સુરત / 'બ્લેક મેજીકથી તારા પરિવારને પતાવી દઇશ' ભુવાએ મામા કહેતી યુવતીને ધમકી આપીને કર્યું યૌનશોષણ

• સુરતના ભુવાએ મામા કહેતી યુવતીને ધમકી આપી કર્યું યૌનશોષણ
• સુરત મહાનગરપાલિકા સંચાલિત હોસ્પિટલમાં સારવાર અર્થે ખસેડાયો
• 40 વર્ષીય બીપીન ગોવિંદ સોંધરવા અડાજણ વિસ્તારમાં રહેતો હતો

સુરતના ઉગત આવાસમાં રહેતા 40 વર્ષીય ભુવા બિપિન સોંધરવાએ પોતાને મામા કહેતી 21 વર્ષીય યુવતીને જ પિતા અને ભાઈને મારી નાંખવાની ધમકી આપી યૌનશોષણ કર્યાની ચકચારી ઘટના પ્રકાશમાં આવી છે. બળાત્કાર બાદ લગ્ન કરવાનું કહી પાંચ મહિના સુધી પોતાને ત્યાં રાખ્યા બાદ યુવતીએ રાંદેર પોલીસ મથકે ફરિયાદ નોંધાવી હતી. ઉગત વિસ્તારમાં રહેતી 21 વર્ષીય યુવતીએ નોંધાવેલી ફરિયાદ પ્રમાણે તેઓ પહેલાં રાંદેર આવાસમાં રહેતાં હતાં. જ્યારે સમાજમાં ભુવા તરીકે ઓળખાતા અને હાલ ઉગત આવાસમાં રહેતાં 40 વર્ષીય બીપીન ગોવિંદ સોંધરવા અડાજણ વિસ્તારમાં રહેતો હતો. તેની પત્નીને આ યુવતીના પિતાએ બહેન માની હોઈ તે સંબંધથી બિપીનની અવરજવર તેમના ઘરે રહેતી હતી. આ યુવતી બિપીનને મામા તરીકે સંબોધન કરતી હતી.

યુવતીના પિતા અને ભાઈને મારી નાંખવાનું કહી પોતાની સાથે રહેવા બોલાવી યૌનશોષણ કર્યું

વર્ષ 2002માં યુવતીની માતાનું અવસાન થયા બાદ ત્રણેક વર્ષે પિતાએ બીજા લગ્ન કર્યા હતા. સાવકી માતા સાથે ફાવતું નહિ હોઇ આ યુવતી બીપીનભાઈ જ્યાં રહેતા હતા ત્યાં રહેવા જતી રહી હતી. 2018માં આ ભુવાની પત્ની તેને છોડીને જતી રહેતાં બિપીન પણ ઉગત આવાસમાં રહેવા આવી ગયો હતો. આ યુવતીના પિતા અને ભાઈને મારી નાંખવાનું કહી પોતાની સાથે રહેવા બોલાવી યૌનશોષણ કરનાર ભુવાએ લગ્ન કરવાને બદલે દાસી તરીકે રાખી થોડાક મહિના બાદ તરછોડી દઈ અન્ય યુવતી સાથે રહેવા લાગ્યો હતો. યુવતીને ધમકી આપી હતી કે તારા પરિવારના સભ્યોને બ્લેક મેજીક મારફતે પતાવી નાખીશ. સમગ્ર મામલે યુવતીનું સિવિલ હોસ્પિટલમાં મેડિકલ તપાસ પણ કરવામાં આવી છે.

પોલીસની પકડથી બચવા માટે લંપટ ભુવાએ આપઘાતનો પ્રયાસ કર્યો

ઢોંગી ભુવા બિપિન સોંધરવા કરતા અડધી વયની યુવતીનું યૌનશોષણ કરી તેને દાસી તરીકે રાખી ત્રીજી યુવતીને પત્ની તરીકે રાખનાર આ હવસખોર ભૂવા વિરુદ્ધ યુવતીએ રાંદેર પોલીસ મથકે ફરિયાદ નોંધાવતાં પોલીસે તપાસ હાથ ધરી છે. જોકે ઢોંગી ભુવો  ફરાર થઈ જતા પોલીસે પકડવાના ચક્રો ગતિમાન કર્યા હતા. ત્યારબાદ આજે સુત્રો દ્વારા જાણવા મળ્યું હતું કે લંપટ ભુવા દ્વારા આપઘાતનો પ્રયાસ કરવામાં આવ્યો જેને લઇને તે સારવાર અર્થે ખસેડવામાં આવ્યો છે. જ્યાં તબિયત એની સારી હોવાનું તબીબી સૂત્રો જણાવી રહ્યા છે.