ગુજરાત / સમાજને કલંકિત કરતી ઘટનાઃ હિંમતનગર બાદ દાહોદમાં કુવામાંથી મળી 2 દિવસની ત્યજેલી નવજાત બાળકી

• ગુજરાતમાં માનવતાને શર્મસાર કરતી ઘટના
• દાહોદમાં કુવામાંથી મળી નવજાત બાળકી
• હિંમતનગરમાંથી ખેતરમાંથી મળી નવજાત બાળકી

બેટી બચાવોના સૂત્ર હેઠળ રાજ્ય સરકાર તેમજ કેન્દ્ર સરકાર કરોડો રૂપિયાનો ખર્ચ કરે છે. તો બીજી તરફ સામાજિક આગેવાનો સહિતના નેતાઓ સામાજિક સમરસતાની વાતો કરે છે. ત્યારે આજના તબક્કે પણ દીકરીનું સ્થાન કેટલુ સબર બન્યું તેના 2 જીવંત દાખલા સામે આવ્યા છે.

દાહોદમાં કુવામાંથી મળી નવજાત બાળકી
દાહોદમાં ગરબાડા ભેં ગામે કુવામાંથી 2 દિવસની ત્યજેલી નવજાત બાળકી મળી આવી. ગ્રામજનોએ કૂવામાં બાળકી મળતા પોલીસને જાણ કરી હતી. પોલીસે બાળકીને કુવામાંથી બહાર કાઢીને હોસ્પિટલ ખસેડી હતી. બાળ કલ્યાણ સમિતિના ચેરમેન સહિતની ટીમોએ મુલાકાત કરી હતી. પોલીસે બાળકીના માતા-પિતાની શોધખોળ હાથધરી હતી.

હિંમતનગરમાંથી ખેતરમાંથી મળી નવજાત બાળકી
હિંમતનગરના ગાંભોઈ નજીક આવેલા ખુલ્લા ખેતરમાંથી મળી આવ્યો છે. આ ખેતરમાં તાજી જન્મેલી દીકરી જમીનમાં દાટી દેવાયેલી હાલતમાં મળી આવી છે. ગાંભોઈના GEB ઓફિસ પાસેના ખુલ્લા ખેતરમાં કામ કરી રહેલા ખેત મજૂરોને જમીનમાં રડતી બાળકીનો અવાજ સંભળાતા તેમને સ્થાનિક કચેરીએ જાણ કરી હતી. બાદમાં અધિકારીઓએ આ બાળકીને જીવતી બહાર કાઢી તાત્કાલિક ધોરણે 108 મારફતે હિંમતનગર સિવિલ હોસ્પિટલ ખાતે ખસેડી છે.

આ અંગે હિંમતનગર સિવિલ હોસ્પિટલના સિવિલ સર્જને જણાવ્યુ કે નવજાત બાળકીને જમીનમાં દાટેલી રાખી હોવા છતાં હાલના તબક્કે તે સ્વસ્થ છે. ઘટનાની જાણ થતા ગાંભોઇ ગામ સહિતના આસપાસના વિસ્તારના લોકો બેરહેમ માતા-પિતા વિરુદ્ધ ફિટકાર વરસાવી રહ્યા છે. આ અંગે મહિલા ઉત્કર્ષનું કામ કરનારા લોકોએ પણ તિરસ્કાર રજૂ કર્યો છે તથા હાલના આધુનિક સમયમાં પણ દીકરીને લોકો સાપનો ભારો ગણતા હોવાનું જણાવી દુ:ખ વ્યક્ત કર્યું હતું.