ટ્રાફિક પોલીસ શહેરભરમાં નવા નિયમો મુજબ વાહનચાલકો પાસેથી તગડા દંડ વસૂલ કરી રહી છે. ટ્રાફિકના નિયમોનો ભંગ કરનાર વાહનચાલકોને દંડ આપવા માટે ટ્રાફિક ડ્રાઇવનું આયોજન કરી રહ્યા છે ત્યારે પોલીસ કર્મચારીઓ જ જાહેરમાં ટ્રાફિકના નિયમોનો ભંગ કરી રહ્યા છે. કારમાં બ્લેક ફિલ્મ લગાવવી ગેરકાયદે છે. જેના માટે ટ્રાફિક પોલીસ દંડ વસૂલ કરે છે પરંતુ મોટાભાગના પોલીસ કર્મચારીઓની કારમાં બ્લેક ફિલ્મ લગાવેલી હોય છે અને નંબર પ્લેટ પણ હોતી નથી તેમ છતાંય તેમની વિરુદ્ધમાં કોઇપણ કાર્યવાહી કરવામાં આવતી નથી.
શહેરમાં ટ્રાફિક દ્વારા અવારનવાર ડ્રાઇવ યોજવામાં આવે છે. જેના કારણે ટ્રાફિકના નિયમોનો ભંગ કરનારાઓમાં પણ ઘટાડો જોવા મળ્યો. હાલ ટ્રાફિક પોલીસ બ્લેક ફિલ્મ, ફેન્સી નંબર પ્લેટ કે અન્ય ટ્રાફિકના નિયમોનો ભંગ કરનારાઓ પર દંડનીય કાર્યવાહી કરી રહી છે.
પોલીસ કર્મચારીઓ પોતાની કારમાં સરેઆમ બ્લેક ફિલ્મ લગાવીને ફરી રહ્યા છે, તો અમુક પોલીસ કર્મચારીઓની કાર તો ઘણા સમય જૂની હોવા છતાં પણ નંબર પ્લેટ લગાવેલી નથી. ત્યારે કોઇ પણ પોલીસ કર્મચારીઓ તેમની કારમાં પોલીસ લખેલું બોર્ડ મૂકે તે પણ ગેરકાયદે છે. લોકોને નિયમનું પાલન કરાવતાં પહેલાં પોલીસ પોતે નિયમોનું પાલન કરે તેવું જાગૃત લોકો માની રહ્યા છે.
અમદાવાદમાં આવેલા તમામ પોલીસ સ્ટેશનો તેમજ ક્રાઇમ બ્રાંચ, એસઓજી, એટીએસ જેવી અલગ અલગ સુરક્ષા એજન્સીઓમાં ફરજ બજાવતા મોટાભાગના પોલીસ કર્મચારીઓ પોતાની કારમાં બ્લેક ફિલ્મ લગાવી રાખી છે.
કેટલાક પોલીસ કર્મચારીઓનું કહેવું છે કે આરોપીઓને પકડવા માટે કે પછી કોઇ સિસ્કી ઓપરેશન માટે જતા હોય ત્યારે કારમાં બ્લેક ફિલ્મ લગાવી હોય તો જે તે ઓપરેશન પાર પાડવામાં આસાની રહે છે. આ સિવાય કેટલાક પોલીસ કર્મચારીઓની કારમાં નંબર પ્લેટ હોતી નથી.
આરટીઓના નિયમ પ્રમાણે કાર ત્રણ હજાર કિલોમીટર કરતાં વધુ ફરી હોય તો ફરજિયાત નંબર પ્લેટ લગાવી પડે છે. જોકે પોલીસ કર્મચારીઓની કાર જૂની થઇ ગઇ હોવા છતાંય તેમાં નંબર પ્લેટ લગાવતા નથી. નંબર પ્લેટ નહીં લગાવવા પાછળનું કારણ પણ આરોપીઓને પકડવા માટેનું તેમજ રિસ્કી ઓપરેશન માટેનું હોય છે.
જો કોઈ વાહનચાલક કારમાં બ્લેક ફિલ્મ લગાવીને જતો હોય અને જોતે ટ્રાફિક પોલીસના હાથે ઝડપાઇ જાય તો તેને દંડ તો થાય છે પરંતુ જાહેરમાં તેની બ્લેક ફિલ્મ કાઢી નાખતા હોય છે. પરંતુ પોલીસ કર્મચારીઓના કારની બ્લેક ફિલ્મ ક્યારેય ઊતરતી નથી. પોલીસ કર્મચારીઓ કાર લઇને જતા હોય અને પોલીસ તેમને રોકે નહીં તે માટે તેઓ પોલીસ લખેલું બોર્ડ ડેશબોર્ડ પર મૂકી દેતા હોય છે. જેના કારણે ટ્રાફિક પોલીસ તેમને રોકતા નથી. મોટાભાગના પોલીસ કર્મચારીઓ તેમની કારના ડેશબોર્ડ પર પોલીસ લખેલું બોર્ડ રાખે છે.
જો પોલીસ સ્ટેશનના પાર્કિંગમાં પાર્ક કરેલી કારમાં ટ્રાફિક પોલીસ ડ્રાઇવનું આયોજન કરે તો સંખ્યા બંધ પોલીસ કર્મચારીઓની કાર બ્લેક ફિલ્મ અને નંબર પ્લેટ વગરની મળી શકે તેમ છે. ક્રાઇમ બ્રાંચનાં પાર્કિંગમાં સૌથી વધુ બ્લેક ફિલ્મ અને નંબર પ્લેટ વગરની કાર જોવા મળે છે.
જો ટ્રાફિકના નિયમો બધા માટે સરખા હોય તો પછી પોલીસ કર્મચારીઓને આ સ્પેશિયલ પ્રકારની છૂટ આપવામાં કેમ આવી રહી છે. આ મામલે અમદાવાદ શહેરના પોલીસ કમીશનર આશિષ ભાટિયાએ જણાવ્યું છે કે પોલીસ કર્મચારીઓ પણ બ્લેક ફિલ્મ રાખે તો તેમને પણ દંડ થઇ શકે છે અને નંબર પ્લેટ વગરની કાર હોય તો પણ દંડને પાત્ર છે આવનારા સમયમાં આ મામલે સ્પેશિયલ ડ્રાઇવ રાખવામાં આવશે.