IPL 2023 / ઈન્ડિયન પ્રીમિયર લીગની આગામી સિઝન માટે  BCCIની તૈયારી, 16 ડિસેમ્બરે હરાજી થવાની શક્યતા

• BCCIની ઈન્ડિયન પ્રીમિયર લીગની આગામી સિઝન માટે તૈયારી
• BCCI આ વર્ષે 16 ડિસેમ્બરે હરાજી કરવાની યોજના બનાવી રહ્યું છે: અહેવાલો 
• મેગા ઓક્શનમાં જે રકમ 90 કરોડ રૂપિયા હતી તે વધારીને 95 કરોડ કરવામાં આવશે

ભારતીય ક્રિકેટ કંટ્રોલ બોર્ડ ઈન્ડિયન પ્રીમિયર લીગની આગામી સિઝન માટે તૈયારી કરી રહ્યું છે. જ્યારે 2022ની સીઝનમાં મેગા ઓક્શનમાં ટીમોમાં ઘણો બદલાવ આવ્યો હતો, ત્યારે ચાહકોને મીની ઓક્શન જોવા મળશે. જો અહેવાલો પર વિશ્વાસ કરવામાં આવે તો, બીસીસીઆઈ આ વર્ષે 16 ડિસેમ્બરે હરાજી કરવાની યોજના બનાવી રહ્યું છે.

આ સાથે મેગા ઓક્શનમાં જે રકમ 90 કરોડ રૂપિયા હતી તે પણ વધારીને 95 કરોડ કરવામાં આવશે. એક અહેવાલ મુજબ એક વિશ્વસનીય સ્ત્રોતે પુષ્ટિ કરી છે કે,  મીની હરાજી 16 ડિસેમ્બરે બેંગલુરુમાં થશે.

ઈન્ડિયન પ્રીમિયર લીગ 2023ની સીઝનથી કોવિડ-19 પહેલા તેના મૂળ ફોર્મેટમાં પરત ફરશે, જેમાં ટીમો તેમના હોમ ગ્રાઉન્ડ પર અને વિરોધી ટીમના મેદાન પર મેચ રમતી હતી. ભારતીય ક્રિકેટ બોર્ડ BCCI ના પ્રમુખ સૌરવ ગાંગુલીએ આ અંગે બોર્ડ સાથે જોડાયેલા એકમોને જાણ કરી છે.

મહત્વનું છે કે, વર્ષ 2020માં કોવિડ -19 રોગચાળાના ફાટી નીકળવાના કારણે, કેટલીક જગ્યાએ IPLનું આયોજન કરવામાં આવ્યું હતું. વર્ષ 2020માં દુબઈ, શારજાહ અને અબુ ધાબીમાં સંયુક્ત આરબ અમીરાતના ત્રણ સ્થળોએ ખાલી સ્ટેડિયમમાં તેનું આયોજન કરવામાં આવ્યું હતું. વર્ષ 2021માં આ T20 ટૂર્નામેન્ટ ચાર સ્થળોએ દિલ્હી, અમદાવાદ, મુંબઈ અને ચેન્નાઈમાં આયોજિત કરવામાં આવી હતી, પરંતુ હવે રોગચાળો કાબૂમાં છે અને તેથી આ લીગ હોમ ગ્રાઉન્ડ અને વિરોધી ટીમના મેદાનના જૂના ફોર્મેટમાં રમાશે.