મનોરંજન / બૉલીવુડમાં નૈતિકતાનો અભાવ..: બૉલીવુડ વર્સિસ સાઉથ સિનેમાની ચર્ચા વચ્ચે આ અભિનેત્રીએ આપ્યું વિવાદિત નિવેદન

• બંને ઇન્ડસ્ટ્રીઝમાં કામ કરી ચુકેલી અભિનેત્રી વિવાદિત નિવેદન આપ્યું 
• બૉલીવુડ અને સાઉથ સિનેમાની વચ્ચેનો તફાવત જણાવ્યો
• હિન્દી સિનેમામાં નૈતિકતાનો અભાવ છે 

બોલિવૂડ અને ટોલીવૂડ સિનેમામાં હાલ ઘણું કોમ્પિટિશન ચાલી રહ્યું હોય એવું લાગી રહ્યું છે. તાજેતરમાં એવું જોવા મળી રહ્યું છે કે બોલિવૂડ સ્ટાર્સ સાઉથની ફિલ્મોમાં ડેબ્યૂ કરે છે અને સાઉથના સ્ટાર્સ હિન્દી ફિલ્મોમાં ડેબ્યૂ કરી રહ્યા છે. આ પછી પણ બૉલીવુડ વર્સિસ સાઉથ સિનેમાની ચર્ચા વધી રહી છે. લાંબા સમયથી બોલિવૂડની જૂજ માત્ર ફિલ્મો જ દર્શકોના દિલ જીતી રહી છે અને બાકીની ફ્લોપની યાદીમાં ઉમેરાઈ રહી છે. એવામાં આ બધા વચ્ચે હવે બંને ઇન્ડસ્ટ્રીઝમાં કામ કરી ચુકેલી અભિનેત્રી કાજલ અગ્રવાલે એક નિવેદન આપ્યું છે. 

સાઉથ ખૂબ જ ફ્રેન્ડલી ઇન્ડસ્ટ્રી છે
જણાવી દઈએ કે મૌન તોડીને કાજલ અગ્રવાલે બૉલીવુડ અને સાઉથ સિનેમાની વચ્ચેનો તફાવત જણાવ્યો છે. હાલમાં જ કાજલ અગ્રવાલ એક મીડિયા સમિટનો ભાગ બની હતી અને એ દરમિયાન અભિનેત્રીએ હિન્દી સિનેમા અને સાઉથ સિનેમા એટલે કે તમિલ, તેલુગુ, કન્નડ અને મલયાલમ વચ્ચેના તફાવત વિશે વાત કરતાં કહ્યું હતું કે 'ઘણા લોકો એવા છે કે જેઓ હિન્દીમાં પોતાનું કરિયર શરૂ કરવા માગે છે કારણ કે તે દેશભરમાં જાણીતી ભાષા છે પણ સાઉથ ખૂબ જ ફ્રેન્ડલી ઇન્ડસ્ટ્રી છે.' 

હિન્દી સિનેમામાં નૈતિકતાનો અભાવ છે 
કાજલ અગ્રવાલે સાઉથ ઈન્ડસ્ટ્રીના વખાણ કરતાં આગળ કહ્યું હતું કે 'આ ઇન્ડસ્ટ્રી ખૂબ જ સ્વીકાર્ય છે, સાઉથમાં તેજસ્વી ટેકનિશિયન, અદ્ભુત નિર્દેશકો અને સારી સામગ્રી છે જે ચારેય ભાષાઓ- તેલુગુ, તમિલ, મલયાલમ અને કન્નડમાં બનાવવામાં આવે છે. હા, હિન્દી આપણી માતૃભાષા છે. આપણે હિન્દી ફિલ્મો જોઈને મોટા થયા છીએ પણ સાઉથ ઇન્ડસ્ટ્રીની ઇકો-સિસ્ટમ, નૈતિકતા, મૂલ્યો, શિસ્ત ગમે છે, જેનો મને હિન્દી સિનેમામાં અભાવ લાગે છે.

કાજલનું આ નિવેદન સામે આવતાની સાથે જ તે હેડલાઇન્સમાં આવી ગઈ છે.