનું કારણ હજુ સ્પષ્ટ નથી.

અભિનેત્રી રિચા ચઢ્ઢા અને ફિલ્મ નિર્માતા કબીર ખાનને પણ આ કાર્યક્રમમાં આમંત્રણ અપાયું હતું પરંતુ તેઓ આવ્યા નહોતા. સ્વરા ભાસ્કર , અનુરાગ કશ્યપ , સુશાંત સિંહ અને નિખિલ અડવાણીને આમંત્રણ નહોતું અપાયું.

આ કાર્યક્રમમાં ઉપસ્થિત એક કલાકારે કહ્યું કે, 'મને ઘણા સ્ટાર્સ આવવાની અપેક્ષા હતી પરંતુ તે બન્યું નથી. કાર્યક્રમનો હેતુ CAA વિશેની મૂંઝવણને દૂર કરવાનો હતો. નાગરિકત્વ કાયદા વિશે ખોટી માહિતી ફેલાવવામાં આવી રહી છે અને તેમને દૂર કરવા માટે આ કાર્યક્રમ રાખવામાં આવ્યો હતો.

એવું માનવામાં આવી રહ્યું છે કે, ભવિષ્યમાં, મોદી સરકાર દ્વારા વિવિધ ક્ષેત્રના લોકો માટે આવા અનેક કાર્યક્રમો યોજવામાં આવશે જ્યાં CAA વિષે ચર્ચા કરીને તેનો વિરોધ ઓછો થઇ શકે.