નવતર પ્રયોગ / હવે ગુજરાતમાં અહીં દૂધની સાથે ગાય-ભેંસના ગોબર પણ થશે વેચાણ, દેશનો આ પ્રકારનો પ્રથમ પ્લાન્ટ

• બનાસડેરીએ દેશનો પ્રથમ ગોબરમાંથી CNG પંપ બનાવ્યો
• લોકો હવે દૂધની સાથે હવે ગાય-ભેંસના ગોબર પણ વેચાણ
• રોજનું 40 હજાર કિલો ગોબર ખરીદવામાં આવશે

બનાસકાંઠા પશુપાલકો બાયોગેસ પ્લાન્ટ મારફતે ગાય-ભેંસના છાણમાંથી પણ આવક મેળવતા થયા છે. ડીસા તાલુકાના દામા ગામ પાસે અધ્યતન બાયોગેસ પ્લાન્ટ તૈયાર થઈ ગયો છે. આજુબાજુના ખેડૂતો પશુપાલકો અહીં દૂધની જેમ ગોબર ભરાવી રહ્યા છે અને તેમાંથી કમાણી કરતા થયા છે. અહીંયા ઉત્પન્ન થતા ગેસનું શુદ્ધિકરણ કરીને તેનું બોટલિંગ કરી વાહનોના ઇંધણ તરીકે કામમાં લેવાશે પ્લાન્ટની નજીક ગેસ સ્ટેશન ઉભુ કર્યું છે. જ્યાંથી વાહનોમાં બળતણ તરીકે ગેસ ભરાવી શકાશે. આગામી સમયમાં આવા CNG પંપ દરેક તાલુકા મથકે પણ ઉભા થશે અને ગ્રામ્ય વિસ્તારની પ્રજાને પણ લાભ મળતો થશે.

બનાસડેરી દિન-પ્રતિદિન પશુપાલકોના હિતમાં કાર્યરત બની છે જેને લઇને હવે ગાય-ભેંસના ગોબરના ભાવ આવી ગયા છે. ડેરીએ દેશનો સૌપ્રથમ ગોબરમાંથી ગેસ ઉત્પન્ન કરીને તેને શુદ્ધિકરણ કરી CNG પંપ બનાવ્યો છે જેનું ટેસ્ટિંગ થઈ ગયું છે અને ટૂંક સમયમાં જ તે કાર્યરત થઈ જશે. બનાસડેરીએ પશુપાલકોને દૂધની સાથે ગાય-ભેંસના ગોબરની પણ કિંમત મળે તે દિશામાં પ્રયાસ હાથ ધર્યો છે. જેને લઇને ડીસા પાસેના દામા ગામે ગોબરગેસ પ્લાન્ટ બનાવી તેમાંથી ઉત્પન્ન થતાં ગેસ દ્વારા બાજુમાં CNG પંપ બનાવ્યો છે. જેને લઇ આજુબાજુના ગામના લોકો દૂધની સાથે હવે ગાય-ભેંસનું ગોબર પણ વેચાણ કરી રહ્યા છે.

આ પ્રકારનો દેશનો પ્રથમ ગેસપ્લાન્ટ

દેશનો સૌપ્રથમ ગેસ પ્લાન્ટની સાથે તેની રબડીમાંથી ઉત્તમ પ્રકારનું સેન્દ્રીય ખાતર બનશે. જૈવિક ખેતીને પ્રોત્સાહનની સાથે પર્યાવરણની રક્ષા પણ થશે અને જિલ્લો ઓર્ગેનિક જિલ્લો બને તે દિશામાં કામ કરશે.

ગોબર કેટલા રૂપિયામાં ખરીદાશે?

એક કિલો ગોબર રૂપિયા એકમાં ખરીદી રોજનું 40 હજાર કિલો ગોબર ખરીદવામાં આવશે અને બાયો પ્રોડક્ટ તરીકે ખાતર બનશે. અહીં બાય પ્રોડક્ટ તરીકે સોલિડ અને લિકવિડ ઓર્ગનીક ખાતર બનશે તે પણ પશુપાલકોને ખેતીમાં મદદરુપ બનશે. જિલ્લામાં દરેક તાલુકામાં 50 જેટલા બાયોગેસ પ્લાન્ટ બનાવીશું. જેથી સમગ્ર જિલ્લાના ખેડૂતોને, પશુપાલકોને આનો સીધો ફાયદો થાય અને દૂધની સાથે ગોબરમાંથી પણ કમાણી કરી શકશે.