તમારા કામનું / ધનતેરસ પર સોનું ખરીદતા સમયે રહેજો સાવધાન, છેતરપિંડીથી બચવા આ ચાર વાતોનું રાખજો ખાસ ધ્યાન

• ધનતેરસ પર સોનું ખરીદવું શુભ માનવામાં આવે છે
• સોનું ખરીદતા સમયે કેટલીક બાબતોનું ધ્યાન રાખવું જોઈએ
• સોનું ખરીદતા સમયે આ વાતોનું રાખો ધ્યાન 

દિવાળીના તહેવારને હવે ગણતરીના દિવસો બાકી રહ્યા છે અને દિવાળી પહેલા ધનતેરસ આવે છે. એ દિવસે લોકો તેમની ક્ષમતા અનુસાર સોનું પણ ખરીદે છે. કારણ કે ધનતેરસ પર સોનું ખરીદવું શુભ માનવામાં આવે છે.  કેટલાક સોનાના દાગીના ખરીદે છે તો કેટલાક સોનાના બિસ્કિટ ખરીદવાનું પસંદ કરે છે.પણ તહેવારોની સિઝનમાં એ જોવું જરૂરી બની જાય છે કે સોનું ખરીદતા સમયે કેટલીક બાબતોનું ધ્યાન રાખવું જોઈએ નહીં તો છેતરપિંડીનો શિકાર બની શકો છો. આજે અમે તમને દિવાળી અથવા ધનતેરસના અવસર પર સોનું ખરીદતી વખતે તમારે કઈ બાબતોનું ધ્યાન રાખવું જોઈએ તેવી કેટલીક વાતો વિશે જણાવવા જઈ રહ્યા છીએ. 

સોનું ખરીદતા સમયે આ વાતોનું રાખો ધ્યાન 

- પાકું બિલ જરૂરથી લો - 
જો તમે આ ધનતેરસ અથવા દિવાળીના તહેવાર પર સોનું ખરીદવાનું વિચારી રહ્યા હોય તો એ સમયે તેનું પાકું બિલ જરૂરથી લેવું જોઈએ. પાકું બિલ એટલા માટે જરૂરી છે કે ફરીથી ક્યારેય સોનું વહેંચવાની જરૂર પડે તો ત્યારે  તેમાં કોઈ સમસ્યા ઊભી થાય તો આ બિલ ઘણું મદદરૂપ સાબિત થાય છે. બસ એટલું ધ્યાન રાખો કે કાચું નહીં પણ પાકું બિલ લો. 

- હૉલમાર્ક જુઓ -
જો તમે પણ દિવાળીના તહેવાર પર સોનું ખરીદવાનો વિચાર કરી રહ્યા છો તો અસલી અને નકલી સોનામાં તફાવત કરતાં આવડવું જોઈએ નહીં તો તમારી સાથે છેતરપિંડી થઈ શકે છે. એટલા માટે જ આ તહેવારની સિઝનમાં સોનું ખરીદતી સમયે હોલમાર્ક માર્ક ચેક કરવું જરૂરી છે. હોલમાર્ક માર્કથી અસલી-નકલી સોનાની સાથે તેની શુદ્ધતાની પણ ઓળખાણ કરી શકાય છે. 

- ટાંકાનું ધ્યાન રાખો -
સોનું ખરીદતા સમયે સૌથી જરૂરી વાત એ છે કે તમારે જાણવું જોઈએ કે એ સોનામાં કેટલા ટાંકા લાગ્યા છે. જ્યારે સોનાના દાગીના બનાવવામાં આવે છે, ત્યારે તેમાં ચાંદી, તાંબુ, રાગા અથવા અન્ય ધાતુઓથી ટાંકા લગાવવામાં આવે છે. એટલા માટે એ જાણી લો કે કેટલા ગ્રામ સોનામાં કેટલા ગ્રામણઆ ટાંકા લગાવવામાં આવ્યા છે.

- વિશ્વસનીય જગ્યાએથી જ ખરીદો -
આ દિવાળી અથવા ધનતેરસ પર સોનું ખરીદતી વખતે વિશ્વાસપાત્ર જગ્યાએથી જ સોનું ખરીદવું જોઈએ. તમે કોઈ મોટા અને જાણીતા સ્ટોરમાંથી સોનું ખરીદી શકો છો પણ એવી જગ્યાએથી સોનું ન ખરીદો જ્યાં તમારી સાથે છેતરપિંડી થઈ શકે.