- યુવતી મામલે બોલાચાલી બાદ હત્યાનો કેસ
- વર્ષ 2015ની ઘટનામાં 7 ને આજીવન કેદ
- સેશન્સ કોર્ટનો મહત્વના અવલોકન બાદ ચૂકાદો
અમદાવાદના દાણીલીમડા વિસ્તારમાં વર્ષ 2015માં થયેલા ડબલ મર્ડરના ચકચારી કિસ્સામાં ગુરુવારે સેશન્સ કોર્ટના જજ ચિરાયુ સનતકુમાર અઘ્યારુએ સાત આરોપીને આજીવન કેદની સજા ફટકારી છે. સાત આરોપી પૈકી એક આરોપીનું ટ્રાયલ દરમિયાન મોત થયું છે. યુવતી સાથે બોલાચાલી મામલે એક જ પરિવારના સાત સભ્યોએ તલવાર અને છરી લઇને ચાર લોકો ઉપર હુમલો કર્યો હતો જેમાં બે યુવકનું મોત થયું હતું જ્યારે બે યુવક ગંભીર રીતે ઇજાગ્રસ્ત થયા હતા.
ક્યારની ઘટના
દાણીલીમડા વિસ્તારમાં રહેતો શમસુલ હક અંસારી અને તેનો ભાઇ અનલહકની દાણીલીમડા વિસ્તારમાં કિરાણાની દુકાન આવેલી છે. તેમની દુકાનથી ચાર દુકાન છોડીને તેમના બનેવી ફિરોઝ અહમદની હોટલ આવેલી છે. જેમાં તેમના ભાઇ શાહિદ અને સાબિતઅલી બેસતા હતા. તારીખ 17 ફેબ્રુઆરી 2015ના રોજ બંને ભાઇ કિરાણા સ્ટોર પર હાજર હતા ત્યારે મોડી સાંજે બૂમાબૂમ થઇ હતી. બંને ભાઇ જોવા માટે ગયા ત્યારે દાણીલીમડા વિસ્તારમાં રહેતા અને એક જ પરિવારના મહમદહુસેન ઉર્ફે અજમેરી શેખ, અબ્દુલસલામ શેખ, અબ્દુલનફિસ ઉર્ફે બંટી શેખ, અબ્દુલરશીદ ઉર્ફે પૌવા શેખ, અબ્દુલહમીદ ઉર્ફે બાબા શેખ, અબ્દુલવાહિદ ઉર્ફે મુન્ના શેખ, અબ્દુલહાફિઝ ઉર્ફે ગુડ્ડા શેખ નામના લોકો શાહિદ અહમદ ઉપર હુમલો કરી રહ્યા હતા.
તીક્ષ્ણ હથિયારોથી હૂમલો
ઘટના શટલે દોડી આવેલા શમસુલ હકની સામે જ આરોપીઓએ શાહિદ અહમદના પેટમાં તલવાર ભોંકી દીધી હતી. શાહિદ અહમદને બચાવવા માટે જ્યારે ફિરોજ અહમદ અને સાબિત અલી પહોંચ્યા ત્યારે આરોપીએ તેમને પણ છરી તેમજ તલવારના ઘા ઝીંકી દીધા હતા. બનેવી પર જીવલેણ હુમલાની ઘટનાને જોઇને અનલહક પણ દોડી આવ્યો હતો. જ્યાં આરોપીઓએ તેમને પણ છરીના ઘા ઝીંકી દીધા હતા. આ લોહિયાળ હુમલામાં બૂમાબૂમ થતાં આરોપીઓ ત્યાંથી નાસી છુટ્યા હતા જ્યારે ચારેય ઇજાગ્રસ્તોને સારવાર માટે હોસ્પિટલમાં ખસેડવામાં આવ્યા હતા. જ્યાં શાહિદ અહમદ તેમજ ફિરોજ અહમદનું સારવાર દરમિયાન મોત થયું હતું. જ્યારે સાબિતઅલી અને અનલહકને એટલી હદે ઇજા પહોંચી હતી કે તેમને પેટમાં જાળી નાખવાની નોતબ આવી ગઇ હતી. આ ચકચારી કેસમાં પોલીસે સાત આરોપીઓ વિરુદ્ધ હત્યા તેમજ હત્યાની કોશિશનો ગુનો દાખલ કરીને તપાસ શરૂ કરી હતી.
યુવતી સાથે બોલાચાલી બાદ અદાવત
પોલીસ તપાસમાં સામે આવ્યું હતુંકે મૃતક શાહિદ અહમદને શિફા નામની કોઇ યુવતી સાથે બોલાચાલી થઇ હતી. જેની અદાવત રાખીને આરોપી આવ્યા હતા અને ચાર લોકો ઉપર હુમલો કર્યો હતો. આ કેસમાં ફરિયાદી તરફે વકીલ વી.એ.સૈયદ અને આઇ.એમ. દેસાઇ હતા. કેસમાં તમામ સાયન્ટિફિક પુરાવા, ડાઇંગ ડેકલેરેશન તેમજ સાક્ષી અને પંચોનાં નિવેદન બાદ સેશન્સ કોર્ટના એડિશનલ સેશન્સ જજ ચિરાયુ સનતકુમાર અઘ્યારુએ તમામ આરોપીઓને આજીવન કેદની સજા ફરમાવી છે. આ કેસમાં સંડોવાયેલા સાત આરોપી પૈકી પાંચ સગા ભાઇ છે જ્યારે તેમના પિતા પણ આરોપી છે જેમનું ટ્રાયલ દરમિયાન થોડાક સમય પહેલાં મૃત્યુ થયું છે.
