સાવચેતી / અજાણ્યા શખ્સનું કારસ્તાન, RSS મુખ્યાલયને બોંબથી ઉડાવી મૂકવાની ધમકી, સુરક્ષા વધારાઈ

• નાગપુરમાં RSS ના મુખ્યાલયને બોમ્બથી ઉડાવી દેવાની ધમકી
• શનિવારે સુરક્ષા કડક કરવામાં આવી
• સીઆરપીએફની ટુકડી સુરક્ષામાં તૈનાત છે

 મહારાષ્ટ્રના નાગપુરમાં રાષ્ટ્રીય સ્વયંસેવક સંઘ (RSS)ના મુખ્યાલયને બોમ્બની ધમકી આપવામાં આવી છે. શનિવારે અહીં સુરક્ષા કડક કરવામાં આવી છે. પોલીસે જણાવ્યું કે અજાણ્યા વ્યક્તિએ ફોન પર ધમકી આપી છે. તેની તપાસ કરવામાં આવી રહી છે. DCP ઝોન III ગોરખ ભામરેએ જણાવ્યું કે બપોરે 1 વાગ્યે પોલીસ કંટ્રોલ રૂમમાં કોલ આવ્યો હતો. એક વ્યક્તિએ મહલ વિસ્તારમાં આરએસએસના મુખ્યાલયને ઉડાવી દેવાની ધમકી આપી છે.

Maharashtra | Police Control Room today received a call from an unknown person threatening to blow up RSS headquarters. Investigation underway: Amitesh Kumar, CP Nagpur

— ANI (@ANI) December 31, 2022

બોમ્બ ડિસ્પોઝલ સ્ક્વોડ (બીડીડીએસ) અને ડોગ સ્ક્વોડ ટીમને બોલાવવામાં આવી હતી:ડીસીપી
ડીસીપીએ કહ્યું કે બોમ્બ ડિસ્પોઝલ સ્ક્વોડ (બીડીડીએસ) અને ડોગ સ્ક્વોડ ટીમને બોલાવવામાં આવી હતી. કેમ્પસમાં તપાસ કરવામાં આવી હતી, પરંતુ કંઈપણ શંકાસ્પદ મળ્યું ન હતું. ડીસીપીએ કહ્યું કે સાવચેતીના ભાગરૂપે પેટ્રોલિંગ વધારી દેવામાં આવ્યું છે. ફોન કરનારની ઓળખ કરવા માટે પોલીસ ફોન નંબરનું લોકેશન ટ્રેસ કરી રહી છે.

સીઆરપીએફની ટુકડી સુરક્ષામાં તૈનાત છે
મળતી માહિતી મુજબ, સંઘ મુખ્યાલયમાં પહેલેથી જ મજબૂત સુરક્ષા વ્યવસ્થા છે. સીઆરપીએફની ટુકડી સુરક્ષામાં તૈનાત છે. આ સાથે નાગપુર પોલીસે બહારના સર્કલ પર સુરક્ષા કોર્ડન કરી છે. અહીં પહેલાથી જ વિડીયોગ્રાફી અથવા કોઈપણ પ્રકારના ડ્રોન ઉડાડવા પર પ્રતિબંધ છે. શનિવારે સવારે ફરી એકવાર RSS મુખ્યાલયની સુરક્ષા વધારી દેવામાં આવી છે. વધારાની પોલીસ ફોર્સ તૈનાત કરવામાં આવી છે. નજીકમાં રહેતા લોકોની અવરજવર પર પણ ખાસ નજર રાખવામાં આવી રહી છે.

શનિવારે એક વ્યક્તિએ નાગપુર પોલીસ કંટ્રોલ રૂમને ફોન કરીને RSS હેડક્વાર્ટરને ઉડાવી દેવાની ધમકી આપી હતી. જે બાદ સમગ્ર વિભાગ સવારથી જ એક્શનમાં આવી ગયું હતું. તમને જણાવી દઈએ કે સમગ્ર વિસ્તારમાં ડ્રોન ઉડાડવાની મનાઈ ફરમાવવામાં આવી છે. તેમજ  'નો ડ્રોન' ઝોન જાહેર કરવામાં આવેલ છે. ત્યારે જો તે વિસ્તારની બે કિમીની ત્રિજ્યામાં આવી વસ્તુઓ ઉડાડવામાં આવે તો કડક કાયદાકીય કાર્યવાહી કરવામાં આવે છે. જો આવી વસ્તુઓ મળી આવે તો પોલીસ દ્વારા તેનો નાશ કરવામાં આવે છે અથવા જપ્ત કરવામાં આવે છે.