છેલ્લા બે વર્ષમાં ગુજરાતમાં જાણે ભ્રષ્ટાચારીઓનો રાફોળો ફાટ્યો છે. તેમાં પણ ખેતી સાથે જોડાયેલા કૌભાંડોએ જાણે રાજ્યના માથે એક દાગ લગાવી દીધો છે.. પહેલા મગફળી કાંડ. અને હવે તુવેરકાંડ. જૂનાગઢના કેશોદમાં થયેલા તુવેરકાંડ મામલે 7 આરોપીઓ સામે ફરિયાદ થઈ છે. ત્યારે હવે પોલીસે કાંડમાં સંડોવાયેલા વધુ એક આરોપીની ધરપકડ કરી છે. પોલીસે જુનાગઢના હિતેષ મકવાણા નામના આરોપીની ધરપકડ કરી છે. જોઇએ સમગ્રે અહેવાલ.
કેશોદમાં થયેલા તુવેરકાંડમાં જૂનાગઢના DySP જે.બી ગઢવી સહિતની ટીમે આરોપી હિતેષ મકવાણાને ઝડપી પાડ્યો હતો. આજે આરોપી હિતેષને પોલીસ દ્વારા કોર્ટમા રજૂ કરવામાં આવશે. મળતી માહિતી મુજબ હિતેષ મકવાણા મજૂર મુકરદમનુ કામ કરે છે. તુવેરકાંડમાં હિતેષ મકવાણાનુ પણ નામ ખુલ્યુ હતુ. જેથી પોલીસે આરોપીની ધરપકડ કરી છે.
મહત્વનુ છે કે, આ પહેલા તુવેરકાંડમા એક આરોપી ફૈજલની પોલીસે ધરપકડ કરી હતી. ફૈજલના પોલીસે કોર્ટમાંથી 3 દિવસના રિમાન્ડ મેળવ્યા છે. હાલમાં ફૈજલ રિમાન્ડ પર છે. તમને જણાવી દઇએ કે, 24 એપ્રિલે કેશોદના માર્કેટિંગ યાર્ડમાંથી તુવેરકાંડનો પર્દાફાશ થયો હતો.
ખરીદી પૂર્ણ થતાં યાર્ડના શેડમાંથી માલ ગોડાઉન સુધી પહોંચતો કરવાનો હતો. જોકે 3 ટ્રકમાંથી નબળી ગુણવત્તાની તુવેર મળી આવી હતી. નબળી તુવેર વાળી ટેકાના ભાવે ખરીદેલી 3241 ગુણી સીઝ કરવામાં આવી હતી. અધિકારીઓ દ્વારા કુલ 90 લાખની કિંમતનો જથ્થો સીઝ કરાયો હતો. તુવેર કાંડની તપાસમાં કેશોદના રાજકીય નેતાના નામ સામે આવે તેવી શક્યતા છે. આ કેસમાં અનેક અધિકારી અને કર્મચારીના નામ પણ ખુલી શકે છે.