વડોદરાની માંજલપુર બેઠક પર ભાજપમાં કોકડું ગુચવાયું છે. હવે આ બેઠક પર આનંદીબેનના દીકરી અનાર પટેલ ભાજપના ઉમેદવાર બને તેવી ચર્ચાએ જોર પકડયું છે.
વડોદરાની માંજલપુર સીટ પર ભાજપનું કોકડું ગુચવાયું
ભાજપમાં હવે માત્ર એક સીટ પર જ કોંકડું ગુચવાયું
માંજલપુરમાં આનંદીબેનના દીકરી અનાર પટેલની પણ ચર્ચા
ગુજરાત ચુંટણીને લઇને ભાજપે 182 બેઠકોમાંથી 181 બેઠકો પર પોતાના ઉમેદવારોના નામની જાહેરાત કરી દીધી છે. જેમાં એક માત્ર વડોદરાની માંજલપુર બેઠક પરના ઉમેદવારના નામને લઇને ભાજપ ગૂંચવાયુ હોવાનું સામે આવ્યું છે. સૂત્રો પાસેથી જાણાવ મળતી વિગત અનુસાર માંજલપુર બેઠકના ધારાસભ્ય યોગેશ પટેલ સાતમી વખત ચુંટણી જંગમાં ઉતરવાની હઠ લઇને બેઠા હોવાથી ભાજપની મુશ્કેલીમાં વધારો થયો હોવાનું ચર્ચાઇ રહ્યું છે. બીજી બાજુ માંજલપુર બેઠક પર આનંદીબેનના દીકરી અનાર પટેલની પણ ચર્ચા જોરશોરથી ચાલી રહી છે. કારણ કે, આ સીટ પર પાટીદાર મતદારો વધુ હોવાથી ભાજપ અનાર પટેલને ઉતારી ખેલ પાડે તો નવાઇ નહી.
સીટ પર બળવાના પણ એંધાણ
માંજલપુરમાં હિમાંશુ પટેલ, ડૉ.હિતેન્દ્ર પટેલ, સિટિંગ ધારાસભ્ય યોગેશ પટેલ અને કે.પી પટેલ સહીતના નેતાઑ દાવેદાર હોવાથી ભાજપને ઉમેદવાર પસંદગીમાં પ્રશ્ન ઊભો થયો હોય તેવી ચર્ચા ચાલી રહી છે. વડોદરા વિધાનસભાની ત્રણ બેઠકો હતી ત્યારથી ધારાસભ્ય યોગેશ પટેલ 4 વખત રાવપુરા બેઠક પર ચુંટણી લડી જીત મેળવી હતી. બાદમાં પાંચ વિધાનસભા બેઠકો થઇ હતી. જેને લઇને તેઑ 2 ટર્મથી માંજલપુર બેઠકથી જીત મેળવતા આવ્યા છે. હવે તેઑ 76 વર્ષની ઉમરે પહોંચતા ભાજપે ટિકિટ કાપી અન્ય ઉમેદવારને ઉતારવા નક્કી કર્યું છે. પરતું ટિકિટને લઇને ધારાસભ્ય યોગેશ પટેલે આડકતરી રીતે હઠ લેતા ભાજપ ગૂંચવણમાં મુકાયુ છે. ટિકિટન મળે તો આ સીટ પર બળવાના પણ એંધાણ વર્તાઇ રહ્યા છે.
આજે વધુ 3 ઉમેદવારોના નામની જાહેરાત કરાઇ
ભાજપે આજે વધૂ 3 ઉમેદવારોના નામની જાહેરાત કરી છે. જેમાં ખેરાલુ બેઠક પર ચૌધરી સમીકરણ કામ કરી ગયું છે જેમાં ભાજપે સરદારસિંહ ચૌધરીને ટિકિટ આપી છે જ્યારે માણસા બેઠક પરથી જયંતી પટેલને પસંદ કરવામાં આવ્યા છે. જ્યારે ગરબાડા બેઠક પરથી મહેન્દ્ર ભાભોરને ટિકિટ આપવામાં આવી છે.