ગુજરાતમાં વધતાં કોરોના વાયરસના કેસની વચ્ચે કેન્દ્રીય ગૃહમંત્રી અમિત શાહ અમદાવાદની મુલાકાતે આવી શકે છે.
અમિતશાહ આવી શકે છે ગુજરાત
નવનિર્મિત 900 હોસ્પિટલની લેશે મુલાકાત
DRDO દ્વારા તૈયાર કરાઈ છે હોસ્પિટલ
કેન્દ્રીય ગૃહ મંત્રી અમિત શાહ ગુજરાત આવી શકે
ગુજરાતમાં કોરોના વાયરસના વધતાં કેસ વચ્ચે કેન્દ્રીય ગૃહમંત્રી અમિત શાહ અમદાવાદ આવી શકે છે. અમદાવાદમાં કોરોના વાયરસના કારણે સતત પરિસ્થિતિ બગડી રહી છે અને હોસ્પિટલોમાં બેડ ફૂલ થઈ ગયા છે ત્યારે DRDO દ્વારા અમદાવાદના યુનિવર્સિટી કન્વેન્શન હૉલમાં કોવિડ કેર સેન્ટર ઊભું કરવામાં આવી રહ્યું છે ત્યારે આ કોવિડ હોસ્પિટલની સમીક્ષા કરવાં માટે અમિત શાહ અમદાવાદ આવે તેવી શક્યતા છે.
અમદાવાદમાં સતત વધી રહેલા કેસની વચ્ચે આવતીકાલે અમિત શાહ અમદાવાદના કોવિડ હોસ્પિટલની મુલાકાત લઈ શકે છે. અહિયાં 900 બેડની સુવિધા ઊભી કરવામાં આવી છે જેથી હોસ્પિટલો પરનું ભારણ ઘટાડી શકાય અને વધુ સારી રીતે સારવાર આપી શકાય. થોડા સમય પહેલા જ રાજ્યના મુખ્યમંત્રી વિજય રૂપાણીએ આ કોવિડ હોસ્પિટલની જાહેરાત કરી હતી. નોંધનીય છે કે આ કોવિડ હોસ્પિટલમાં 150 બેડ ICU અને વેન્ટિલેન્ટરના પણ છે. આશા છે કે ગુજરાતમાં વધતાં કેસની વચ્ચે આ કોવિડ હોસ્પિટલથી રાહત મળશે. નોંધનીય છે કે ભારતમાં વધતાં કોરોના વાયરસના કારણે DRDO દ્વારા દેશના જુદા જુદા શહેરોમાં આ પ્રકારની હોસ્પિટલો ઊભી કરવામાં આવી છે.
રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં ગત 24 કલાકમાં કોરોનાના 12,553 નવા કેસ નોંધાયા છે તો સંક્રમણના કારણે 125 લોકોના મોત નિપજ્યા છે. આ સાથે જ 4,802 દર્દીઓ સાજા થયાં છે. આ સાથે જ અત્યાર સુધીમાં 3,50,865 દર્દીઓ કોરોના મુક્ત થયાં છે. ઉલ્લેખનીય છે કે, છેલ્લા 24 કલાકમાં રાજ્યમાં 125 લોકોના સારવાર દરમિયાન મોત થયાં છે. આમ ગુજરાતમાં અત્યાર સુધીમાં 5740 લોકોના મોત કોરોનાને કારણે થયાં છે. ગઇકાલ કરતા આજે કોરોનાના કેસમાં ચિંતાજનક ઉછાળો નોંધાયો છે તો સાથોસાથ મૃત્યુનો આંકડો પણ દિવસેને દિવસે વધી રહ્યો છે. રાજ્યમાં હાલ 361 લોકો વેન્ટિલેટર પર છે. એક્ટિવ કેસનો આંકડો 84,126 પર પહોંચ્યો છે.
ઉત્તર ગુજરાતના મહેસાણાએ ચિંતા વધારી
કોરોનાનો પ્રકોપ દરરોજ વધી રહ્યો છે. ત્યારે ગત 24 કલાકમાં નોંધાયેલા કોરોનાના કેસમાં અમદાવાદ સુરત બાદ મહેસાણા જિલ્લામાં ચિંતાજનક આંકડો નોંધાયો છે. ઉત્તર ગુજરાતના મહેસાણામાં પણ કોરોના કહેર જોવા મળી રહ્યો હોય તેમ લાગી રહ્યું છે. ગત 24 કલાકમાં અહીં 495 નવા કેસ નોંધાયા હતા.