સર્વે / બજેટ પહેલા બેરોજગારી, મોંઘવારીનો એવો આંકડો સામે આવ્યો કે સરકારની ઊંઘ ઉડી જશે

• 66% ભારતીયો માટે ઘર ખર્ચ ચલાવવો થયો મુશ્કેલઃ સર્વે
• ​45 વર્ષોની ઊંચાઇ પર બેરોજગારી
• 65 મહિનાની ઉચ્ચ સ્તરે મોંઘવારી

IANS-સી વોટર સર્વે મુજબ 65.8 ટકા જવાબ આપનારા માની રહ્યા છે કે, રોજબરોજના ખર્ચ કરવામાં પારાવાર મુશ્કેલી પડી રહી છે. બજેટ પૂર્વ આ સર્વે આવતા તેના તમામ પાસા ચકાસવામાં આવશે કારણ કે, વેતનમાં વૃદ્ધી થઈ રહી નથી અને જરૂરી વસ્તુઓના ભાવમાં વધારો થતાં હાલત ખરાબ થઈ રહી છે. 

45 વર્ષોની ઊંચાઇ પર બેરોજગારી

ગત વર્ષે બેરોજગારીના આંકડા 45 વર્ષની ઊંચાઈએ છે. મહત્વની વાત એ છે કે 2014માં સંયુક્ત પ્રગતિશીલ ગઠબંધન સરકારના સમય પર પણ લગભગ 65.9% લોકોનું માનવું હતું કે તેઓ પોતાના ખર્ચાઓને પહોંચી વળવામાં અસક્ષમ છે. જોકે 2015ની અપેક્ષા લોકોના મૂડ હજુ નરમ છે. વર્ષ 2015માં અંદાજિત 46.1% લોકોએ અનુભવ્યું હતું કે તેઓ પોતાના દૈનિક ખર્ચાઓને ચલાવવામાં દબાણ અનુભવી રહ્યા છે. ચિંતાનજક વાત એ છે કે ચાલૂ વર્ષ માટે લોકોના નકારાત્મક દ્રષ્ટિકોણમાં ઘણી વૃદ્ધિ દેખાઇ રહી છે. જેમાં જાણવા મળ્યું છે કે લોકો 2020માં પોતાના જીવનની ગુણવત્તામાં કોઇ સુધારો નથી દેખાઇ રહ્યો. હવે આ આંકડો હજુ પણ વધારે ખરાબ દેખાઈ રહ્યો છે. જે હાલની સરકાર માટે ચિંતાનો વિષય છે.

ખર્ચનું સંચાલન કરવામાં મુશ્કેલી

સર્વેમાં ભાગ લેનારા 30% લોકોને લાગે છે કે ખર્ચ વધ્યો છે, પરંતુ તેમ છતાં તેઓ મેનેજ કરવામાં સક્ષમ છે. આ આંકડો 2019ની સરખામણીએ નોંધપાત્ર રીતે ઓછો છે, જ્યારે 45 ટકાથી વધુ લોકોને લાગ્યું હતું કે તેઓ ખર્ચ વધવા છતાં મેનેજ કરી શકે છે. આ ઉપરાંત, 2.1 ટકા લોકોનું માનવું છે કે તેમનો ખર્ચ ઘટ્યો છે, જ્યારે એટલી જ સંખ્યાના લોકોએ આ અંગે કોઇ પ્રતિક્રિયા આપી નથી.

65 મહિનાની ઉચ્ચ સ્તરે મોંઘવારી

સત્તાવાર આંકડા મુજબ, ખાદ્યપદાર્થોના ભાવમાં મોટા પ્રમાણાં વધારાને લીધે ડિસેમ્બરમાં 65 મહિનામાં છૂટક મોંઘવારી 7.35 ટકાના ઉચ્ચ સ્તરે પહોંચી ગઇ છે. સર્વેમાં સામેલ 4292 લોકોમાંથી 43.7% લોકોએ એક પ્રશ્નના જવાબમાં જણાવ્યું કે તેમની આવક એક સમાન રહી અને ખર્ચ વધ્યો છે, જ્યારે અન્ય 28.7% લોકોએ ત્યાં સુધી કહ્યું કે, તેમનો ખર્ચ પણ વધ્યો છે, તેની સાથે આવક પણ ઘટી છે.

બજેટ પહેલા આ સર્વે ચોંકાવનારો

આ સર્વેક્ષણ 1 ફેબ્રુઆરીએ રજૂ થનારા કેન્દ્રીય બજેટ પહેલા સરકારની આંખો ખોલવાનું કામ કરી રહ્યું છે. જાન્યુઆરી 2020ના ત્રીજા અને ચોથા અઠવાડિયામાં તમામ રાજ્યો અને કેન્દ્રશાસિત પ્રદેશોમાં કુલ 11 રાષ્ટ્રીય ભાષાઓમાં આ સર્વે કરવામાં આવ્યો છે.