નિર્ણય / ભારતના આ પડોશી દેશમાં પાણીપુરી પર લગાવાયો પ્રતિબંધ, જાણો કેમ અચાનક લેવાયો મોટો નિર્ણય

• નેપાળની કાઠમંડુ ખીણમાં લલિતપુરમાં પાણીપુરી પર પ્રતિબંધ 
• કોલેરા ઝડપથી ફેલાતા તંત્રેએ એક્શનમાં આવી લીધો મોટો નિર્ણય
• કોઈ આવું કરતા પકડાય છે તો તેને દંડની સાથે જેલ પણ જવું પડી શકે છે

ભારતના પડોશી દેશ નેપાળની કાઠમંડુ ખીણમાં લલિતપુરમાં પાણીપુરી(ગોલગપ્પા)ના વેચાણ પર હાલ માટે પ્રતિબંધ મુકવામાં આવ્યો છે. અહીં કોલેરા ઝડપથી ફેલાઈ રહ્યો છે. લલિતપુર મેટ્રોપોલિટન સિટી (LMC) દ્વારા કરવામાં આવેલી તપાસમાં જાણવા મળ્યું છે કે, પાણીપુરી(ગોલગપ્પા)માં ઉપયોગમાં લેવાતા પાણીમાં કોલેરાના બેક્ટેરિયા મળી આવ્યા છે. કાઠમંડુ મેટ્રોપોલિટન સિટીએ 30 જૂનથી શેરીઓમાં ખોરાકના વેચાણ પર પ્રતિબંધ મૂક્યો છે. 

શું કહ્યું કોર્પોરેશને ? 

કોર્પોરેશને કહ્યું છે કે, તેમણે કોલેરા પર નિયંત્રણ માટે આ પગલું ભર્યું છે. કાઠમંડુ ખીણમાં કોલેરાના દર્દીઓની સંખ્યા વધી રહી હોવાથી પાણીપુરી(ગોલગપ્પા) જેવી પાણી આધારિત ખાદ્ય વસ્તુઓનું વેચાણ બંધ કરી દેવામાં આવ્યું છે. વહીવટીતંત્ર આ બાબતે કડક છે. આદેશમાં કહેવામાં આવ્યું છે કે જો કોઈ આવું કરતા પકડાય છે તો તેને દંડની સાથે જેલ પણ જવું પડી શકે છે.

આરોગ્ય વિભાગના વડાએ શું કહ્યું ? 

શહેરના આરોગ્ય વિભાગના વડા બલરામ ત્રિપાઠીએ જણાવ્યું હતું કે, વિભાગે ફૂડ ટેક્નોલોજી અને ગુણવત્તા નિયંત્રણ વિભાગને હોટેલ રેસ્ટોરાંની ખાદ્ય સ્વચ્છતાની તપાસ કરવા જણાવ્યું છે. શહેરીજનોની સુવિધા માટે 24 કલાક 1180 હોટલાઇન ટેલિફોન સેવા શરૂ કરવામાં આવી છે.

પાણીપુરી(ગોલગપ્પા) સ્વાસ્થ્ય માટે હાનિકારક ? 

હકીકતમાં, પાણીપુરી(ગોલગપ્પા)માં વપરાતા પાણીને ખાટા બનાવવા માટે દુકાનદારો સામાન્ય રીતે કાચી અને સૂકી કેરી, આમલી, લીંબુ જેવી વસ્તુઓ મિક્સ કરે છે. પરંતુ કેરી દરેક ઋતુમાં મળતી નથી અને લીંબુ પણ મોંઘા થઈ જાય છે. તેથી દુકાનદારો તેને હાઈડ્રોક્લોરિક એસિડ, સલ્ફ્યુરિક એસિડ, ટારટેરિક એસિડ, ઓક્સાલિક એસિડ ખરીદે છે. ફુદીનાની રેખાઓ પર પાણી લીલું દેખાય તે માટે કૃત્રિમ રંગો ઉમેરવામાં આવે છે. આ વસ્તુઓ સ્લો પોઈઝનનું કામ કરે છે અને સ્વાસ્થ્યને બગાડે છે.  પાણીપુરી(ગોલગપ્પા)ના પાણીમાં વધુ મીઠું વાપરવામાં આવે છે. જેના કારણે હાઈ બ્લડ પ્રેશરની સમસ્યા પણ થવા લાગે છે. સામાન્ય રીતે, મોટા ભાગના દુકાનદારો વધુ નફો મેળવવા માટે સસ્તા અને હલકી ગુણવત્તામાં ગોલગપ્પા તળે છે. ઘણીવાર વપરાયેલ તેલનો પણ ઉપયોગ થાય છે.

નોંધનીય છે કે, વર્લ્ડ હેલ્થ ઓર્ગેનાઈઝેશન (ડબ્લ્યુએચઓ) અનુસાર, કોલેરા ત્યારે થાય છે જ્યારે વિબ્રિઓ કોલેરા બેક્ટેરિયા ગંદા પાણી દ્વારા શરીરમાં પહોંચે છે. જ્યાં સ્વચ્છતાનું ધ્યાન રાખવામાં આવતું નથી ત્યાં તેના ફેલાવાનું જોખમ વધારે છે. કોલેરાના લક્ષણો- પેટ ખરાબ થવુ, ઉલ્ટી થવી, બ્લડ પ્રેશર ઓછું થવુ, મોં, ગળું અને આંખો શુષ્ક થવી, વધુ પડતી તરસ લાગવી, થાક લાગવો, પેશાબ બંધ થવો વગેરે. કોલેરા બાળકો માટે વધુ ઘાતક સાબિત થાય છે.