- પેપરલીક કાંડના આઠેય આરોપીઓ 9 દિ'નાં રિમાન્ડ પર
- પ્રાંતિજ જ્યુડિ. કોર્ટમાં રજૂ કર્યા બાદ હિંમતનગર લઇ જવાયા
- આરોપી જયેશ પટેલ અને અન્ય બે સાગરિત હજુ પણ ફરાર
ગુજરાતભરના વહીવટી તંત્ર માટે કાળો ધબ્બો સાબિત થયેલા હેડક્લાર્કની પરીક્ષાના પેપરલીક કેસના આરોપીના રિમાન્ડ મંજૂર થયા છે.પેપર લીક કાંડમાં ઝડપાયેલા 8 આરોપીઓને આરોપીઓને પ્રાંતિજ જ્યુડિશિયલ કોર્ટમાં રજૂ કરાયા હતા જ્યાં 9 દિવસના રિમાન્ડ મંજૂર થયા છે. આ આરોપીઓ 27મી ડિસેમ્બર સુધી રિમાન્ડ પર રહેશે. તમામ ઝડપાયેલા આરોપીઓના આઠેય આરોપીના રિમાન્ડ મંજૂર થયા બાદ હિંમતનગર લઈ જવાયા છે જો કે, મુખ્ય સુત્રધાર મનાતો એક આરોપી જયેશ પટેલ હજુ પોલીસ પકડથી બહાર છે.આ સિવાયના બે અન્ય આરોપીઓને પણ પોલીસ શોધી રહી છે. રિમાન્ડ પર રહેલા તમામ આરોપીઓની હવે સાબરકાંઠા પોલીસ પૂછપરછ કરશે.
12 ડિસેમ્બરના રોજ ગુજરાત ગૌણ સેવા પસંદગી મંડળ દ્વારા લેવામાં આવેલી હેડ ક્લાર્કની 186 જગ્યાની ભરતી માટેની પરીક્ષાનું પ્રશ્નપત્ર ફૂટી ગયાના આક્ષેપો કરવામાં આવી રહ્યાં છે ત્યારે પેપર લીકમાં શંકાસ્પદ ભૂમિકા ભજવનાર કેતન વાળંદના ક્લિનીકે પહોંચ્યું હતું સાથે જ પેપર લીકનો આક્ષેપ મામલે વિદ્યાર્થી નેતાઓએ માણસાની શાળાનું નામ આપી રહ્યા છે તે શાળાએ પણ VTVની ટીમ પહોંચી હતી.
હેડક્લાર્કની પરીક્ષાનું પેપર લીકનો આક્ષેપ મામલે વિદ્યાર્થી નેતાઓએ માણસાની શાળાનું નામ આપ્યું હતું. જે બાદ VTVની ટીમ માણસાની એસ. એફ. ચૌધરી શાળાએ પહોંચી હતી. પેપર ખરીદનાર ઉમેદવારોએ માણસાની શાળામાં પરીક્ષા આપી હતી. શાળાએ પરીક્ષાના દિવસના CCTV ચેક કર્યા હતાં. પ્રાથમિક તપાસમાં કંઇ શંકાસ્પદ જણાઇ આવ્યું નથી. પરતું પેપર ફોડનારને શાળાની બહાર જ ચેક આપવામાં આવ્યો હોવાનો આક્ષેપ પણ થયો હતો. શાળાના સંચાલકોએ આ સમગ્ર મામલે VTV સાથે વાતચીત કરી જેમાં શાળા સંચાલકોએ કહ્યું કે અમારી શાળામાં બહારના વ્યક્તિને પ્રવેશની મનાઇ છે. તેમજ પેપર લીકની તપાસમાં શાળા સંપૂર્ણ સહકાર આપશે તેવુ સંચાલકોએ જણાવ્યું હતું.
ખાનગી પ્રેસમાંથી પેપર લીક થયાની સંભાવના
હેડ ક્લાર્કની પરીક્ષા પેપર લીકકાંડમાં મહત્વની વિગતો સામે આવી છે, ખાનગી પ્રેસમાં પેપર છપાયું હોવાનું માનવામાં આવી રહ્યું છે અને ખાનગી પ્રેસમાંથી પેપર લીક થયાની પ્રબળ સંભાવના સેવાઈ રહી છે. પેપર અન્ય રાજ્યની ખાનગી પ્રેસમાં પેપર છપાયું કે કેમ તે દિશામાં પણ પોલીસે તપાસ હાથ ધરી છે, પોલીસ દ્વારા પ્રેસ સાથે સંકળાયેલા લોકોના નિવેદન લેવાશે. મહત્વનું છે કે બિન સચિવાલય પરીક્ષાનું લીક થયેલું પેપર પણ ખાનગી પ્રેસમાં છપાયું હતું ત્યારે બિન સચિવાયલની પેપર લીકની મોડસ ઓપરેન્ડીની થિયરી પર પોલીસે તપાસ શરૂ કરી છે. તેમજ અન્ય રાજ્યના કનેક્શન અંગે પણ પોલીસ તપાસ કરી રહી છે.
