ડ્રગ્સ કેસ / NCBની SIT ટીમે આર્યન ખાનને સમન્સ તો મોકલ્યું પણ ન થયો હાજર, જુઓ શું આપ્યું કારણ

• ડ્રગ્સ કેસ મામલે તપાસનો ધમધમાટ
• આર્યન ખાન SIT સમક્ષ ન થયો હાજર
• તાવ આવતો હોવાનું દર્શાવ્યું કારણ

સૂત્રો દ્વારા પ્રાપ્ત થયેલી જાણકારી પ્રમાણે, આર્યન ખાનને તાવ આવતો હોવાથી તે SIT સમક્ષ હાજર રહી શક્યો નહોંતો. મળતી જાણકારી પ્રમાણે, આર્યન ખાન સિવાય NCBએ અજય મર્ચન્ટ અને નવાબ મલિકના જમાઈ સમીર ખાનને પણ વધુ પૂછપરછ માટે બોલાવી શકે છે. નોંધનીય છે કે, NCB દ્વારા ઝોનલ ડાયરેક્ટર સમીર વાનખેડે પાસેથી ક્રૂઝ ડ્રગ્સ કેસ મામલા સહિત કુલ 6 કેસ પરત ખેંચ્યા છે. 

સમીર વાનખેડે બાદ NCBની વિભાગીય ટીમ કરી રહી છે તપાસ 

ઉલ્લેખનીય છે કે, બોલિવૂડ સુપરસ્ટાર શાહરૂખ ખાનનો પુત્ર આર્યન ખાન, અરબાઝ મર્ચન્ટ ક્રૂઝ ડ્રગ્સ પાર્ટી કેસમાં આરોપી છે. મુંબઈના દરિયાકાંઠે ક્રુઝ પર દરોડા દરમિયાન 3 ઓક્ટોબરના રોજ બંનેની ધરપકડ કરવામાં આવી હતી.

સમીર વાનખેડે આ ક્રૂઝ ડ્રગ્સ કેસ અને સમીર ખાન વિરુદ્ધ ડ્રગ્સ કેસની તપાસ કરી રહ્યા હતા. પરંતુ ક્રુઝ કેસમાં, તપાસમાં સામેલ લોકો દ્વારા એક સાક્ષીએ કથિત વસૂલીના આરોપ કર્યા બાદ વાનખેડેને કેસથી અલગ કરવામાં આવ્યા છે. હવે NCBની વિભાગીય ટીમ પણ તેના આરોપોની તપાસમાં લાગેલી છે. સમીર વાનખેડે દ્વારા તપાસ કરવામાં આવતા આવા છ કેસ શુક્રવારે એજન્સીની કેન્દ્રીય ટીમને ટ્રાન્સફર કરવામાં આવ્યા હતા.

નિયમિત પ્રક્રિયા હોવાની કરી વાત 

સૂત્રોએ જણાવ્યું કે, 6 મામલામાં કથિત ઓરોપીઓને NCBની SIT ટીમ દ્વારા એવું કહેતા જ પૂછપરછ માટે બોલાવ્યા હતા કે, નવી તપાસ ટીમ આવ્યા બાદ આ એક નિયમિત પ્રક્રિયા છે.