શહેરમાં ચોરીની ઘટના દિવસેને દિવસે વધી રહી છે ત્યારે પોલીસ અને ક્રાઇમબ્રાંચ ચોર ટોળકીને પકડવા માટે રાત દિવસ એક કરે છે. એપ્રિલ મહિનામાં ચાંદખેડા વિસ્તારમાં એક ગર્ભવતી મહિલાના ઘરમાં ઘુસી જઈને લૂંટની ઘટનાને અંજામ આપનાર એક ચોરની ક્રાઇમબ્રાન્ચએ ઋષિકેશથી ધરપકડ કરી છે. એટલાસના મેપથી લોકેશન જોઈને ચોરીની ઘટનાને અંજામ આપતા હતા.
એપ્રિલ મહિનામાં ચાંદખેડા વિસ્તારમાં એક યુવક ધોળા દિવસે ઘરમાં ઘૂસીને લૂંટની ઘટનાને અંજામ આપ્યો હતો. ગર્ભવતી મહિલા ઘરે એકલી હતી તે સમયે યુવક ઘરમાં ઘુસી ગયો હતો અને પાણી પીવાના બહાને મહિલા સાથે વાત કરતો હતો. મહિલા પાણી લેવા માટે રસોડામાં ગઈ ત્યારે યુવકે ચોરી કરી હતી. દરમિયાનમાં મહિલાનો દિયર ઘરે આવી જતા યુવકે તેના માથા પર સાનસી મારીને નાસી ગયો હતો.
આ કેસની તપાસ ક્રાઇમ બ્રાન્ચને સોંપવામાં આવી હતી જેમાં બે મહિના બાદ સફળતા મળી છે. ક્રાઇમબ્રાન્ચએ ઋષિકેશથી રણજીત ઉર્ફે રાણા ગોરાયાની ધરપકડ કરી છે. રણજીત તેના સાગરીત સુનિલ અને સંદીપ સાથે ચોરી કરે છે. ત્રણેય ત્રિપુટીએ અમદાવાદ સહિત રાજસ્થાન, કિશનગઢ, યુપી, હરિયાણામાં ચોરી કરી છે. તેમની મોડ્સ ઓપેન્ડિની વાત કરીએ તો રણજીત અને તેના મિત્રો બાઈક અને કાર લઈને યુપી થી કોઇપણ રાજ્યોમાં જતા હતા.
તેમની પાસે એટલાસનો મેપ રહેતો હતો જેમાં થી તે કોઇપણ રાજ્યોમાં કે, જ્યાં ચોરી કારવાની હોય તેના રસ્તા જોતા હતા. એક ચોર હાઇવે પર કાર અથવા બાઈક લઈને ઉભો રહેતો હતો જ્યારે બે લોકો શહેરમાં જઇને ચોરીની ઘટનાને અંજામ આપતા હતા.