BIG NEWS / ઑસ્ટ્રેલિયામાં BAPS બાદ વધુ એક હિન્દુ મંદિર પર હુમલો, ખાલિસ્તાનીઓએ કરી તોડફોડ

• મેલબોર્નમાં હિન્દુ મંદિર પર 5 દિવસમાં બીજી વખત હુમલો
• ખાલિસ્તાન સમર્થકોએ કરી તોડફોડ!
• 12 જાન્યુઆરીએ સ્વામિનારાયણ મંદિર પર કર્યો હતો હુમલો

ઓસ્ટ્રેલિયામાં 5 દિવસમાં બીજી વખત હિન્દુ મંદિર પર હુમલાના સમાચાર સામે આવ્યા છે. ઓસ્ટ્રેલિયામાં હિન્દુ મંદિરમાં તોડફોડ કરવાની વધુ એક ઘટના સામે આવી છે. મળતી માહિતી અનુસાર, મંગળવારે મેલબોર્નમાં વધુ એક હિન્દુ મંદિરમાં ખાલિસ્તાન સમર્થકોએ તોડફોડ કરી છે. એટલું જ નહીં ભારત વિરોધી લખાણો પણ લખવામાં આવ્યા છે. 

ઑસ્ટ્રેલિયાના મેલબર્નમાં પાંચ જ દિવસમાં બીજી વખત હિન્દુ મંદિર પર હુમલો, ખાલિસ્તાની સમર્થકોએ તોડફોડ કરી હોવાનો આરોપ#Australia #vtvgujarati pic.twitter.com/hBUsxSYO27

— VTV Gujarati News and Beyond (@VtvGujarati) January 17, 2023

12 જાન્યુઆરીએ સ્વામિનારાયણ મંદિર પર થયો હતો હુમલો
એક રિપોર્ટ મુજબ, કૈરમ ડાઉન્સ સ્થિત ઐતિહાસિક શ્રી શિવ વિષ્ણુ મંદિરમાં તોડફોડ કરવામાં આવી છે. આ પહેલા 12 જાન્યુઆરીની વહેલી સવારે ઓસ્ટ્રેલિયાના મેલબોર્નમાં મિલ પાર્ક ખાતે આવેલા BAPS સ્વામિનારાયણ મંદિરની દિવાલો પર ભારત વિરોધી લખાણો લખવામાં આવ્યા હતા. સાથે મંદિરમાં તોડફોડ કરવામાં આવી હતી. 

દિવાલ પર ભારત વિરોધી લખાણો લખાયા હતા 
એક પ્રત્યક્ષદર્શીએ જણાવ્યું હતું કે, તેઓ દરરોજ સવારે કામ પર જતાં પહેલા મંદિરે જાય છે. જ્યારે તેઓ મંદિરે પહોંચ્યા ત્યારે તેમણે મંદિરની દિવાલો પર 'હિન્દુસ્તાન મુર્દાબાદ' લખેલું જોયું હતું. આ અંગે નિંદા કરતા BAPS સ્વામિનારાયણ મંદિરે જણાવ્યું હતું કે,'અમે આ તોડફોડ અને નફરતથી ભરેલા હુમલાઓથી ખૂબ જ દુઃખી અને આઘાતમાં છીએ. અમે શાંતિ અને સૌહાર્દની પ્રાર્થના કરીએ છીએ અને ટૂંક સમયમાં વિગતવાર નિવેદન જાહેર કરીશું.' નોંધનીય છે કે, ત્યારે પણ ખાલિસ્તાન સમર્થકો પર મંદિર પર આવું કૃત્ય કરવાનો આરોપ લાગ્યો હતો.

News: Appeal for Peace, Melbourne, Australia https://t.co/UYGsrrmJEd pic.twitter.com/W75oLCAHtK

— BAPS (@BAPS) January 12, 2023

મકરંદ ભાગવતે ઘટનાની કરી હતી નિંદા 
આ મંદિરની દિવાલો પર ખાલિસ્તાન સમર્થકોએ આતંકવાદી ભિંડરાવાલેની પ્રશંસા કરી હતી. હિન્દુ કાઉન્સિલ ઑફ ઑસ્ટ્રેલિયાના વિક્ટોરિયા રાજ્ય અધ્યક્ષ મકરંદ ભાગવતે કહ્યું હતું કે, "ધાર્મિક સ્થાળો વિરુદ્ધ કોઈપણ પ્રકારની નફરત અને તોડફોડ સ્વીકાર્ય નથી અને અમે આની નિંદા કરીએ છીએ."

અગાઉ કેનેડામાં બની હતી ઘટના 
કેનેડાના બોચાસણવાસી અક્ષર પુરુષોત્તમ સ્વામિનારાયણ (BAPS) મંદિરની દિવાલોમાં 2022ના સપ્ટેમ્બર મહિનામાં અજાણ્યા શખ્સોએ ભારત વિરોધી લખાણો લખ્યા હતા અને તોડફોડ કરી હતી. કેનેડામાં ભારતીય હાઈ કમિશને આ ઘટનાની નિંદા કરી હતી અને આ મામલાની તપાસ કરી ગુનેગારો સામે ત્વરિત પગલાં લેવા કેનેડિયન સત્તાવાળાઓ સાથે મુદ્દો ઉઠાવાયો હતો.