- બાંગ્લાદેશમાં હિન્દુઓ હુમલાનો મામલો
- પ્રધાનમંત્રી હસીનાએ તપાસના આદેશ આપ્યા
- હસીનાએ ભારતને પણ આપી દીધી શિખામણ
બાંગ્લાદેશમાં દુર્ગા પૂજા દરમિયાન હિન્દુઓ પર થયેલા હિંસક હુમલા મામલે હવે બાંગ્લાદેશના પ્રધાનમંત્રી શેખ હસીના સામે આવ્યા છે. હિન્દુઓના મંદિરો પર થયેલા હુમલાઓની પ્રધાનમંત્રી હસીનાએ નિંદા કરી છે અને કહ્યું છે કે જે કોઈ પણ આ હુમલાઓ સામેલ હતા તેમને છોડવામાં આવશે નહીં, ભલે પછી તે ગમે તે ધર્મના હોય. જોકે આ સાથે જ શેખ હસીનાએ ભારતને પણ શિખામણ આપી દીધી છે.
શું કહ્યું હસીનાએ
BBC બાંગ્લાના અહેવાલ અનુસાર શેખ હસીનાએ કહ્યું છે કે ભારતમા પણ એવું કઈ ન થવું જોઈએ જેની અસર બાંગ્લાદેશ પર પડે અને અહિયાં હિન્દુઓને નુકસાન થાય. શેખ હસીનાએ કહ્યું કે કોમિલલા જિલ્લામાં થયેલ ઘટનાની તપાસ કરવામાં આવી રહી છે અને તે વાતથી કોઈ ફરક નથી પડતો કે ઉપદ્રવી કયા ધર્મના હતા. ભારત માટે હસીનાએ કહ્યું કે દુનિયાભરમાં આતંકવાદી ઘટનાઓ વધી રહી છે. પડોશી દેશે પણ આ મામલે સતર્ક રહેવાની જરૂર છે. ભારતે અમારી આઝાદીની લડાઈમાં ખૂબ મદદ કરી છે જેનાં માટે અમે હંમેશા કૃતજ્ઞ રહીશું. પણ ભારતમાં પણ એવી કોઈ ઘટના ન થવી જોઈએ જેની અસર અમારા દેશ પર પડે અને દેશના હિન્દુઓને નુકસાન પહોંચે. ત્યાં પણ સતર્કતા રાખવાની જરૂર છે.
બાંગ્લાદેશમાં ઠેર ઠેર રમખાણો, સેનાને ઉતારવામાં આવી
બાંગ્લાદેશમાં હિન્દુઓ સાથે હિંસા બાદ ત્રણ લોકોના માર્યા ગયાનાં સમાચાર ફેલાતા આખા બાંગ્લાદેશમાં ભારેલા અગ્નિ જેવી સ્થિતિ થઈ છે. હાલમાં પરિસ્થિતિને કંટ્રોલ કરવા માટે સરકારે 22 જિલ્લાઓમાં પેરા મિલીટરી ફોર્સ તૈનાત કરી દીધી છે.
દુર્ગાપૂજામાં થઈ હિંસા, 3નાં મોત
હિન્દુઓમાં નવરાત્રીએ એટલે જગતજનનીની આરાધનાનો તહેવાર, માઈભક્તો માટેના સૌથી મોટા તહેવારનું પૂર્વ ભારતમા ખૂબ મહત્વ છે. બંગાળી લોકો દુર્ગા પૂજા કરીને આ તહેવારની ઉજવણી કરે છે ત્યારે નવરાત્રીમાં ભારતના પડોશી દેશ બાંગ્લાદેશમાં દુર્ગા પૂજા દરમિયાન હિંસાની ઘટનાઓ સામે આવી છે. બાંગ્લાદેશ પોલીસ અનુસાર દુર્ગા પૂજા દરમિયાન ચાંદપૂર જિલ્લામાં હિન્દુ મંદિર પર ભીડ તૂટી પડી અને હુમલાઓ કર્યા. જે બાદ હિંસામાં ફાયરિંગમાં ત્રણ લોકોના મોત સામે આવ્યા છે. બાંગ્લાદેશ હિન્દુ યુનિટી કાઉન્સિલ દ્વારા ટ્વિટ કરીને કહેવામાં આવ્યું છે કે 13 ઓકટોબરનાં રોજ આઠમના નોરતે જ અનેક દુર્ગા પંડાલમાં તોડફોડ કરવામાં આવી છે. આજે આખી દુનિયા ચૂપ છે. નોંધનીય છે કે કાઉન્સિલ દ્વારા બાંગ્લાદેશનાં પ્રધાનમંત્રી શેખ હસીનાથી માંગ કરવામાં આવી છે કે હિન્દુઓને સુરક્ષા આપવામાં આવે. કાઉન્સિલે કહ્યું કે મુસ્લિમો નથી ઇચ્છતા કે હિન્દુઓ પૂજા કરે. મહેરબાની કરીને આર્મી મોકલવામાં આવે.
