- યોગી સરકાર 2.0ની તૈયારી તેજ થઈ ગઈ
- શુક્રવારે મુખ્યમંત્રીનો શપથ ગ્રહણ યોજાશે
- સીએમ યોગી વિધાયક દળના નેતા તરીકે ચૂંટાયા
ઉત્તર પ્રદેશમાં ફરી એકવાર ભગવો લહેરાયો છે. યોગી આદિત્યનાથ શુક્રવારે બીજી વખત રાજ્યના શપથ ગ્રહણ કરવા જઇ રહ્યા છે. ઉત્તર પ્રદેશ વિધાનસભા ચૂંટણીમાં પ્રચંડ જીત મેળવ્યા બાદ હવે યુપીમાં સરકાર બનાવવાની તૈયારીઓ જોરશોરથી ચાલી રહી છે. બીજેપી વિધાયક દળની બેઠકમાં યોગી આદિત્યનાથને નેતા તરીકે પસંદ કરવામાં આવ્યા છે. તો બીજી તરફ ડેપ્યુટી સીએમને લઇને જે સસ્પેન્સ હતુ તેની પરથી પણ પડદો હટી ગયો છે. એવુ કહેવામાં આવી રહ્યું છે કે યુપીમાં બંને ડેપ્યુટી સીએમની વાપસી નિશ્ચિત છે.
ભાજપમાં બેઠકોનો દોર
ભાજપ હાઈકમાન્ડે ગૃહમંત્રી અમિત શાહ અને રઘુવર દાસને નિરીક્ષકો તરીકે નિયુક્ત કર્યા છે જેમણે ભાજપના ધારાસભ્યો સાથે ચર્ચા કરી હતી. વિધાયક દળની બેઠક પહેલા અમિત શાહ બીજેપી હેડક્વાર્ટર પહોંચ્યા, જ્યાં તેમની સાથે યુપી બીજેપી સંગઠન મહાસચિવ સુનીલ બંસલ પણ હાજર હતા. એવું માનવામાં આવે છે કે ધારાસભ્ય દળના નેતા તરીકે ચૂંટાયા બાદ યોગી આદિત્યનાથ સાંજે રાજ્યપાલ આનંદીબેન પટેલને મળશે અને સરકાર બનાવવાનો દાવો રજૂ કરશે. આ સાથે જ એમ પણ માનવામાં આવી રહ્યું છે કે દિનેશ શર્મા અને કેશવ પ્રસાદ મોર્ય નવી સરકારમાં ફરીથી ઉપમુખ્યમંત્રી તરીકેની જવાબદારી સંભાળી શકે છે.
યોગી સરકારમાં મંત્રી કોણ હશે ?
યોગી સરકારમાં મંત્રી કોણ હશે તે અંગે તમામ પ્રકારની અટકળો ચાલી રહી છે. આ સાથે ચર્ચા એ પણ છે કે શું ફરીથી બે નાયબ મુખ્યમંત્રી બનાવવામાં આવશે ? આ દરમિયાન એવી પણ ચર્ચા થઈ રહી છે કે પછાત વર્ગના નેતા તરીકે કેશવ પ્રસાદની વાપસી લગભગ નિશ્ચિત છે. જો ચૂંટણી હારવાનો મુદ્દો આધાર બને તો પછાત વર્ગમાંથી આવતા અન્ય કોઈ નેતાને આ ખુરશી મળી શકે છે.આ રેસમાં સૌથી અસરકારક પ્રદેશ પ્રમુખ સ્વતંત્રદેવ સિંહ હોઈ શકે છે. આગ્રા ગ્રામીણના ધારાસભ્ય અને ઉત્તરાખંડના પૂર્વ રાજ્યપાલ બેબીરાની મૌર્ય દલિત અને મહિલા ક્વોટામાંથી બે પદ માટે દાવેદારી પર વિચારણા કરવામાં આવી રહી છે. તેમને નાયબ મુખ્યમંત્રી અથવા વિધાનસભાના અધ્યક્ષ બનાવી શકે છે.
ભવ્ય હશે શપથ ગ્રહણ સમારોહ
યોગી સરકાર 2.0નો શપથ ગ્રહણ સમારોહ શુક્રવારે રાજધાનીના શહીદ પથ પર સ્થિત અટલ બિહારી વાજપેયી ઇકાના સ્ટેડિયમમાં યોજાશે. વડા પ્રધાન નરેન્દ્ર મોદી, સંરક્ષણ પ્રધાન રાજનાથ સિંહ, પાર્ટીના રાષ્ટ્રીય અધ્યક્ષ જેપી નડ્ડા, રાજ્ય ચૂંટણી પ્રભારી ધર્મેન્દ્ર પ્રધાન અને રાજ્ય પ્રભારી રાધા મોહન સિંહની હાજરીમાં યોગી આદિત્યનાથ મુખ્ય પ્રધાન તરીકે શપથ લેશે. તેમની સાથે અન્ય મંત્રીઓ પણ શપથ લેશે. આ સમારોહમાં અનેક કેન્દ્રીય મંત્રીઓ, ભાજપ શાસિત રાજ્યોના મુખ્યમંત્રીઓ, રાષ્ટ્રીય સ્વયંસેવક સંઘના અધિકારીઓ, ઋષિ-મુનિઓ, વિવિધ ક્ષેત્રોની હસ્તીઓ ભાગ લેશે. શપથ ગ્રહણ સમારોહ માટે દેશભરના અગ્રણી વિપક્ષી નેતાઓને પણ આમંત્રણ આપવામાં આવ્યું છે.
