ખળભળાટ / કોડીનારમાં બાવળના ઝાડ સાથે બાંધેલી હાલતમાં અને ધુવાવ ગામે શંકાસ્પદ હાલતમાં મળ્યો મહિલાનો મૃતદેહ

• જામનગરના ધુવાવ ગામેથી મહિલાનો મૃતદેહ મળ્યો  
• મહિલા સાથે દુષ્કર્મ આચરવામાં આવ્યું હોવાનું અનુમાન
• કોડીનારમાંથી બાવળના ઝાડ સાથે બાંધેલી હાલતમાં મળ્યો મૃતદેહ  

જામનગર જિલ્લાના ધુવાવ ગામેથી મહિલાનો મૃતદેહ મળી આવતા ચકચાર  મચી જવા પામી છે.  ધુવાવ ગામે આવેલા ધિંગેશ્વર મહાદેવના મંદિર પાસેથી નિર્વસ્ત્ર હાલતમાં મહિલાની લાશ મળી આવી હતી. પ્રાથમિક તપાસમાં ધુવાવ ગામે રહેતી માનસિક અસ્થિર મહિલાનો મૃતદેહ હોવાની વિગતો સામે આવી રહી છે.  બીજી તરફ મહિલા સાથે દુષ્કર્મ આચરી અને ત્યારબાદ તેણીને મોતને  ઘાટ ઉતારી દેવામાં  આવી હોવાનું ગ્રામજનો દ્વારા અનુમાન લગાવવામાં  આવી રહ્યું છે.   

પોલીસે સમગ્ર મામલે તપાસ હાથધરી
આ ઘટનાને લઇને પોલીસને જાણ કરતાં પોલીસ કાફલો તાત્કાલિક ઘટનાસ્થળે દોડી આવ્યો હતો અને મૃતદેહને પીએમ અર્થે હોસ્પિટલ ખાતે ખસેડવા સહીતની કાર્યવાહી હાથ ધરી છે. તથા પંચકોષી એ ડિવિઝન પોલીસ મથકના PSI આર. એલ. ઑડેદરા સહીતના સ્ટાફે વધુ તપાસ હાથ ધરી છે. 

ગીરસોમનાથના કોડીનારમાંથી શંકાસ્પદ હાલતમાં મૃતદેહ મળ્યો
આ ઉપરાંત ગીરસોમનાથ જિલ્લાના કોડીનારમાંથી પણ શંકાસ્પદ હાલતમાં મહિલાનો મૃતદેહ મળી આવ્યો હતો.  કોડીનાર પંથકની સીંગોડા નદી પરના બ્રિજ પાસે બાવળના ઝાડ સાથે બાંધેલી હાલતમાં મહિલાનો મૃતદેહ સાંપડ્યો હતો. જે મહિલા માનસિક રીતે અસ્થિર હોવાનું પ્રાથમિક તારણ સામે આવ્યું છે. આથી પોલીસે દોડી જઈ મૃતદેહનો  કબજો સંભાળી પોસ્ટમોર્ટમ અર્થે ખસેડવા સહીતની કાર્યવાહી હાથ ધરી છે. બીજી તરફ મોતનું કારણ જાણવા પણ પોલીસે તપાસના ચક્રો ગતિમાન કર્યા છે.