ઘરેલૂ ઉપચાર / ચોમાસામાં વાળને ખરતાં રોકવા અને ખોડાથી બચવાના બેસ્ટ ઘરગથ્થુ ઉપાય, વાળની બધી જ સમસ્યા થશે દૂર

• ચોમાસામાં પુષ્કળ ખરવા લાગે છે વાળ
• વાતાવરણમાં ભેજના લીધે મૂળ નબળા થઇ જાય છે
• ચોમાસામાં વાળમાં ફંગલ ઈન્ફેક્શથી બચાવશે આ ઘરગથ્થુ ઈલાજ

ચોમાસામાં વાળ સંબંધી સમસ્યાઓ ખૂબ જ વધી જાય છે. જેમ કે વાળ તૂટવા, પુષ્કળ વાળ ખરવા અને બેજાન વાળ. એવામાં આ સિઝનમાં વાળની યોગ્ય સંભાળ રાખવી ખૂબ જ જરૂરી છે. જો એક દિવસમાં તમારા 50થી 100 વાળ ખરતાં હોય, તો ગભરાવા કે ચિંતા કરવાના બદલે એ ધ્યાન આપો કે તમારા વાળ કેટલી ઝડપથી વધે છે. જો તમારા વાળ એક મહિનામાં દોઢ ઇંચ જેટલા વધતા હોય તો સમજી લો કે બધું બરાબર છે. 

આ વાતનું રાખો ધ્યાન

જો આમ ન હોય તો તમારા વાળને યોગ્ય માવજતની જરૂર છે. વાળના છેડા ફાટી ન જાય તેનું ધ્યાન રાખો કેમ કે તેના લીધે વાળ સારી રીતે વધતાં નથી. વાળ ધોવા માટે વધારે પડતા ગરમ પાણીનો ઉપયોગ ન કરો. ચોમાસામાં ભેજને લીધે વાળ કોરા થવામાં વધારે સમય લાગે છે તેથી બહાર જવાના થોડા સમય પહેલાં જ વાળ ધોઇ લો. બ્લો ડ્રાયરનો ઉપયોગ બને ત્યાં સુધી ન કરો. નિયમિત બ્લો ડ્રાયરના ઉપયોગથી વાળ વધારે શુષ્ક અને નિસ્તેજ બની જાય છે. કાયમ તમારા જ કાંસકા, હેરબ્રશ, ટુવાલ અને હેલમેટનો ઉપયોગ કરો.

વાળનો દુશ્મન ખોડો 

આજકાલ મોટા ભાગની મહિલાઓ ડેન્ડ્રફ એટલે કે ખોડાની સમસ્યાથી પરેશાન હોય છે. જો શરૂઆતમાં જ તેના પ્રત્યે પૂરતું ધ્યાન આપવામાં ન આવે, તો આ સમસ્યા ફંગલ ઇન્ફેકશનનું રૂપ ધારણ કરી લે છે. તેના લીધે વાળ મૂળમાંથી ખરવા લાગે છે. જો તમારા વાળમાં ખોડો થયો હોય તો બીજાનું જોઇને કે તેમની સલાહ પ્રમાણે વાળમાં કંઇ લગાવવાને બદલે નિષ્ણાતની સલાહ લો. ખોડો થવા માટે પણ અનેક કારણ જવાબદાર હોય છે અને તે દૂર કરવા માટે માત્ર નિષ્ણાત જ યોગ્ય નિદાન કરી શકે છે. તકલીફને સમજયા વગર અપનાવેલા ઉપાયથી ક્યારેક મુશ્કેલી વધી જાય છે. આજકાલ બ્યૂટિ પાર્લરમાં પણ ખોડો દૂર કરવા માટે ખાસ સ્પા ટ્રીટમેન્ટ કરવામાં આવે છે. તમે તેનો પણ લાભ લઇ શકો છો. વાળને સ્ટીમ આપવાથી પણ સારું રહેશે. ખોડાથી છુટકારો મેળવવા માટે સતત એન્ટી ડેન્ડ્રફ શેમ્પૂનો ઉપયોગ પણ ન કરો કેમ કે તેનાથી વાળના સ્વાસ્થ્ય પર ખરાબ અસર થઇ શકે છે. 

શેમ્પૂ અને કન્ડિશનર 

વાળ સ્વસ્થ અને સારા રાખવામાં શેમ્પૂ અને કન્ડિશનર પણ મહત્વના છે. બજારમાં મળતા અનેક શેમ્પૂ અને કન્ડિશનરમાંથી તમારા વાળના પ્રકારને અનુરૂપ શેમ્પૂ અને કન્ડિશનર પસંદ કરો. યોગ્ય પસંદગી કરવા માટે તમે નિષ્ણાતની મદદ લઇ શકો છો. શેમ્પૂથી વાળ ધોતી વખતે વાળને સારી રીતે ભીના કરો. તાળવા (ક્રાઉન એરિયા)ના ભાગમાં વધારે શેમ્પૂ ન લગાવવું. કન્ડિશનિંગ કરતી વખતે પણ કન્ડિશનર માથાની ત્વચા પર ન લગાવવું. શેમ્પૂ અને કન્ડિશનર ધોતી વખતે વાળને સ્વચ્છ પાણીથી સારી રીતે ધોવા જરૂરી છે. 

• ચોમાસામાં વાળ ભીના થવાથી તે વધુ શુષ્ક અને રફ થઈ જાય છે. જેને કારણે હેર ફોલ પણ વધી જાય છે તો ઘણી વખત વધુ પલળવાથી માથામાં ખોડાની સમસ્યા પણ થઈ જાય છે. આ વાળની આ બધી સમસ્યાઓને દુર કરવા તમે આ ટિપ્સ અજમાવી શકો છે. તેના માટે  કોપરેલમાં કપૂર ભેળવીને વાળના મૂળમાં માલિશ કરો. વાળમાં થતો ખોડો એનાથી દૂર થઇ જશે. 
• કોપરેલને થોડું ગરમ કરીને તેમાં એક લસણની કળી અને એક ચમચી તલનું તેલ ભેળવીને રાખો, આ તેલ ઠંડુ પડ્યા પછી માથામાં નાખવાથી ઠંડક રહે છે અને વાળ ઓછા ખરે છે. 
• વાળમાં જે તેલ લગાવતાં હો એને ગરમ કરીને આંગળીના ટેરવાંથી માથામાં પંદર મિનિટ મસાજ કરો.
• ગરમ પાણીમાં ભીંજવેલો ટુવાલ માથા પર બે-ત્રણ મિનિટ લપેટીને ટુવાલને ફરીથી ગરમ પાણીમાં ભીનો કરીને માથા પર વીંટાળી દો. ચાર-પાંચ વાર આમ કરવાથી તેલ વાળના મૂળમાં ઉતરશે અને વાળ મજબૂત બનશે.
• વાળ ધોવા માટે આ સીઝનમાં ક્યારેય આમળા, અરીઠા, શિકાકાઇ જેવા પાઉડર કે માટી, લોટ વગેરે ન વાપરતાં આયુર્વેદિક ઔષધોવાળા, વાળને પોષણ આપે તેવા જ પલ્પ કે શેમ્પૂ વાપરવા હિતાવહ છે. વાળ હંમેશાં સવારે જ ધોવા તથા થોડી વાર તડકામાં કોરા થવા દેવા જોઇએ. તડકો વાળના મૂળ માટે ફાયદાકારક છે. 
• ચોમાસા દરમિયાન વારંવાર વાળમાં મેંદી કે હેરપેક લગાવવા નુકસાનકર્તા છે. બને ત્યાં સુધી ચોમાસામાં મેંદી કે હેરપેક ન લગાવવા અને જો લગાવવા પડે તેમ જ હોય, તો પણ બને એટલા ઓછા લગાવી થોડો સમય પૂરતાં જ રાખવા.